¹ Yehoba wa ambile kwi Mosesa amba: ² "Amba ku baantu beena Isalela, ne kwaamba kwi abo amba, 'Abino byo bijiilo byasalwa bya Yehoba byo mwafwainwa kutoongo amba bipwiilo byazhila; byo bijiilo byaami byo mwafwainwa kubula kuleka. ³ Mwafwainwa kwiingila mooba ataanu ne jimo, mino juuba ja butaanu na bubiji ja Sabaado ja kukookoloka, mkupwiila kwazhila. Keechi mwafwainwa kwiingila miingilo naangwa umotu ne maambo jino juuba ja Sabaado ja Yehoba mu mapuunzha moonse mo mwiikala. ⁴ Mino ke bijiilo byatoongolwa bya Yehoba, kupwiila kwazhila ko mwafwainwa kubijika pa bimye byatoongolwa: ⁵ Mu n'oondo mutaanshi pajuuba ja bujikumi ne buna ja mu n'oondo, jo juuba ja kijiilo kya lupitailo kya Yehoba. ⁶ Pa juuba ja bujikumi ne butaanu ja mu n'oondo umootu jo juuba ja kijiilo kya shiinkwa wabula mbizho wa Yehoba. Maambo mooba ataanu na abiji mwafwainwa kuja shiinkwa wabula mbizho. ⁷ Juuba jitaanshi mwafwainwa kwipaatula mu kupwiila pamo; Keechi mukeengile mwiingilo uji yeense ye mwiingila. ⁸ Mukapaane mulaambu wa kajo kwi Yehoba mu mooba ataanu na abiji. Juuba ja butaanu na abiji jo juuba ja paatulwa kwi Yehoba, kabiji pa jooja juuba keechi mwafwainwa kwiingila mwiingilo uji yeense ye mwiingila." ⁹ Yehoba wa ambile kwi Mosesa, ne kwaamba amba, ¹⁰ "Amba ku baantu beena Isalela ne kwibaambila amba, 'Kimye kyo mukafika mu muzhi awa ye nkemupa, kabiji kimye kyo mukanoowamo kajo kaanji, keepo mwafwainwa kuleeta biintu bya bipaangwa bitaanshi bya kajo kwi n'aanga. ¹¹ Ukemanya kikuta kya kajo ku meeso a Yehoba ne kwikapaana kwi aye, na maambo akuuba bikeetabizhiwa mukwimimeenako. Jino jo juuba panyuuma ya juuba ja Sabaado amba n'aanga akekasuuntule ne kwikapaana kwi amiiwa. ¹² Pajuuba jo mukasuuntula bikuta bya kajo ne kwi bipaana kwi amiiwa, mwafwainwa kulaambula mwaana mukooko mulume uji na mwaaka umo kabiji wabula bulema kwiikala ke kitapisho kya kusooka kwi Yehoba. ¹³ Mulaambu wakajo wafwainwa kwiikala kipimo jikumi na bijimi bya buunga bwalaamba bwavwaangakana na maanyi, mulaambu waleengwa na mujilo kwi Yehoba, amba aleete bweema bwa waama, kabiji ne mulaambu wa binyu wa buna wa ntuumbe. ¹⁴ Keechi mwafwainwa kuja shiinkwa, naangwa kajo katalala, poso ne juuba jimotu jo mwaleeta uno mulaambu kwi Yehoba. Uno ukeekala ke muzhilo wa myaaka kufiikatu ne kubaloongo beenu ba kulutwe, ne moonse mo mukeekala. ¹⁵ Kutendeeka kufuma panyuma ya juuba ja sabaado ke juuba jomwafwainwa kuleeta bikuta bya kajo kwikala ke mulaambu wa kupepeezha -mubale miluungu itaanu na ibiji ya pwijijika. ¹⁶ Mwafwainwa kubala mooba makumi ataanu, akekala pa nyuma ya juuba buna na bubiji ja sabaado. keepo mwafwainwa kupaana mulaambo wa kajo ka