¹ Yehoba wa ambile kwi Mosesa- abino byajiinga panyuuma ya lufu lwa baana babiji ba balume bakwa Alona, kimye kyo baile kubwiipi na Yehoba keepo bafwiile. ² Yehoba wa ambile kwi Mosesa amba, "Amba kwi Alona muloongo obe ne kumubuula amba keechi wafwainwa kwiiyatu pa kimye kiji kyoonse amwa mukachi mwazhijisha mukachi ka kipeempe kya kumeeso a kizhiko kya pakufuuchilako maambo kiji peulu ya jikwaachi. Inge wauba kino ukafwa maambo amiiwa mweekela mujikuumbi peulu ya kya kufuuchilako maambo. ³ Abino byo byo akatweelanga Alona amwa mu mpuunzha mwazhijisha. Wafwainwa kutweela na mwaana n'oombe mulume noobe mulaambu wa buubi, ne mwaana mukooko noobe mulaambu wakusooka. ⁴ Wafwainwa kuvwaala kivwaalo kya lineenyi kyaleepesha kyazhila kya kisapi kya lineenyi ne kaputula ka mukachi ka lineenyi. Kabiji wafwainwa kuvwaala ne mushipi wa lineenyi. Abye byo bivwaalo byazhila, wafwainwa koovwa mubiji waanji mu meema apa mino akavwaale bino bivwaalo. ⁵ Wafwainwa kuseenda ku mfumu mu beena Isalela ba mbuzhi babiji ba balume noobe mulaambu wa buubi ne mwaana mukooko noobe mulaambu wakusooka. ⁶ Kabiji Alona wafwainwa kuleeta n'oombe mulume noobe mulaambu wa buubi, awo ukeekala waanji mwiine, kuleenga kya kufuuchilapo maambo anji mwiine ke kisemi kyaanji. ⁷ Kabiji wafwainwa kuseenda bambuzhi babiji ne kwibatuula ku meeso a Yehoba pa kibelo kya teente wa lusaambakeno. ⁸ Kabiji Alona akateye bubale pa bambuzhi babiji, bumo bubale bwa Yehoba ne bukwaabo bubale bwa mbuzhi wakufuuchilako maambo. ⁹ Kabiji Alona wafwainwa kuleeta mbuzhi paponene bubale bakwa Yehoba, ne kupaana yeewa mbuzhi noobe mulaambu wa buubi. ¹⁰ Pakuuba awa mbuzhi paponejile bubale bwa kufuuta maambo wafwainwa kumuleeta mutuuntulu ku meeso a Yehoba, muku muleenga kyakufuuchilako maambo muku mupaangila muungye noobe kyakufuuchilako maambo poonka pe aye. ¹¹ Kabiji Alona wafwainwa kuleeta n'oombe mulume wa mulaambu wa buubi, aye ukeekala waanji mwiine. Wafwainwa kuleenga kyakufuuchilako maambo anji mwiine ne ba mu nzuubo yaanji, byonkabyo wafwainwa kwiipaya n'oombe noobe mulaambu wa buubi bwaanji mwiine. ¹² Alona wafwainwa kutoola kababula kayuula makala a mujilo kufuma pa kya kusookelapo kiji ku meeso a Yehoba, na mikono ibiji yayuula byakufutumuna bya waama byo batwa buloongo, ne kwibileeta bino biintu mukachi ka kipeembe. ¹³ Apa poopo afwainwa kubiika byakufutumuna pa mujilo ku meeso a Yehoba kuuba amba makuumbi a bwiishi akavweete peulu ya kya kufuuchilapo maambo kiji peulu yajikwaachi ja lulayaan'ano. Wafwainwa kuuba biibye kuchiina amba wakafwa. ¹⁴ Kabiji wafwainwa kuseendapo mashi amo a n'oombe ne kwi asaansa na munwe waanji paluutwe ya kya kufuuchilapo maambo. Wafwainwa kusaansa akwaabo mashi na munwe waanji jitaanu ne jibiji ku meeso akya kufuuchilapo maambo. ¹⁵ Kabiji wafwainwa kwiipaya mbuzhi wa mulaambu wa buubi bwa baantu ne kuleeta mashi anji mukachi ka kipeembe. Ko ko akoonsha kuuba na mashi byonka byo aubile na mashi a n'oombe: Kabiji wafwainwa kwi asaansa pa kya kufuuchilapo maambo kabiji ne ku meeso akya kufuuchilapo maambo. ¹⁶ Wafwainwa kuleenga kya kufuuchilapo maambo pa mpuunzha yazhila maambo a buumbulwa kooloka kwa baantu beena Isalela, ne na maambo akusatuka ne buubi bwaabo boonse. Wafwainwa kuuba bino na maambo a teente wa lusaambakeno, ako Yehoba ko ekala mukachi kaabo mukyeenyi kya byuubilo byaabo. ¹⁷ Kafwaako wafwainwa kwiikala mu teente walusaambakeno pa kimye Alona