¹ kabiiji muuntu umo wa jizhiina ja Lazalasa wa kolelwe. Aye wajiinga mwiina Betani, muzhi wa kwa Maliya ne muloongo waanji Maata. ² Wajiinga Maliya awa washiingile Nkambo na maanyi anuunka buloongo ne kushiimuna maulu anji na nsuki yaanji, mwiina muloongo Lazalasa wakolelwe. ³ Keepo banyeenga yaanji batuumine jiiwi kwi Yesu, amba, "Nkambo, monai, ye mwatemwa wabeela." ⁴ Yesu byo ekyuumvwine, aye wa ambile amba, "Kino kikola keechi kya lufu ne, mino, kya lukuumo lwa Lesa amba Mwaana Lesa akoonshe kutuumbijikilwamo." ⁵ Mino Yesu wateemenwe Maata ne muloongo waanji Maliya ne Lazalasa. ⁶ Byonkabyo byo a umvwiine amba Lazalasa wabeela, Yesu waikajile mooba abiji mu mpuunzha moonka mo a jiinga. ⁷ Keepo panyuuma ya biino, aye wa ambile ku baana ba bwaanga amba, "Twayai ku Yudea jibiji." ⁸ Baana ba bwaanga bamwaambijile amba, "Labi, kataataka ba Yudea basikile kwi mwaasa mabwe anweeba, kabiiji mubeena kubweela koonka jibiji nyi?" ⁹ Yesu wakuumbwile amba, "Naanchi keechi kuuji ma awala jikumi na abiji a kyeeya mu juuba jiimo ne nyi? Inge muuntu waenda mu kiimye kya muute, aye keechi uketuuntula ne, maambo aye umona na kyeeya kya ino ntaanda. ¹⁰ Pano mino, inge waenda bufuuku, aye uketuuntula maambo kyeeya keechi kiiji mwi aye ne." ¹¹ Aye wa ambile bino biintu, kabiiji ne panyuuma ya bino biintu, aye wibaambijile amba, "Mukweetu Lazalasa waponeena mutuulo, mino amiiwa mbeena kuuya byonkabyo amba nkakoonshe ku mubuusha mutuulo." ¹² Baana ba bwaanga byonkabyo ba mwaambijile aye amba, "Nkambo, inge aye waponeena mutuulo, usakukoosa." ¹³ Pano Yesu wa ambilepo pa lufu lwaanji, mino abo balaangulukile amba wa ambileenga pa kulaala kwa kukookoloka. ¹⁴ Keepo Yesu wibaambijile patooka amba, "Lazalasa wafwa. ¹⁵ Amiiwa naseekela, na maambo a anweeba, maambo amiiwa keechi najiinga ko ne byonkabyo amba anweeba mukoonshe kwiitabila. Twayai kwi aye." ¹⁶ Tomashi, ao watelelwe amba Didimasa, wa ambile ku bakwaabo baana babwaanga amba, " Ne atweeba twaayai byonkabyo amba tukafwe ne Yesu." ¹⁷ Byo aishile Yesu, aye wataine amba Lazalasa wajiinga kaala mu kileende mooba ana. ¹⁸ Mino Betani wajiinga peepi na Yelusalema, peepi ma sitediya jikumi ne atanu. ¹⁹ Ba Yudea bavula baishile kwi Maata ne kwi Maliya, mu kwi batekeneesha pa muloongo wwabo. ²⁰ Keepo Maata, byo a umvwiine amba Yesu waishileenga, waile na kumukumanya aye, mino Mailya waikele mu nzuubo. ²¹ Maata keepo a ambile kwi Yesu amba, "Nkambo, inge mwajiinga kuuno, muloongo waami inge keechi wafwiile ne. ²² Nangwa luno, amiiwa nayuuka amba kyoonse kyo muloomba kwi Lesa, aye wimupa kyo." ²³ Yesu wa ambile kwi aye amba, "Muloongo weenu usa kubuuka jibiji." ²⁴ Maata wa mwaambijile aye amba, "Amiiwa nayuuka amba aye ukabuuka jibiji mu lusaanguko pa juuba jikapelako." ²⁵ Yesu wa mwaambijile amba, "Amiiwa yaami lusaanguko ne buumi; awa wiitabila mwi amiiwa, nangwa inge waafwa, ukamona buumi; ²⁶ kabiiji awa yeense muumi kabiiji waitabila mwi amiiwa keechi ukafwa ne. mwaitabila bino nyi?" ²⁷ Maata wa ambile kwi aye amba, "Ee, Nkambo, amiiwa naitabila amba anweeba mwi Kilishitu, Mwaana Lesa, ubeena kwiiya pano pa ntaanda." ²⁸ Byo a ambile bino, aye waile ne kwiita muloongo waanji Maliya kuumbaji. Wa ambile amba, "Mufuunjishi uji pano kabiiji ubeena kukwiita obeewa." ²⁹ Byo a umvwiine bino, waimeene bukiji ne kuuya kwi aye. ³⁰ Pano Yesu keechi wakifikile mu muzhi ne mino wakiijinga mu mpuunzha amo mo ba mutaine aye kwi Maata. ³¹ Pano ba Yudea, abo bajiinga naanji mu nzuubo kabiiji ba mutekenesheenga aye, ba mweene Maliya sa emana bukiji ne kuuya paangye, ba muloondejile, balaangulukile amba ubeena kuuya ku kileende