¹ Panyuma ya biino biintu, Yesu wafumiineko waile ku bushiiya bwa kalunga ka Ngalileya, kabiiji kateelwa amba kalunga ka Tibeliasa. ² Jibuumba jikataampe ja muloondenjilenga maambo ba mweene bimweesho byo aubileenga pa booba ba kolelwe. ³ Yesu waile peulu pa mutuumba kabiiji ponkapa waikele paanshi na baana baanji ba bwaanga. ⁴ (Pano kijiilo kya lupitailo, kusaangalala kwa ba Yudea, kwajiinga peepi.) ⁵ Yesu byo ainwiine meeso kabiiji wamweene jibuumba jikataampe sa jibeena kwiiya kwi aye, wa ambiile kwi Filipa amba, "Kweepi ko tusakuya na kupoota shiinkwa byonkabyo amba abe bakoonshe kuuja?" ⁶ (Mino Yesu wa ambiile bino mu kumweeseka Filipa, pakuuba aye mwiine wayuukile byo a koonsha kuuba.) ⁷ Filipa wa mukuumbwile amba, "Bitoota bibiji bya ndenali byafwainwa kupotatamo shiinkwa keechi wa koonsha kukumana pakuuba boonse bataambule kacheeche kacheeche." ⁸ Umo mu baana ba bwaanga, Andeleo, muloongo wakwa Shimona Petelo, wa ambiile kwi Yesu amba, ⁹ Kuuji nsoongwalume pano uji na ba shiinkwa ba baleeya batanu ne masabi abiji, mino bino byo biika mu bavula byonkabye?" ¹⁰ Yesu wa ambiile amba, "Leengai baantu bekale paanshi." Pano kwajiinga nsoono yavula mu mpuunzha. Byonkabyo baana balume baikele paanshi, bajiinga noobe biumbi bitanu mu nambala. ¹¹ Keepo Yesu washikwile ba shiinkwa ne panyuuma ya kupaana saante, wi bapaine ku booba baikeele. Wa ubiile byonkabyo ne na masabi, avula byonkabyo ba kebele. ¹² Baantu byo baikuchile, wa ambiile ku baana baanji ba bwaanga amba, "Buungizhai paamo bitebu bya shalapo, byonkabyo amba kafwako kasa kweleka. ¹³ Byonkabyo ba bungizhe pamo ne kuyuuzha misaansa jikumi na ibiji na bitebu bya fuumine ku ba shiinkwa batanu ba baleeya bya shajilepo ku booba bajiile. ¹⁴ Kabiiji, baantu byo ba mweene kino kimweesho kyo aubile, ba ambiile amba, "Awe kyakiine ye ngauzhi ukeeya mu ntaanda." ¹⁵ Yesu byo amweene amba kebasake kwiiya na kumukwaata ne kumukaanjikizha kwiikala mfumu, wafumineko jikwaabo ne kuuya peulu pa mutuumba aye mwiinetu. ¹⁶ Byo kyafiikile mabaanga, baana baanji ba bwaanga baile kunshi ku kaluunga. ¹⁷ Bakanjijile mu bwaato, kabiiji baileenga bushiiya bwa kaluunga ku Kapenama. Pafiichile pa kyokya kiimye, ne Yesu keechi wa kishiile kwi abo ne. ¹⁸ Mweela wakosa wa pupileenga, ne kaluunga kabipileenga. ¹⁹ Byo ba vuwiile peepi mafolonga makumi abiji na atanu nangwa makumi asatu, ba mweene Yesu saka enda pa kaluunga ne kwiiya kwiipi na bwaato, kabiiji ba umvwine mooyo. ²⁰ Mino wa ambiile kwi abo amba, " ye amiiwa! Kuuba mooyo ne" ²¹ Keepo bakasulukile ku mutambwiila mu bwaato, kabiiji ponkapotu bwaato bwafiikile ku mushiji ko baileenga. ²² Juuba ja loondejilepo, jibuumba jaimeneenga ku bushiiya bwa kaluunga bamweene amba keechi kwajiingapo bwaato bukwaabo kookwa ne kufumyakotu boonkabwa buumo, kabiiji amba Yesu keechi watweelelemo na baana baanji ba bwaanga ne mino amba baana baanji ba bwaanga baile buunke. ²³ Byonkabyo, kwajiinga maato amo afumine ku Tibeliasa