nsono kwi Yehoba. ¹⁷ Mwafwainwa kuleeta bya muma zuubo enu mashiinkwa abiji aleengwa kufuma mu kipimo jikumi - na abiji. Byafwainwa kuleengwa kufuma ku buunga bwa lambisha kabiji bwaleengwa na mbinzho; bikekala ke mulaambu wa kupeezha bipaangwa kwi Yehoba. ¹⁸ Mwafwainwa kupaana na nshiinkwa ne baana ba Mikooko ba taanu nababiji ba mwaaka umo babula bulema, mwaana wa n'oombe, kabiji ne Mikooko ulume ibiji. Wafwainwa kwikala ke mulaambu wa kusooka kwi Yehoba, pamo na mulaambu waabo wa kaajo ne mulaambu waabo wa biintu , ne kitapisho kya leengwa na mujilo ne kuletaanga bweema bwa waama kwi Yehoba. ¹⁹ Mwafwainwa kulambula mbuzhi umo muluume wa kitapisho kya kufuuta bubu, ne kitapisho kya baana ba Mukooko babiji ba mwaaka umo umo, kwikala ke kitapisho kya lumvwan'aano. ²⁰ N'aanga wafwainwa kwibipeezha pamo na nshiinkwa wa bipaangwa bya nsoono ku meeso a Lesa, ne kwibapaana kwi aye kwikala ke kitapisho pamo na baana baana ba Mikooko babiji. Bikekala ke bitapisho byazhila kwi Yehoba byakwa N'aanga. ²¹ Mwafwainwa kubila mbila pa joonkaaja juuba. kukekala kupwiila kwa zhila, kabiji keechi mwafwainwa kwingila mwingilo ne. Uno ukekala ke muzhilo wa kikupu kufikatu ne kubaloongo beenu ba kulutwe mu mapuunzha moonse mo mwikala. ²² Kimye kyo mukanowa kajo ka mukyaalo kyeenu, kechi mwafwainwa ku nowa kajo koonse ka makoonka a majimi enuu, kabiji kechi mwafwainwa ku buungizha kajo kashala muma jimi unuu. Mwafwainwa kushiila ba yaanjji ne mweenyi. Yaami Yehoba Lesa weenu."' ²³ Yehoba waambijiile Mosesa , ne kwaamba amba, ²⁴ "ambila beena Isalela ne kwaamba amba; Mun'oondo wa butaanu na bubiji, juuba jitaashi ja yeenkawa n'oondo jikekala juuba jeenu ja kukokolokelamo, ja kuvuluka na kwiimba Ntolompita, ne kupwiila kwa zhila. ²⁵ Keechi mwafwainwa kwingila mwingilo ye mwingilaapo joonse, kabiji mwafwainwa kulambula kitapisho kyaleengwa na mujilo kwi Yehoba." ²⁶ Pokaapo Yehoba wambijiile Mosesa, kwaamba amba, ²⁷ ''Pano juuba jabujikumi ja uno N'oondo wa butaanu na bubiji jo juuba ja lufuchilo lwa maambo. Kwafwainwa kwikala, ke kupwiila kwazhila, kabiji mwafwainwa kwikepesha aneeba beene ne kupaana kitapisho kya kusooka namujilo kwi Yehoba. ²⁸ Keechi mwafwainwa kwingila mwingilo pa jooja juuba maambo jo juuba ja lufuuto lwa maambo, kwilengela mfuuto ya maambo anweeba beene ku meeso a Yehoba Lesa Weenu. ²⁹ Yeense ukabula kwiikepesha aye mwiine pa joja juuba wafwainwa kupatulwaako ku baloongo baanji. ³⁰ Muuntu yeense ukeengila mwiingilo pa jooja juuba, Amiiwa, Yehoba, nkamonawina mu baloongo baanji. ³¹ Keechi mwafwainwa kwiingila mwiingilo wa mutuundu uji yeesnse pa jooja juuba. Uno ukeekala ke muzhilo wa myaaka kufiika