kyo atweelele mu kuleenga kya kufuuchilapo maambo moonka mwazhijisha, kufika ne pa kimye kyo alupukilapo ne kupwiisha kuleenga kya kufuuchilapo maambo kyaanji mwiine ne ba mukisemi kyaanji, ne boonse baantu ba pwiijile beena Isalela. ¹⁸ Wafwainwa kuuya ku kya kusookelapo akyo kiji ku meeso a Yehoba ne kwikileenga kya kufuuchilapo maambo kabiji wakoonsha ku seendapo amo mashi a n'oombe ne amo mashi a mbuzhi ne kwi abiika ku maseengo a kya kusookelapo kwikizhookolosha. ¹⁹ Wafwainwa kusaansapo mashi amo na munwe waanji jitaanu ne kwikitookesha ne kwikizhijika ku meeso a Yehoba, kufuma ku byuubilo byabunya bya baantu bamu Isalela. ²⁰ Kabiji byo apwiishishe kufuuta maambo a moomwa mwazhijisha, mu teente walusaambakeno, wafwainwa kuleeta mbuzhi muumi. ²¹ Alona wafwainwa kutaambika mabooko anji pa mbuzhi muumi ne kwilekela ku maambo anji onse ne buubi bwaleengele beena Isalela, buunsatuki bwaabo boonse ne buubi bwaabo boonse. Mino wafwainwa kubiika buubi pa mutwe wa mbuzhi ne kwibatwaala ba mbuzhi kuuya na kulamwa ku muuntu wineengezha kutwaala mbuzhi muungye. ²² Awa mbuzhi ye ukaseenda buubi bwa baantu boonse kwibutwaala ku kyaalo kyabulamo baantu, keepo akamuleka mbuzhi akaye muungye. ²³ Poonkapo Alona wafwainwa kubweela mu teente walusaambakeno, ne kuvuula bivwaalo bya lineenyi byo avwaajile kasa akyaangye kutweela mu mpuunzha yazhijisha, kabiji wafwainwa kusha abya bivwaalo kookwa. ²⁴ Wafwainwa koowa na meema amwa mwazhila, ne kuvwaala bivwaalo byaanjitu; Kabiji wafwainwa kuuya paangye ne kupaana mulaambu wakusooka waanji ne mulaambu wakusooka wa baantu kabiji joonka jino jishiinda uleenge kya kufuuchilako maambo kyoobe ne kya baantu. ²⁵ Wafwainwa kusooka mafuta abuupe a buubi pa kitapisho. ²⁶ Awa muuntu walekele mbuzhi kuuya muteende wafwainwa kuchapa bivwaalo byaanji ne koovwa mubiji waanji mu meema, panyuuma ya byobyo wafwainwa kubweela ku kaamba. ²⁷ N'oombe mulume wa mulaambu wa buubi ne mbuzhi wa mulaambu wa buubi, mashi anji ekala ke kya kufuuchilako maambo amwa mu mpuunzha mwazhila, wafwainwa kufumishiwa mukaamba. Akwa wafwainwa kusooka byafyamika byaabo, mibiji ne busobe. ²⁸ Muuntu ukasooka abya bipiimvwa wafwainwa kusha bivwaalo byaanji ne koovwa mubiji waanji mu meema; panyuuma ya byobyo wafwainwa kubweela mu kaamba. ²⁹ Ano akeekala ke malamuna enu a myaaka mu n'oondo wa butaanu na bubiji, pajuuba ja bujikumi mu n'oondo mukezhijike ne kwiingila miingilo iji yoonse ne, naangwa basemekelwe moonka naangwa beenyi bo mubeena kwiikala naabo. ³⁰ Maambo akuuba amba pa jino juuba maambo enu akafuuchiwa, pakuuba mutookeshiwe ku bu ndeenga maambo bweenu boonse pakuuba mukeekale batooka ku meeso a Yehoba. ³¹ Jo juuba ja Sabaado jazhila jakukookolokelamo kabiji mukezhijike ne kwiingila miingilo iji yoonse ne. O malamuna a myaaka. ³² N'aanga mukataampe awa ukashiingwa maanyi kubashiingwa kwiikala ke n'aanga mukataampe mu kifulo kibashaanji, wafwainwa kuleenga kino kya kufuuchilapo ne kuvwaala bivwaalo bya lineenyi, abya, bivwaalo byazhila. ³³ Wafwainwa kuleenga kya kufuuchilako kya mwazhila. Wafwainwa kuleenga kya kufuuchilapo kya mu teente walusaambakeno ne kyakusookelapo, kabiji wafwainwa kuleenga kya kufuuchilapo kya n'aanga ne kya baantu boonse bapwiijile. ³⁴ Ano akeekala malamuna enu a myaaka, kuleenga kya kufuuchilako maambo kya baantu ba mu Isalela maambo a buubi bwaabo, jimo pa mwaaka." Kabiji Mosesa waubile moonka mwamukaambizhizhe Yehoba.