kwiipi na mpuunzha ko bajijiile shiinkwa panyuma ya kupaana saante aye Nkaambo. ²⁴ Jibuumba byo ja yuukile amba Yesu nangwa baana baanji ba bwaanga keechi bajiinga kookwa ne, abo beene bakanjijile mu maato ne kuuya ku Kapenama muku mukeeba Yesu. ²⁵ Panyuma ya kumutaana ku bushiiya bwa kaluunga, ba ambiile kwi aye amba, "Laabi, mwaaji kwiiya kiimyeka kuuno?" ²⁶ Yesu wibakuumbwile abo, amba, "Kiine, kiine, mubeena kuunkeba amiiwa, keechi na maambo mwamweene bimweesho, mino na maambo mwajiile ba shiinkwa baamo ne kwiikuta. ²⁷ Keechi mwiigijilenga kaajo aka konaika ne, mino ingijilainga kaajo aka kekala ne ku buumi bwa myaaka ako kakemupa mwaana muuntu, pakuuba Lesa Taata watuuma kayuukilo pe aye." ²⁸ Keepo ba ambiile kwi aye amba, "Kiika kyo twakoonsha kuuba, byonkabyo amba atweeba tukoonshe kuuba miingilo ya Lesa?" ²⁹ Yesu wakuumbwile ne kwi baambila amba, "Awe ye mwiingilo wa Lesa: Amba anweeba mwitabile mwi aye ye atuuma." ³⁰ Byonkabyo ba mwaambijile aye amba, "Kimweesho ka kyo usakuuba kabiiji, byonkabyo amba tukoonshe kumona ne ku kwitabila obeewa? Kiika kyo usakuuba? ³¹ Basheetu bajiile maana muungyetu, byoonka byo kyaneembwa, 'Wiiba peele shiinkwa kufuuma mwiulu ya kuuja." ³² Kabiiji Yesu wibakuumbwile amba, "Kiine, kiine, keechi Mosesa wimu peele shiinkwa kufuuma mwiulu ne, mino ba Taata bo babeena kwimupa shiinkwa wa kiine kufuuma mwiulu. ³³ Pakuuba shiinkwa wa Lesa ke yeewa wiiya panshi kufuuma mwiulu ne kupaana buumi ku ntanda." ³⁴ Byonkabyo ba ambiile kwi aye amba, "Mwaane, tupai yeo shiinkwa joonse." ³⁵ Yesu wi bambile amba, "Amiiwa ne shiinkwa wa buumi; awa wiiya kwi amiiwa keechi ukeekala na nzala ne,kabiiji ne yeewa waitabila mwi amiiwa keechi ukomvwa kilaka ne. ³⁶ Mino ne mibujile naamba kya kiine mwa mmona amiiwa, ne anweeba keechi mwaitaba ne. ³⁷ Yeense ye baampa ba Taata ukeeya kwi amiiwa, kabiiji ne yeewa wiiya kwi amiiwa keechi nkamutaaya nangwa pacheeche ne. ³⁸ Pakuuba naiya panshi kufuuma mwiulu, keechi mukuuba kyaswa muchima waami ne, mino kyaswa muchima wa aye wantumine. ³⁹ Kino kyo kyaswa muchima wa aye wantumine, amba keechi nafwainwa kweela nangwa umo pa boonse bo ampa amiiwa ne, mino ukeebabusha pa juuba japelako. ⁴⁰ Pakuuba kuuno ko kuswa kwa ba Taata, amba boonse bamoona Mwaana ne kwitabila mwi aye ukeekala na buumi bwa myaaka kabiiji amiiwa nkamubusha pa juuba ja pelako." ⁴¹ Keepo ba Yudeya ba nyinyichile pe aye maambo wa ambile amba, "Amiiwa ne shiinkwa waiya panshi kufuma mwiulu." ⁴² Ba ambile amba, "Awe keechi Yesu mwaana wakwa Yosefwa, ba shaanji ne bainanji bo twayuuka ne nyi? Pano kabiiji wa amba byeepi amba, 'Amiiwa naiya panshi kufuuma mwiulu'?" ⁴³ Yesu wakumbwile ne kwi bambila amba, "Lekai kunyinyita mukachi keenu anweeba beene. ⁴⁴ Kafwaako nangwa umo wakoonsha kwiiya kwi amiiwa kanatu ba Taata bantumine ba mufwenya aye, kabiiji amiiwa nkamubusha pa juuba japelako. ⁴⁵ Kya neembwa mu ba ngauzhi, 'Boonse ba umvwa ne kufuunda ku ba Taata wiiya kwi