¹ Kabiji Yehoba wa ambile kwi Mosesa amba, "Amba ku ba n'anga, baana bakwa Alona, ne kwi baambila amba, 'Kafwaako umo mwi anweeba wafwainwa kwiitamisha na maambo abooba bafwa mukachi ka baantu baanji, ² kana ku muloongo waanji wakiipi kiipi- ba inaanji naangwa bashaanji, mwaanji wa mulume, naangwa mwaananji wa mukazhi, kolojaanji, ³ naangwa nyeenga yaanji kisuungu waketekela mwi aye, byo abula mulume- na maambo a aye wafwainwa kwitamisha. ⁴ Mino keechi kwiizhilulula aye mwiine na maambo baloongo baanji baangi ne kwiitamisha mwiine. ⁵ Kabiji ba n'aanga keechi bakeba teende mitwe yaabo naangwa kuteenda bya mwaila kusaka kwaabo kwa myeemvu, naangwa kwiichibaula pa mibiji yaabo ne. ⁶ Bafwainwa kwiikala bazhila kwi Lesa waabo kabiji keechi kuleengesha buumvu jizhina ja Lesa waabo ne, maambo ba n'aanga bapaana mwaabo wa Yehoba wa kajo, shiinkwa wa Lesa waabo. Byonkabyo ba n'aanga bafwainwa kwiikala ba zhila. ⁷ Keechi bafwainwa kusoongola wa mukazhi pite ne kabiji ao awa witamishapo kala ne, kabiji keechi bafwainwa kusoongola mwaana mukazhi ye bakaana ku mwaata waanji ne, maambo aye wazhila kwi Lesa waanji. ⁸ Mwafwainwa kumuzhijika , maambo aye upaana shiinkwa kwi Lesa weenu wafwainwa kuzhila kwi anweeba, maambo amiiwa, Yehoba wimuzhijika, na zhila. ⁹ Mwaana wa mukazh yeense wa n'aanga wiitamisha mwiine mu kwi alula ke pite umuleengesha buumvu shaanji. Bafwainwa ku musooka. ¹⁰ Awa n'aanga mukataampe mu baloongo baanji, ao pa mutwe waanji po baitulwiijile maanyi, kabiji ye bazhijikile amba akavwaalenga bya kuvwaala bya pusanaako bya n'aanga mukataampe, keechi wafwainwa kuvwaala nsuuki yazela naangwa kutabaula bivwaalo byaanji ne. ¹¹ Keechi wafwainwa kuuya kuji koonse kuji kiintu kyafwa ne wiitamisha mwiine, naangwa uba shaanji naangwa ba inaanji. ¹² N'aanga mukuluumpe keechi wafwainwa kulupuka moomwa mwazhila ne naangwa kupeelula mwazhila mwa Lesa waanji ne. Amiiwa yaami Yehoba. ¹³ N'aanga mukataampe wafwainwa kisuungu kwiikala mukazhaanji. ¹⁴ Keechi wafwainwa kusoongola kituzhi ne, mwaana mukazhi ye bakaana ku mwaata waanji ne, naangwa wa mukazhi pite ne. Keechi wafwainwa kusoongola uno mukazhi pite ne, Keechi wafwainwa kusoongola uno musaango wa baana bakazhi ne. Kimye kino wakoonshatu kusoongola kisuungu kufuma mubaloongo baanji mwiine. ¹⁵ Pakuuba amba keechi atamishe baana baanji mukachi ka baantu baanji, maambo amiiwa yaami Yehoba, wa muleengela kuzhila."' ¹⁶ Yehoba wa ambile kwi Mosesa, ne kwaamba amba, ¹⁷ "Amba kwi Alona ne ku mubuula amba, 'Yeense mu baana boobe kupita moonse mu bisemi byaabo uji na mubiji wa bulema, keechi wafwainwa kupaana mulaambo wa kajo kwi Lesa waanji ne. ¹⁸ Muuntu yeense uji na bulema kumubiji keechi wafwainwa kufweenya kwi Yehoba ne, pamo ne mpofu naangwa muuntu ubula kweenda, aye uji na kibeese kyachibikaako naangwa kulemana. ¹⁹ Muuntu uji nakubooko kwa kalepu naangwa kuulu, ²⁰ Muuntu uji na ntuunda munyuuma yaanji naangwa wanyaana kukilamo naangwa mwiipi, naangwa wabiluka meeso, naangwa uji na kikoola, kiloonda, nkwaasa naangwa ye ba saansaula byeendelwa. ²¹ Kafwaako muuntu kufuma mubaana bakwa Alona n'aanga uji na mubiji walemana wafwainwa kwiiya kiipi na kupaana mulaambo waleengwa na mujilo kwi Yehoba. Muuntu wa uno mutuundu wa bulema bwa ku mubiji; keechi wafwainwa kufweenya kwiipi mu kupaana shiinkwa wa Lesa waanji ne. ²² Mino wakoonsha kuja kajo ka Lesa waanji, naangwa ka moomwa mwazhijisha naangwa ka mwazhila. ²³ Naangwa byonkabyo, keechi wafwainwa kutweela mukachi ka kipeembe naangwa kufweenya kwiipi na kyakusookelapo, maambo uji na bulema ku mubiji, kuuba amba keechi atamishe mpuunzha yaami yazhila ne, maambo amiiwa yaami Yehoba, wiibalenga kwiikala bazhila."' ²⁴ Keepo Mosesa wa ambile bino byaambo kwi Alona, kubaana baanji ba balume, kabiji ne ku baantu boonse ba mu Isalela.