¹ Yesu waile ku mutuumba wa Olobeeta. ² Lukeelo keelo aye waishile ku tempele jibiji, kabiiji ne baantu boonse baishile; aye waikeele paanshi ne kwi bafuunjisha. ³ Baneembeshi ne ba Faliseo ba letele mwaana mukazhi ye ba kwaachile sa oba bukeende. Ba mwikazhizhe pakachi. ⁴ Keepo ba ambile kwi aye amba, "Mufuunjishi, awe wamukazhi ba mukwaata sa oba bukeende. ⁵ Pano mu mizhilo, Mosesa witukambizhe kwaasa mabwe baantu ba byonka bye; musa kwaamba amba ka pe aye?" ⁶ Abo ba ambile bino mukuuba amba bateeye byonkabyo amba bakoonshe kwiikalapo na biintu bimo byo kumupeelamo maambo, mino Yesu wakunamijile paanshi ne kuneemba pa mushiji na munwe waanji. ⁷ Byo ba twajijile ku mwiipuzha meepuzho, aye waimeene ne kwaamba kwi abo amba, "Umo mwi anweeba wabula buubi, lekai ekale mutaanshi ku mwaasa jiibwe." ⁸ Kabiiji waikajile paanshi, ne kuneemba pa mushiji na munwe waanji. ⁹ Byo be kyuumvwine, bafumineko umo umo, kutatwiila ku bakuluupme. Kwapwa Yesu washajile buunke, ne wamukazhi wajiinga mukachi. ¹⁰ Yesu waimene ne ku mwaambile amba, "Ineetu, ba kukushinawina baji pi? Bushe kuji wakukuzhachisha nyi?" ¹¹ Aye wa ambile amba, "Kafwaako ne umo, Nkambo." Yesu wa ambile amba, "Nangwa amiiwa keechi na kuzhachisha obeewa ne. Yaanga kabiiji kukooba buubi jikwaabo ne."] ¹² Yesu wa ambile kwi abo jibiji, amba, "Amiiwa ne kyeeya kya pa ntaanda; awa undoondela keechi ukeenda mu mfiinshe ne mino ukeekala na kyeeya buumi." ¹³ Ba Faliseo ba ambile kwi aye amba, "Mushimuna pe anweeba beene; bukamonyi bweenu keechi bwa kiine ne." ¹⁴ Yesu wa kuumbwile ne kwi baambila amba, "Nangwa inge nshimuna pe amiiwa mwiine, bukamonyi bwaami bwa kiine. Amiiwa nayuuka ko nafuumine nangwa ko mbeena kuuya. ¹⁵ Anweeba muchiba maambo mwaila bu muuntu; amiiwa keechi nchibila nangwa umo ne. ¹⁶ Mino amiiwa inge na chiiba, bunchiba maambo bwaami bwa kiine maambo amiiwa keechi nji buunke ne, mino amiiwa nji na ba Taata ba ntumine. ¹⁷ Ee, ne mu mizhilo yeenu kyaneembwa amba bukamonyi bwa baantu babiji bwa kiine. ¹⁸ Amiiwa yami nshimuna pe amiiwa mwiine, ne ba Taata ba ntumine ba shimuna pe amiiwa." ¹⁹ Ba ambile kwi aye amba, "Baji kweepi ba Sheenu?" Yesu wa kuumbwile amba, "Anweeba keechi mwa ngyuuka amiiwa ne nangwa ba Taata ne; inge mwa ngyuukile amiiwa, mwakoonsha kuyuuka ne ba Taata naabo." ²⁰ Aye wa ambile bino byaambo mwa kulamina byo a fuunjishe mu tempele, kabiiji kafwaako nangwa umo wa mukwaachile ne maambo kiimye kyaanji keechi kya kifikile ne. ²¹ Byonkabyo aye wibaambijile amba, "Amiiwa mbeena kufumampo; anweeba mukaankeba amiiwa kabiiji mu kafwa mu buubi bweenu. Ko mbeena