¹ Pano kyajiinga sa ki kyaangye kufika kijiilo kya lupitailo. Yesu wayuukile amba kimye kyaanji kya kufuuma pano pa ntaanda ne kuuya kwi ba shaanji. Byo ateemenwe baanji mwiine bajiinga muno mu ntaanda, aye wibatemenwe ne ku mpeelo. ² Pano jabola wikibiikijile jimo mu muchima wakwa Yudasa Isakaliota mwaana Shimona, ku musolola Yesu. Byonkabyo pakimye kya kijilo kya mabaanga, ³ Yesu-wayuukile amba ba Shaanji bapaana biintu byoonse mu mabooko anji kabiiji amba aye wafuumine kwi Lesxa kabiji wabweelelenga kwi Lesa- ⁴ waimene kufuuma ku kijiilo ne kufumyapo kyakuvwaala kyaanji kya peulu. Keepo washikwiile kisapi ne kwipoomba aye mwiine. ⁵ Kabiiji aye waitulwiijile meema mwa koowela ne kuteendeka koovwa maulu a baana baanji ba bwaanga ne kwi bashiimuna na kisapi kyo e poombelemo aye mwiine. ⁶ Aye waishile kwi Shimona Petelo, kabiiji Petelo wa ambile kwi aye amba, "Nkambo, musa koovwa maulu ami nyi?" ⁷ Yesu wakuumbwile ne ku mwaambila amba, "Byo mbeena kuuba luno keechi wikiyuuka luno ne, mino ukekiyuuka kulutwe." ⁸ Petelo wa mwambijile aye amba, "Anweeba keechi musa koovwa maulu ami ne." Yesu wamukuumbwile aye amba, "Inge nabula kukoovwa obeewa, keechi uji na lubaji ne amiiwa ne." ⁹ Shimona Petelo wa ambile kwi aye amba, "Nkambo, keechi moovwetu maulu ami ne, mino ne mabooko ami ne mutwee waami." ¹⁰ Yesu wa mwaambijile aye amba, "Awa wa ovwewa keechi uji na kyakukabila ne, kanaatu koovwa maulu anji, mino aye watooka kupwiijijika, mino keechi boonse." ¹¹ (Pakuuba Yesu wayuukile wakufwainwa ku musolola aye; kyo kyo a ambijile amba, "Keechi boonse bweenu mwatooka ne.") ¹² Byonka byo Yesu byo a ovwele maulu abo ne kutoola bivwaalo byaanji kabiiji waikajile paanshi jibiji, wi baambijile amba, "Bushe mwayuuka kyo ne mubila anweeba nyi? ¹³ Anweeba munteela amiiwa amba 'Mufuunjishi' ne 'Nkambo,' kabiiji mubeena kwaamba buloongo, maambo byo byonji amiiwa. ¹⁴ Inge amiiwa kabiiji, Nkambo ne Mufuunjishi, na ovwa maulu enu, ne anweeba mwafwainwa koovwa maulu a umo ne mukwaabo. ¹⁵ Pakuuba amiiwa ne muupa kya kumweenako byonkabyo amba ne anweeba mwafwainwa kuuba noobe byonka byo ne mubiijile anweeba. ¹⁶ Kiine, kiine, amiiwa ne mwaambila anweeba amba, wa mwiingilo keechi wakiila nkambo yaanji ne; nangwa watumwa kukila awa wamutumine ne. ¹⁷ Anweeba inge mwayuuka bino biintu, mwatookwa inge mwiibyuba. ¹⁸ Amiiwa keechi mbeena kwaamba pe anweeba boonse ne; Amiiwa nayuuka aba bo nasala-mino akino kiji bino mukuuba amba bineembelo bikafikizhiwa: 'Awa uja shiinkwa waami waimikile kashiko kaanji ne ku nsobweela amiiwa." ¹⁹ Amiiwa nemibuula kino luno sa kikyaangye kumweeka byonka byo amba byo kikamweeka, anweeba mukeetabe amba ye Amiiwa. ²⁰ Kiine, kiine, amiiwa