¹ Pano kwajiinga mu Faliseo wa jizhiina ja Nikodeema, ntangi wa ba Yudea. ² Awe muuntu waishile kwi Yesu bufuuku ne kwaamba amba kwi aye amba, "Labi, atweeba twayuuka amba anweeba mwi mufuunjishi wafumine kwi Lesa, pakuuba kwafwako nangwa umo wakoonsha kuuba biibye biyuukilo byo muuba anweeba ne poso Lesa uji naanji." ³ Yesu wa mukuumbwile aye amba, "Kiine, kiine, inge muuntu ne kuseemwa jibiji ne, aye keechi wakoonsha kumona bufumu bwa Lesa ne." ⁴ Nikodema wa ambile kwi aye amba, "Muuntu wakoonsha kuseemwa byeepi byo mukuluumpe? Aye keechi wakoonsha kutweela muunda ya inaanji jibiji ne kuseemwa ne, wakoonsha nyi?" ⁵ Yesu wakuumbwile amba, "Kiine, kiine, inge muuntu ne kuseemwa ku meema ne ku Mupashi ne, aye keechi wakoonsha kutweela mu bufumu bwa Lesa. ⁶ Akya kya seemwa ku mubiji ye mubiji, kabiiji akya kyaseemwa ku Mupashi ye Mupashi. ⁷ Keechi mukuumye byo na amba kwi anweeba ne, 'Anweeba mwafwainwa kuseemwa jibiji.' ⁸ Luvula upuupila koonse ko asaka; anweeba muumvwa kupuupa kwaanji, mino keechi muyuuka ko afuuma nangwa ko abeena kuuya ne. Byonkabyo byo biji ne boonse ba seemwa ku Mupashi." ⁹ Nikodema wakuumbwile ne kumwaambila aye amba, "Abino biintu byakoonsheka byeepi?" ¹⁰ Yesu wakuumbwile ne ku mwaambila amba, "Obeewa wi mufuunjishi wa Isalela, pakuuba obeewa keechi wi biyuuka bino biintu ne nyi? ¹¹ Kiine, kiine, amiiwa ne mwaambila anweeba amba, atweeba twaamba byo twayuuka, ne kushimuna pa byo twamona. Pakuuba anweeba keechi muswa bukamonyi bweetu ne. ¹² Inge amiiwa ne mibuujile pa biintu bya pa ntaanda kabiiji anweeba ne kwiitabila ne, mwakoonsha kwiitabila byeepi inge ne mibuujile pa biintu bya mwiulu? ¹³ Kafwako nangwa umo wakanjijilepo mwiulu kufumyako aye waikijile kufuuma mwiulu-Mwaana Muuntu. ¹⁴ Byonka byo a imikile Mosesa muloolo muungye, byonka byo ne mwaana muuntu byo a fwainwa kwimikwa peulu, ¹⁵ byonkabyo amba boonse betabila mwi aye bakoonshe kwiikala na buumi bwa myaaka. ¹⁶ Pakuuba Lesa byo a temweesha kyaalo, amba aye wapaine mwaananji yeenka wa umo, amba awa yeense witabila mwi aye keechi a konaike ne mino uji na buumi bwa myaaka. ¹⁷ Pakuuba Lesa keechi watumine mwaana mu ntaanda mu kuuba amba a kazhachishe ntaanda ne, mino mu kuuba amba a kapulushe ntaanda kupichila mwi aye. ¹⁸ Awa witabila mwi aye keechi wazhatwa ne, mino awa wabula kwiitabila wazhatwa kala maambo aye keechi waitabila mu jizhiina ja mwaana yeenka umotu wa Lesa ne. ¹⁹ Ae o ene maambo a bunchiba maambo: Kyeeya kya iya mu ntaanda, ne baantu ba temenweeko mfiinshi kukila kyeeya maambo byubilo byaabo byanjiinga bya tama. ²⁰ Pakuuba awa yeense uba byatama wapata kyeeya, kabiiji keechi wiiya ku kyeeya ne, byonka byo amba byubilo byaanji bikabule kusololwa. ²¹ Nangwa byonkabyo, aye uba bukiine wiiya ku kyeeya byonka byo amba kikoonshe kumweeka patooka amba byubilo byaanji byaubiwa mwi Lesa." ²² Panyuuma ya kino, Yesu ne baana baanji ba bwaanga baile mu kyaalo kya Yudea. Akwa wa ikajileko biimye bimo naabo kabiiji wa batishile. ²³ Pano Yoano naaye wa batishilenga mu Aenoona kwiipi na ku Salima maambo akwa kwajiinga meema avula. Baantu baishilenga kwi aye kabiji beba batishilenga, ²⁴ pakuuba Yoano waji kasa a kyaangye kutaiwa mu kaleya. ²⁵ Keepo kwabuukile mapata pakachi ka bamo baana ba bwaanga ba kwa Yoano ne mu Yudea pa maambo a kwi ovwa. ²⁶ Baile kwi Yoano ne ku mwaambila amba, "Labi, awa wajiinga neenu bushiiya bwa mukola wa Yodano, awa ye mwa shimwiinepo, talai, aye ubeena kubatisha, kabiiji ne boonse babeena kuuya kwi aye." ²⁷ Yoano wakuumbwile amba, "Muuntu keechi wakoonsha kutaambula biji byoonse ne poso kyapaanwa kwi aye kufuuma mwiulu. ²⁸ Anweeba beene mwakoonsha kushimuna byo na ambile amiiwa amba, 'Amiiwa keechi ne Kilishitu ne,' mino, 'Amiiwa natumwa kulutwe yaanji.' ²⁹ Musoongoshi ye mwiina musoongwa. Pano muluunda wa musoongwa, ke yeewa wimaana ne ku muumvwa aye, usekela biingi maambo a jiiwi ja musoongwa. Akye, keepo, kyaleenga lusekeelo lwaami kukumana. ³⁰ Aye wafwainwa kukizhapo, mino amiiwa nafwainwa kubweela muunshi. ³¹ Awa ufuuma peulu uji peulu ya boonse. Awa wafuma pa ntaanda ye wa pa ntaanda kabiiji waamba pa bya pa ntaanda. Awa wafuuma mwiulu wakiila boonse. ³² Aye ushimuna pa byo a mona ne kuumvwa, mino kafwaako nangwa umo uswa kushimuna kwaanji ne. ³³ Awa wataambula lushimuno lwaanji waitabila amba Lesa ye wa kiine. ³⁴ Pakuuba awa Lesa ye a tuuma waamba byaambo bya Lesa. Pakuuba aye keechi upaana Mupashi na kipimo ne. ³⁵ Shaanji wateemwa mwaananji kabiiji wapaana biintu byoonse mu mabooko anji. ³⁶ Awa witabila mu Mwaana uji na buumi bwa myaaka, mino awa uleengulula Mwaana keechi ukamona buumi ne, mino bukaji bwa Lesa bwiikala pe aye."