kuuya, keechi mwakoonsha kwiiya ne." ²² Ba Yudea ba ambile amba, "Bushe uke ipaya aye mwiine nyi? Bushe kyo kyo ambila amba, 'Ko mbeena kuuya anweeba keechi mwafwainwa kwiiya ne nyi'?" ²³ Yesu wa ambile kwi abo amba; Amiiwa nafuuma kwiulu. Anweeba mwiiba pano pa ntaanda. ²⁴ Byonka byo, amiiwa na amba kwi anweeba amba anweeba mukafwiila mu buubi bweenu. Pakuuba inge keechi mwaitaba amba ye amiiwa ne, mukafwiila mu buubi bweenu." ²⁵ Ba ambile byonkabyo kwi aye amba, "Naanchi obeewa wi ng'anyi?" Yesu wa ambile kwi abo amba, "Byo na amba kwi anweeba kufuuma ku nteendekelo. ²⁶ Amiiwa nji na biintu byavula bya kwaamba, ne bya kuchiiba maambo pe anweeba. Onkao maambo aye wantumine ye wa kiine; kabiiji ne biintu byo na umvwiine kufuuma kwi aye, abye biintu amiiwa ng'amba bino biintu ng'amba ku ntaanda." ²⁷ Abo keechi ba naumvwiishishe amba aye wa ambileenga kwi abo pe ba Taata. ²⁸ Yesu wa ambile amba, "Byo muka suuntula mwaana muuntu peulu, keepo muka yuuka amba yami iye, kabiiji amba amiiwa keechi nguba biintu amiiwa mwiine ne. ²⁹ Aye wantumine uji ne amiiwa, kabiiji keechi waansha buunke bwaami ne, mambo amiiwa joonse nguba bimutookesha aye." ³⁰ Yesu byo a ambilenga bino biintu, bavula baitabijile mwi aye. ³¹ Yesu wa ambile ku booba ba Yudea ba mwiitabijile aye amba, "Inge mwaikala mu byaambo byami, keepo mwi baana bami ba bwaanga kiine; ³² kabiiji mukayuuka ne bukiine, ne bukiine bukemikasulula anweeba." ³³ Ba mukuumbwile amba, "Atweeba twi ba mukisaka kyakwa Abalahama kabiiji keechi twaikala po kala bazha ba uji yeense ne; mwafwainwa kwaamba byeepi amba, 'Mukakasululwa'?" ³⁴ Yesu wi bakuumbwile amba, "Kiine, kiine, amiiwa ne mwaambila anweeba, yeense uleenga maambo ye muzha ku bundeenga maambo. ³⁵ Muzha keechi bwiikala mu nzuubo myaaka ne myaaka ne; mwaana wiikala myaaka ne myaaka. ³⁶ Onkao maambo, inge mwaana wimukasulula anweeba, mukakasuluka kiine. ³⁷ Amiiwa na yuuka amba anweeba mwi ba mu kisaka kya kwa Abalahama; mubeena kusaka kwiipaya amiiwa maambo byaambo byami keechi biji na mpuunzha mwi anweeba ne. ³⁸ Amiiwa ng'amba byo namona na ba Taata, kabiiji ne anweeba muuba byo mwa umvwiine ku ba sheenu." ³⁹ Ba kuumbwile ne ku mwaambila amba, "Sheetu Abalahama." Yesu wa ambile kwi abo amba, "Anweeba inge mwajiinga baana ba kwa Abalahama, mwafwainwa kuuba miingilo yakwa Abalahama. ⁴⁰ Mino, pano musaka kwiipaya amiiwa, muuntu wimubuula bukiine amiiwa bo naumvwiine kufuuma kwi Lesa. Abalahama keechi waubile biibye ne. ⁴¹ Anweeba muuba miingilo ya ba sheenu." Ba ambile kwi aye amba, "Atweeba keechi twasemekelwe mu bukeende ne; atweeba tuji