amiiwa. ⁴⁶ Keechi amba boonse bamona ba Taata ne, kufumyakotu awa wafuuma kwi Lesa-aye wamona ba Taata. ⁴⁷ Kine, kine, awa waitabiila uji na buumi bwa myaaka. ⁴⁸ Amiiwa ne shiinkwa wa buumi. ⁴⁹ Basheenu bajiile maana muungyetu, kabiiji ba fwiile. ⁵⁰ Awe ye shiinkwa wiiya panshi kufuuma mwiulu, byonkabyo amba muuntu akoonshe kuujako biimo ne kufwa ne. ⁵¹ Amiiwa ne shiinkwa muumi awa waishile panshi kufuuma mwiulu. Inge uji yeense wajako ku uno shiinkwa, aye ukeekala myaaka. Shiinkwa ye nkapaana ye mubiiji waami wa buumi bwa ntanda." ⁵² Ba Yudea bazhiingijile mukachi kaabo beene kabiiji ba teendekele kupachika, amba, "Awe muuntu wakoonsha kwitupa byeepi mubiiji waanji amba tuuje?" ⁵³ Keepo Yesu wibambijile amba, "Kine, kine, inge ne kuuja ku mubiiji wa mwaana muuntu ne kabiiji ne kutooma mashi anji ne, keechi mukeekala na buumi mwi anweeba beene ne. ⁵⁴ Awa yeense uja mubiiji waami ne kutooma mashi ami uji na buumi bwa myaaka, kabiiji nkamubusha pa juuba jikapelako. ⁵⁵ Pakuuba mubiiji waami ko kaajo ka kiine, ne mashi ami byo byakutooma bya kiine. ⁵⁶ Awa uja mubiiji waami ne kutooma mashi ami wikala mwi amiiwa, ne amiiwa mwi aye. ⁵⁷ Ba Taata boomi byo bantumine amiiwa, kabiiji byo ngikala na maambo aba Taata, byonkabyo awa uja amiiwa, ukeekala maambo a amiiwa. ⁵⁸ Awe ye shiinkwa waiya panshi kufuuma kwiulu, keechi byajiile ba sheenu ne kufwa ne. Awa uja uno shiinkwa ukeekala myaaka." ⁵⁹ Mino Yesu wa ambiile bino biintu mu Shinagoga byo akifuunjishenga mu Kapenama. ⁶⁰ mino bavula mu baana ba bwaanga baumvwine bino ba ambile amba, "Jino jifunjisho jashupa, wakonsha kwijiswa ng'anyi?" ⁶¹ Yesu maambo wa yukile mwi aye mwiine amba baana baji ba bwaanga ba nyinyichilenga pa kino, wa ambile kwi abo, "Bino bimutuntwiisha nyi? ⁶² Bino kika inge mwamona mwaana muuntu keaye peulu kuya ko afumine sakyaangye? ⁶³ Ke mupashi ulenge kwiikalako. mubiji kafwako byo aleeta. Byaambo byo nemwaambijila ye mupashi kabiji bo buumi. ⁶⁴ Mino muuji bamo mwi anweeba babula kwitabila." Pakuuba wayukile kufuuma ku nteendekelo abo bamo bakoonsha kubula kwitabila kabiiji ne wajiinga wa kumusoolola aye. ⁶⁵ Wa ambile amba, "Ke na maambo a bino amba kyo na ambila kwi anweeba namba kafwaako nangwa umo wakoonsha kwiiya kwi amiiwa inge keechi kyapeewa kwi aye na ba Taata ne." ⁶⁶ Maambo a kino, baana baanji ba bwaanga bavula baile kabiiji balekele ne kweenda naanji. ⁶⁷ Kabiiji Yesu wa ambiile ku ba jikumi na babiji amba, "Ne anweeba keechi musaka kweenda ne amiiwa ne, mwasaka anweeba nyi?" ⁶⁸ Shimona Petelo wa mukuumbwile amba, "Nkambo, kwi ng'anyi ko tusa kuuya? Muuji na byaambo bya buumi bwa myaaka, ⁶⁹ kabiiji twaitabila ne kwiiya na kuyuka amba mwi wazhila wa Lesa." ⁷⁰ Yesa wi bambijile amba, "Nanchi keechi ne musajiile anweeba, ba jikumi na babiji, kabiiji umo mwi anweeba mulwaanyi ne nyi?" ⁷¹ Pano wa ambile pe Yudasa mwaana wakwa Shimona Isakaliyota, pakuuba wajiinga iye, umo mu bajikumi na babiji, wakukoonsha kumusolola Yesu.