ne kubaloongo beenu ba kulutwe mu mapuunzha moonse mo mu keekala. ³² Ajino juuba jafwainwa kwiikala kwi anweeba ke ja Sabaado ja kukookoloka, kabiji mwafwainwa kwi keepesha anweeba beene pajuuba ja butaanu na buna ja mu n'oondo mabaanga. Kufuma mabaanga ne kufika ku mabaanga akwaabo mwafwainwa kulama Sabaado weenu." ³³ Yehoba wa ambile kwi Mosesa, amba, ³⁴ "Amba ku baantu beena Isalela, waambe amba, 'Pajuuba ja bujikumi na butaanu ja mu n'oondo wa butaanu na bubiji jikeekala juuba ja kitapisho kya miimba kya Yehoba. Kikapwiisha mooba ataanu na abiji. ³⁵ Pajuuba jitaanshi kwafwainwa kwiikala kupwiila kwazhila. Keechi mwafwainwa kwiingila mwiingilo ye mwiingilo ne. ³⁶ Maambo mooba ataanu na abiji mwafwainwa kulaambula kitapisho kya leengwa na mujilo kwi Yehoba. Pajuuba ja butaanu na busatu kwafwainwa kwiikala kupwiila kwazhila, kabiji mwafwainwa kuleenga kitapisho kya laambulwa na mujilo kwi Yehoba. Akuno ke kupwiila kwazhila, kabiji keechi mwafwainwa kwiingila miingilo yo mwiingila ne. ³⁷ Bino ke bijiilo byatoongolwa bya Yehoba, byo mwafwainwa kushimuna kwiikala byazhila noobe kupwiila kwazhila kwa kupaana bitapisho bya mujilo kwi Yehoba, mulaambu wakusooka ne mulaambu wakajo, bitapisho ne milaambo ya kutoma, kimo pa juuba jaakyo. ³⁸ Abino bijiilo bikabiikwa ku mooba a Sabaado ya Yehoba ne kubya bupe bya kulaya byeenu byoonse, ne milaambu yeenu yoonse ya kwifuukwila aya yo mupaana kwi Yehoba. ³⁹ Mukulama kijiilo kya miimba pa juuba ja bujikumi na butaanu ja mu n'oondo wa butaanu na bubiji, kimye kyo mwabuungizhamo bipaangwa bya mukyaalo, mwafwainwa kulama kino kijiilo kya Yehoba mooba ataanu na abiji. Juuba jitaanshi jikeekala ke ja kukookoloka, ne juuba ja butaanu na bubiji naajo jikeekala ja kukookoloka. ⁴⁰ Pajuuba jitaanshi mwafwainwa kuseenda bipaangwa bya waamisha bya kubichi, ne kumisaampi ya ku kichi kya maanyi, ne misaampi iji na mabuula a bichi byajita, ne misoombo ya ku meema, kabiji mukasaangalanga ku meeso a Yehoba Lesa weenu. ⁴¹ Mu mooba ataanu na abiji kila mwaaka mwafwainwa kusekelela kino kijiilo kya Yehoba. Uno ukeekala ke mukaambizho kufikatu ne ku nkulo yeenu yoonse mu mpuunzha moonse mo mwiikala. ⁴² Mafwainwa kwiikala mu miimba icheeche mooba ataanu na abiji. Aba boonse basemenwe mu Isalela bafwainwa mkwiikala mu miimba icheeche mu mooba ataanu ne abiji, maambo aba baana ba baana beenu, ⁴³ nkulo ne nkulo ikwaabo, bafwainwa kufuunda byo ba leengele baantu beena Isalela kwiikala mu miimba yoonka ya kimye kyo ne bataangijile pa kwibafumya mu kyaalo kya Ijipita. Yaami Yehoba Lesa weenu."' ⁴⁴ Mu jino jishiinda Mosesa wabijikile kijiilo kya toongolwa kya Yehoba ku baantu beena Isalela.