¹ Yehoba wa ambile kwi Mosesa ne kwaamba amba, ² "Amba ku baantu beena Isalela amba, 'Yeense muuntu mubeena Isalela, naangwa mwiina byaalo wiikala mu Isalela upaana wamu baana baanji kwi Moloka, kiine wafwainwa kwiipaiwa. Baantu mu ntaanda bafwainwa kumwaasa mabwe. ³ Ne amiiwa nkafumyako kiluungi kyaami kuyeewa muuntu ne ku muchibako kufuma mu bantu baanji maambo wapaana mwaananji kwi Moloka, mukuuba amba atamishe mpuunzha yaami yazhila ne kupeezha jizhina jaami ja zhila. ⁴ Inge baantu ba mu ntaanda bazhinzhibela meeso abo ku yeewa muuntu inge wapaana mwaananji kwi Moloka wa mu baana baanji, inge babula ku mwiipaya, ⁵ kabiji amiiwa nkafumyako kiluungi kyaami ku yeewa muuntu ne kisaka kyaanji, kabiji amiiwa nkamuchibako ne mukwaabo naaye uba noobe pite noobe byo aubile mukuuba amba obe noobe pite ne Moloka. ⁶ Kabiji muuntu wa alukila kubesaamba na mipashi naangwa baji mu bya mipashi mukuuba amba bekwaatankanye abo beene naabo, amiiwa nkafumyako kiluungi kyaami kufuma kuyeewa muuntu; Amiiwa nkamuchibako kufuma mukachi ka baantu baanji. ⁷ Byonkabyo izhijikai anweeba beene ne kwiikala bazhila, maambo amiiwa yaami Yehoba Lesa weenu. ⁸ Mwafwainwa kulama mikaambizho yaami ne kwi iseenda. Amiiwa yaami Yehoba wimupaatula noobe bazhila. ⁹ Muuntu yeense ufiinga ba n'aanga naangwa bashaanji kiine wafwainwa kwiipaiwa. Wafiinga ba shaanji naangwa byonkabyo mashi anji aji pe aye mwiine. ¹⁰ Muuntu uba bukeende na muka mukwaabo, ko kuuba amba, yeense uba bukeende na muka muuntu mukwaabo mo bekeela kipi-aba boonse wamulume ne wamukazhi bafwainwa kwibeepaya. ¹¹ Inge mwaana mulume walaala na muka shaanji, wavweetula bwaamba bwa shaanji. Boonse babiji mwaana ne muka shaanji kiine bafwainwa kwibeepaya. Mashi abo aji pamitwe yaabo beene. ¹² Kabiji inge muuntu walaala na mulookazhi waanji, boonse babiji kine bafwainwa kwiipaiwa. Baleenga kimalwa malwa. Mashi abo ebashiinkamana beene. ¹³ Inge wamulume walaala na mwaana mulume mukwaabo, noobe na mwaana mukazhi boonse babiji baleenga kya bunya. Bafwainwa kiine kwiipaiwa. Mashi abo aji pa mitwe yaabo beene. ¹⁴ Inge muuntu wasoongola mwaana mukazhi kabiji wasoongola ne bainaanji, akye kimalwa malwa. Bafwainwa kwi basooka, boonse babiji aye ne mukazhi, pakuuba amba mubule kwiikala kimalwa malwa mwi anweeba. ¹⁵ Inge muuntu walaala na nyama , aye kiine wafwainwa kwiipaiwa, kabiji mwafwainwa kwiipaya ne nyama. ¹⁶ Inge mwaana mukazhi wafweenya kiipi kiipi ku nyama uji yeense ne kulaala naanji, mwafwainwa kwiipaya wa mukazhi ne nyama. Bafwainwa kiine kwiipaiwa. Mashi abo eba shiinkimana. ¹⁷ Inge muuntu waseenda nyeenga yaanji, mwaana wamukazhi waba shaanji naangwa mwaana wamukazhi wa ba inaanji, wamona bwaamba bwaanji naaye wa mukazhi wamona bwaamba bwaanji, ke kiintu kya buumvu. Bafwainwa kwiibachibako ku meeso a baana ba baantu baabo. Aye wavweetula buumvu bwa nyeenga yaanji kabiji wafwainwa kwiseendela kuzhaatwa kwaanji. ¹⁸ Inge muuntu walaala na mwaana mukazhi kasa aji ku mweenzhi ne kuvweetula buumvu bwaanji, wavweetula paansulo yaanji, paansulo ya mashi anji. Boonse babiji wamulume ne wamukazhi bafwainwa kwiibachibako kufuma mukachi ka baantu baabo. ¹⁹ Keechi wafwainwa kuvweetula bwaamba bwa nkasabo ba inoobe, naangwa nyeenga ya bashoobe ne, maambo ukamuleengesha buumvu muloongo obe wakiipi kiipi. Wafwainwa kwiseendela luzhaachisho obeewa mwiina. ²⁰ Inge muuntu walaala na muka mwiinsho yaanji, wavweetula bwaamba bwa mwiinsho yaanji. Bakeseendela abo beene luusa lwa buubi bwaabo, kabiji bakafwa kwakubula kusemapo mwaana ne. ²¹ Inge muuntu wasoongola muka kolojaanji, kyo kiintu kyabiipa. Wavweetula bwaamba bwa kolojaanji; bakeekala kwakubula baana. ²² Onkao maambo mukalameenga malamuna ami onse ne byoonse byo ne mubuujile; Mwafwainwa kwi bikookela pakuuba amba ntaanda mo mbeena kwimuleeta kwiikalamo keechi bakemilasemo ne. ²³ Keechi mwafwainwa kweendela mu mashiinda a yeewa mukooka ye nkemipaangilamo ku meeso enu pakuuba baubilenga bino biintu byoonse, kabiji amiiwa nebashikwa abo. ²⁴ Na amba kwi anweeba naamba, "Anweeba mukaswaana ntaanda yaabo; Amiiwa nkeipaana kwi anweeba ke yeenu, ntaanda ikoonkoloka mukaka ne buuki. Amiiwa yaami Yehoba Lesa weenu, wimwaabanya anweeba kufuma ku baantu baangi. ²⁵ Anweeba mwafwainwa kwaabanya pakachi kaba nyama ba waama ne babula kuwaama, kabiji ne pakachi ka tun'onyi twawaama ne tun'onyi twabula kuwaama. Anweeba keechi mwafwainwa kwiizhilulula na ba nyaama babula kuwaama ba mizhilo naangwa ban'onyi naangwa kinyama kiji kyoonse kikalaba paanshi pa mushiji, akyo kyo napaatula noobe kyabula kuwaama kufuma kwi anweeba. ²⁶ Anweeba mwafwainwa kwiikala bazhila, maambo amiiwa, Yehoba, nazhila, kabiji amiiwa nemipaatula anweeba kufuma kubakwaabo baantu maambo anweeba mwiiba kwaami. ²⁷ Mwaana mulume naangwa mwaana mukazhi uji na bapashi naangwa wamipashi wafwainwa kwiipaiwa. Baantu bafwainwa kwibaasa mabwe. Mashi abo aji pa mitwe yaabo.