¹ Yehoba waambijiile Mosesa, kwaamba amba, ² ''amba kwi Alona ne kubaana baanji baabalume, bambile bafume ku biintu byazhila bya baantu bamu Isalela, pa patulwa kwi amiwa. keechi bafwainwa kusuula jizhiina jaami jazhila ne. Yaami Yehoba. ³ Waambe kwi abo amba ; inge baloongo beenu baji boonse kufikatu ne kunkulo yeenu yakulutwe bafweenya kubwiipi na biintu byazhila bya aba baantu ba Isalela byo bapatula kwi Yehoba, saka abula kutoota, awa muuntu wafwainwa kupatulwaako ku meeso aami:Yaami Yehoba. ⁴ Kafwaako baantu ba mu baana bakwa Alona baji na mbuumba ne, naangwa uji na kikola kya kusuuma wafwainwa kuja kijiilo kiji kyoonse kya leengwa kwi Yehoba ne kanaatu waikala watooka. Yeesne ukwaata kiintu kiji kyoonse kyabula kutooka kupichila mu kwikuunka na bafu, naangwa kwi kuunnka na muuntu uji na kikola kya kusuuma mashi, ⁵ naangwa yeense wakwaata nyaama uji yeense wa lemana umuleengela aye kubula kutooka, naangwa muuntu uji yeense uleenga aye kwiikala wabula kutooka naangwa bunya bwa mutuundu yeense- ⁶ Poonkapo n'aanga uka kwaata kiintu kiji kyoonse kya bunya ukeekala wabula kutooka kufikatu ne mabaanga. Keechi wafwainwa kuja ku biintu biji byoonse byazhila ne, kanaatu waovwa mubiji waanji mu meema. ⁷ Juuba byo jikazhika, kepo akeekala watooka. Panyuuma ya kuzhika kwa juuba wafwainwa kuja ku biintu byazhila, maambo kajo kaanji. ⁸ Keechi akaje nyaama wifwiila naangwa ye baipaya ku ba nyaama ba muungye ne, maambo uketamisha aye mwiine. Yaami Yehoba. ⁹ Ba n'aanga bafwainwa kuloondela mikaambizho yaami, naangwa bakazhaatwa na buubi kabiji bafwainwa kufwa na maambo a kuunsula amiiwa. Yaami Yehoba wibaleenga kwiikala bazhila. ¹⁰ Kafwaako naangwa umo wabula wa mukisemi kya ba n'aanga ne beenyi ba aye n'aanga naangwa ba miingilo baanji ba lupoto, bafwainwa kuja kiintu kiji kyoonse a kya kyazhila ne. ¹¹ Mino inge n'aanga wapota muzha uji yeense na maali anji, awa muzha wafwainwa kuja ku biintu bya paatulwa kwi Yehoba. N'aanga ne baloongo baanji ne bazha basemwa mu nzuubo yaanji, naabo bafwainwa kuja naanji kufuma ku byoobya biintu. ¹² Inge mwaana wa mukazhi wakwa aye n'aanga wasoongolwa ku muuntu wabula n'aanga, keechi wafwainwa kuja ku biji byoonse bya mulaambu wazhila ne. ¹³ Mino inge mwaana wa mukazhi wakwa aye n'aanga waikala ke kituzhi, naangwa ba mukaana, kabiji inge keechi wasemenamo mwaana ne, kabiji inge wabweela mukwiikala mu nzuubo ya bashaanji mu bwanyike bwaanji, wafwainwa kuja ku kajo kashaanji. Mino kafwaako muuntu wabula wa mu kisemi kya bu n'aanga wafwainwa kuja ku kajo ka ba n'aanga ne. ¹⁴ Inge muuntu waaja kajo kazhila kwkubula kwikayuuka ne, poonkapo wafwainwa kwikapaana jibiji ku ba n'aanga na maambo a kyookyo, wafwainwa kubiikapo kimo pa bitaanu ne kwibibweezha ku ba n'aanga. ¹⁵ Baantu beena Isalela keechi bafwainwa kusuula biintu byazhila abya byo basuuntula peulu ne kwi bipaana