na sheetu umo: Lesa." ⁴² Yesu wa ambile kwi abo amba, "Inge Lesa wajiinga sheenu, mwafwainwa ku muteemwa, pakuuba amiiwa nafuumine kwi Lesa kabiiji nji pano; pakuuba keechi naiya amiiwa mwiine ne, mino aye waantumine. ⁴³ Kiika kyo mubujila kuumvwa byaambo byaami? ke na maambo anweeba keechi mwafwainwa kuumvwa byaambo byami ne. ⁴⁴ Anweeba mwi ba sheenu, jabola, kabiiji mulaanguluka kuuba kusaka kwa sheenu. Aye wajiinga ngipaishi kufuuma ku nteendekelo kabiiji keechi wimana mu bukiine ne maambo keechi muji bukiine mwi aye ne. Inge wa amba bubela, aye waamba kufuuma ku byo aji maambo aye ye wabubela kabiiji shaanja bubela. ⁴⁵ Mino, maambo amiiwa ng'amba bya kiine, anweeba keechi muungitabila ne. ⁴⁶ Ng'anyi mwi anweeba unzhachisha na maambo amiiwa? Amiiwa inge ng'amba bya kiine, maambo ka kyo mubujila ku ngitabila? ⁴⁷ Awa wa kwa Lesa umvwa byaambo bya Lesa; anweeba keechi mwi byuumvwa ne maambo keechi mwi ba kwa Lesa ne." ⁴⁸ Ba Yudea ba kuumbwile ne kumwaambila amba, "Naanchi atweeba keechi twaamba kiine amba anweeba obeewa wi mwiina Samaliya kabiiji uji na ndemoona ne nyi?" ⁴⁹ Yesu wa kuumbwile amba, "Amiiwa keechi nji na ndemoona ne, mino amiiwa nnemeka ba Taata, kabiiji anweeba mu mpeelila. ⁵⁰ Amiiwa keechi nsaka lukuumo lwaami ne; kuji umo ubeena kusaka ne kuchiba. ⁵¹ Kiine, kiine, amiiwa ne mwaambila amba, inge uji yeense walama byaambo byaami, aye keechi ukamona lufu ne." ⁵² Ba Yudea ba ambile kwi aye amba, "Pano twayuuka amba uji na ndemoona. Abalahama ne ba ngauzhi ba fwiile; mino obeewa wa amba'mba, 'Inge uji yeense walama byaambo byaami, aye keechi ukatoompa lufu ne.' ⁵³ Obeewa keechi wakila sheetu Abalahama wafwiile ne, wakila nyi? Ba ngauzhi naabo bafwiile. Ubeena kwi leenga obeewa mwiine kwiikala ng;anyi?" ⁵⁴ Yesu wa kuumbwile amba, "Amiiwa inge netuumbijika amiiwa mwiine, lukuumo lwaami lwatuutu; ba Taata bo ba ntuumbijika amiiwa-pe aye ye mwaamba amba ye Lesa weenu. ⁵⁵ Anweeba keechi mwa ngyuuka ne, mino amiiwa na muyuuka aye. Inge amiiwa na amba'amba, 'Amiiwa keechi na muyuuka ne,' nafwainwa kwiikala noobe anweeba, wa bubela. Nangwa byonkabyo, amiiwa na muyuuka ne kulama byaambo byaanji. ⁵⁶ Sheenu Abalahama wasekejiile pa kumona juuba jami; aye wijimweene kabiiji wasaangalele." ⁵⁷ Ba Yudea ba ambile kwi aye amba, "Obeewa keechi wafikizha kala myaaka makumi atanu ne, kabiiji wa mumona Abalahama nyi?" ⁵⁸ Yesu wi baambijile amba, "Kiine, kiine, amiiwa ne mwaambila amba, Abalahama sa a kyaangye kwiikalako, amiiwa naji koonka." ⁵⁹ Keepo batoolele mabwe ne kumwaasa, mino Yesu wifile aye mwiine kabiiji walupukilemo mu teempele.