na kujijila koonka, ³² Maliya byo afikile ku mpuunzha kwajiinga Yesu ne ku mumona aye, waponene paanshi pa maulu anji kabiiji wa ambile kwi aye amba, "Nkambo, inge mwajiinga kuno, muloongo waami inge keechi wafwiile ne." ³³ Yesu byo a mumweene sa ajiila, ne ba Yudea baishile naanji naabo sa bajiila, aye wajiijile mukachi ka mupashi waanji kabiiji wa umvwiine kutaama; ³⁴ aye wa ambile amba, "Kweepi ko mwa muzhiika?" Abo ba mwaambijile amba, "Nkambo, iyai mumone." ³⁵ Yesu wajijile. ³⁶ Keepo ba Yudea ba ambile amba, "Monai byo amuteemwishe Lazalasa!" ³⁷ Mino bamo mwi abo ba ambile amba, "Uno muuntu keechi, ye wa shiinkwile meeso a mpofu, keech wakoonsha kukaanya uno muuntu kufwa ne nyi?" ³⁸ Keepo Yesu jibiji, byo a umvwiine bulaanda mu kaachi kaanji mwiine, waile ku kileende. mino kyajiinga kya lukelo, kabiiji ba shiinkileko ne jiibwe. ³⁹ Yesu wa ambile amba, "Fumyaiko jiibwe." Maata, nyeenga yaanji Lazalasa, aye wafwiile, wa ambile kwi Yesu amba, "Nkambo, pa kiino kiimye mubiji kabola, pakuuba aye wafiile papita ne mooba ana." ⁴⁰ Yesu wa ambile kwi aye amba, "Naanchi amiiwa keechi na kwaambijile obeewa amba, inge waitabila, wakoonsha kumona lukuumo lwa Lesa ne nyi? ⁴¹ Byonka byo ne abo bafumishileko jiibwe. Yesu wainwiine meeso anji ne kwaamba amba, "Taata, ne musaanchila maambo mwa ng'umvwa amiiwa. ⁴² Amiiwa nayuukile amba bimye byoonse mu ng'umvwa amiiwa, mino ke na maambo a jibuumba ja nzhookoloka amiiwa kyo kyo na ambila bino, byonka byo amba bakoonshe kwiitabila amba anweeba mwaantuma amiiwa." ⁴³ Panyuuma ya kwaamba biino, aye wajiijile na jiiwi jikataampe amba, "Lazalasa, lupuka!" ⁴⁴ Muuntu wafwiile walupukile; maulu anji ne mabooko anji a poombelwe na bisapi, kabiiji ne pa meeso panji pa poombelwe na kisapi. Yesu wibaambijile abo amba, "Mukasuululai ayeenga." ⁴⁵ Keepo ba Yudea bavula baishile kwi Maliya kabiji bamweene Yesu byo a ubile, baitabile mwi aye. ⁴⁶ Mino bamo mwi abo baile ku ba Faliseo ne kwi babuula biintu byaubile Yesu. ⁴⁷ Kabiiji ba ng'anga bakataampe ne ba Faliseo ba pwiizhizhe kiije pamo ne kwaamba amba, "Tusa kuuba byeepi? Uno muuntu uba bimweesho bwavula. ⁴⁸ Inge atweeba tumuleke buunke byonkabye, boonse ba sa kwiitabila mwi aye; beena Loma bakeeya ne kwi tutaambula mpuunzha yeentu ne kyaalo kyeetu." ⁴⁹ Pano mino, muuntu umo mukaachi kaabo, Kaifasa, wajiinga ng'anga mukataampe mu yeewa mwaaka, wi baambijile abo amba, "Anweeba kafwaako kyo mwayuuka ne. ⁵⁰ Anweeba keechi mulaanguluka amba kimuwaamina anweeba amba muuntu umo wafwiila baantu kukila kyaalo kyoonse kyaonaika." ⁵¹ Pano kino kyo a ambile keechi kyafuumine kwi aye mwiine ne. Mino, byo ajiinga ng'anga mukataampe yeewa mwaaka, wa awiile amba Yesu wafwainwa kufwiila kyaalo; ⁵² kabiiji keechi kyaalo kyoonkatu ne, mino byonkabyo amba baana ba Lesa aba ba palaang'enamo bakoonshe kwibuungizha pamo mu bu umo. ⁵³ Byonka byo kufuuma jooja juuba abo ba umvwaang'ene mwa ku mwipaila Yesu. ⁵⁴ Yesu walekele kweenda patooka mukaachi ka ba Yudea, mino aye wafumineko kookwa ne kuuya mu kyaalo kwiipi mungyeetu mu muzhi uteelwa amba Efulemu. Waikeele koonka kwa na baana babwaanga. ⁵⁵ Pano kijiilo kyalupitailo kya ba Yudea kyajiinga peepi, kabiiji baavula baile ku Yelusalema kufuuma mu kyaalo kijiilo sa ki kyaangye kufiika amba ba ketookeshe abo beene. ⁵⁶ Abo ba kebeleenga Yesu, ne kwaamba umo ne mukwaabo byo baimeene mu jiteempele amba, "Mwa laangulukapo ka? Amba keechi ukeeya ku kijiilo ne nyi?" ⁵⁷ Pano ba ng'anga ba kataampe ne ba Faliseo bapaine mukaambizho amba inge uji yeense wayuukilepo kwajiinga Yesu, aye wakoonsha kubulang'ana pakuuba amba ba kakoonshe ku mukasa aye.