kwi Yehoba, ¹⁶ ne kwi leengesha abo beene kuseenda buubi abwa bukebaleengela kuzhaatwa na maambo a kuja kajo kazhila, maambo yaami Yehoba wiiba leengele kwiikala bazhila.'' ¹⁷ Yehoba wa ambile kwi Mosesa, ne kwaamba amba, ¹⁸ "Amba kwi Alona ne baana baanji ba balume, kabiji ne ku baantu boonse beena Isalela. Baambile amba, 'Muuntu uji yeense wa mu nzuubo yabeena Isalela naangwa mweenyi ubeena kwiikala mu Isalela, kimye kyo bapaana bitapisho-naangwa kya kufikizha mulaye naangwa ye mulaambu wa kwifuukwila, naangwa bapaana mulaambu wakusooka kwi Yehoba, ¹⁹ inge kyakuuba waswiishiwa, bafwainwa kulaambula nyaama mulume wabula bulema wa mu ba n'oombe, naangwa mikooko, naangwa ba mbuzhi. ²⁰ Mino keechi bafwainwa kulaambula nyaama uji yeense uji na bulema ne. Keechi nkamuswe mu kwimwimeenako ne. ²¹ Yeense walaambula kitapisho kya luumvwan'ano kya mu ba n'oombe naangwa mikooko kwi Yehoba mukufikizha mulaye naangwa kwiikala ke mulaambu wakwifuukwila, wafwainwa kwiikala wabula kulemana pakuuba aswiishiwe. Keechi mwafwainwa kutaanwa kikola mu yeewa nyaama ne. ²² Keechi mwafwainwa kulaambula ba nyaama ba mpofu, naangwa balemana, naangwa bakozhewa, naangwa aba baji na bipoopoto, naangwa biloonda naangwa mikovu. Keechi mwafwainwa kulaambula bino kwi Yehoba kwiikala ke kitapisho kya kusooka na mujilo pa kya kusookelapo bitapisho ne. ²³ Wafwainwa kupaana kwiikala ke mulaambu wakwifuukwila wa n'oombe naangwa mwaana mukooko awa waonaika naangwa mucheeche ne, mino mulaambu uji noobe byonka byo keechi ukaswiishiwa kwiikala ke byo alaya ne. ²⁴ Keechi mukalaambule nyaama uji yeense kwi Yehoba awa uji na bulema yebaviinga, ye bachimuna, naangwa ye bachiba bya bwaana bulume. Keechi muube kino mukachi ka ntaanda yeenu ne. ²⁵ Keechi mwafwainwa kupaana shiinkwa wa Lesa weenu ku kubooko kwa mweenyi ne. Aba ba nyaama baonaika kabiji mwiabo muji bulema, keechi bakaswiishiwa ne."' ²⁶ Yehoba wa ambile kwi Mosesa amba, ²⁷ "Mwaana n'oombe, naangwa mwaana mukooko, naangwa wa mbuzhi byo a kasemwa, wafwainwa kushaala kwi inaanji mooba ataanu ne abiji. Keepo kufuma juuba jabutaanu na jisatu ne kuya kulutwe, wafwainwa kuswiishiwa kiiwkala ke kitapisho kyaleengwa na mujilo kwi Yehoba. ²⁸ Keechi mukeepaye n'oombe naangwa mukooko mukazhi pamo ne na baana baanji, babiji pa juuba jimo ne. ²⁹ Inge watapisha mulaambu wa kusaanta kwi Yehoba, wafwainwa kwi kitapisha mu jishiinda ja swiishiwa. ³⁰ Wafwainwa kujiiwatu pa joonka ja juuba jobamutapisha. Mwafwainwa kubula kushaapo kufikatu ne juuba jaloondelapo lukeelo. Yaami Yehoba. ³¹ Keepo mwafwainwa kulama mikaambizho yaami ne ayo kwiyubaanga. Yaami Yehoba. ³² Keechi mwafwainwa kusuula jizhina jaami jazhila ne. Nafwainwa kusaanchilwa ne kwiikala wazhila ku baantu beena Isalela. Yaami Yehoba wimuleenga kwiikala bazhila, ³³ wimufumishe mu ntaanda ya Ijipita ne kwiikala Lesa weenu: Yaami Yehoba."