ne mwaambila anweeba amba, awa yeense utaambwila ye natuma utaambwila amiiwa, kabiiji ne yeense untaambwila amiiwa utaambwila yeewa wa ntumine amiiwa." ²¹ Yesu byo a ambile bino, wakatazhiiwe mu mupashi. Aye washimwiine ne kwaamba amba, "Kiine, kiine, ne mwaambila anweeba amba umo mwi anweeba uka nsolola amiiwa." ²² Baana ba bwaanga betajile umo ne mukwaabo, sa balaanguluka ao ye a ambilengapo. ²³ Umo mu baana ba bwaanga, ao Yesu ye a teemwishe, walajile paanshi pa tebulu bushiiya bwa lubaji lwa Yesu. ²⁴ Shimona Petelo wa mulabwiile uno mwaana wa bwaanga ne kwaamba amba, "Mwiipuzhe ng'anyi ye abeena kwaambapo." ²⁵ Byonkabyo aye waseendalele jibiji mu bushiiya na kulubaji kwajiinga Yesu ne kwaamba kwi aye amba, "Nkambo, ye ng'anyi?" ²⁶ Keepo Yesu wakuumbwile amba, "Awa yeenka ye nsakutaanchila kitebu kya shiinkwa ne kumuupa." Byonkabyo byo a taanchile shiinkwa, wamupaine kwi Yudasa mwaana Shimona Isakailota. ²⁷ Kabiiji panyuuma ya shiinkwa, Sataana watweelele mwi aye, byonkabyo Yesu wa mwaambijile amba, "Kyo ubeena kuuba, kyuube bukiji." ²⁸ Pano kwafwaako walajile paanshi pa tebulu wayuukile kyo a ambijile kino kwi aye ne. ²⁹ Bamo balaangulukile amba, Yudasa byo ajiinnga na ka kyoola ka maali, Yesu waji kumwaambila amba, "Pota byo twasaka bya kijiilo," nangwa amba wafwainwa kupaana bimo kubakajilwa. ³⁰ Yudasa panyuuma ya kutaambula shiinkwa, aye walupukile paangye poonkapotu. Bwajiinga bufuku. ³¹ Yudasa byo aile, Yesu wa ambile amba, "Pano mwaana muuntu watuumbijikwa, kabiiji ne Lesa watuumbijikilwa mwi aye. ³² Inge Lesa watuumbijikilwa mwi aye, Lesa naaye ukatuumbijika mwaana mwi aye mwiine, kabiiji ukamutuumbijika poonkapotu. ³³ Baana ba bacheeche, amiiwa nkiji ne anweeba pa ka kimye keepi. anweeba mukakeeba amiiwa, kabiiji amiiwa byonkabyo na ambile ku ba Yudea amba, 'Ko mbeena kuuya, keechi mwakoonsha kwiiya ne.' Pano amiiwa na amba bino ne kwi anweeba. ³⁴ Amiiwa mbeena kwi muupa mukaambizho mupya, amba mwafwainwa kwiitemwa umo ne mukwaabo; byonkabyo ne mutemwa, byonkabyo ne anweeba mwafwainwa kwiitemwa umo ne mukwaabo. ³⁵ Na kino boonse bakayuuka amba anweeba mwi baana baami ba bwaanga, inge mwaikala na butemwe bwa umo ne mukwaabo." ³⁶ Shimona Petelo wa ambile kwi aye amba, "Nkambo, kweepi ko mubeena kuuya?" Yesu wakumbwiile amba, "Ko mbeena kuuya, keechi mwakoonsha ku ndoondela luno ne, mino mukandoondela kimye kikwaabo." ³⁷ Petelo wa ambile kwi aye amba, "Nkambo, kyo nakoonsha kubula kwi muloondela luuno? Amiiwa nkemutaila mweo waami anweeba." ³⁸ Yesu wakuumbwile amba, "Ukataaya mweo obe pe amiiwa nyi? Kiine, kiine, amiiwa nakwaambila obeewa amba, shikoombwe keechi akookole sa mukyaangye ku nkaana jisatu ne."