¹ "Kiine, kiine, amiiwa ne mwaambila anweeba amba, awa ubula kutweelela pa kibelo mu kipaka kya mimkooko, mino ukaanjijila paangi, awa muuntu ye ngivi kabiiji ye kapoondo. ² Awa utweelela pa kibelo ye kafuunga wa mikooko. ³ Ulama kibelo umushiinkwilako aye, ne mikooko yumvwa jiiwi jaanji, kabiiji aye wiita mikooko yaanji pa jizhiina ne kwi itaangijila paangye. ⁴ Byo eilupula paangye yaanji yoonse mwiine, aye uya paluutwe yaayo, kabiiji ne mikooko imuloondela aye, pakuuba ayo ya yuuka jiiwi jaanji. ⁵ Ayo keechi iloondela mweenyi ne mino imunyeema aye, pakuuba keechi yayuuka jiiwi ja mweenyi ne." ⁶ Yesu wa ambile kino kishiimpi kwi abo, mino abo keechi ba umvwiine bino biintu byo ebaambijilenga ne. ⁷ Keepo Yesu wibaambijile jibiji amba, "Kiine, kiine, amiiwa ne mwaambila anweeba naamba, amiiwa yaami kibelo kya mikooko. ⁸ Yeense waishile sa nkyaangye ye ngivi kabiiji kapoondo, mino mikooko keechi ibomvwiine abo ne. ⁹ Amiiwa ne kibelo. Inge uji yeense watweela mukaachi kupichila mwi amiiwa, aye ukapuluka; aye ukatweela mukaachi ne kulupuka paangye kabiiji ukatanaanga munyeemvu. ¹⁰ Ngivi keechi wiiyatu ne poso mu kwiiba ne mu kwiipaya kabiiji ne konauna. Amiiwa naiya byonkabyo amba beekale na buumi kabiiji kwiikala naabo bwavujisha. ¹¹ Amiiwa ne kafuunga wawaama.. Kafuunga wawaama weelela mweo waanji mikooko. ¹² Wa mwiingilo wa kwaashima keechi kafuunga ne kabiiji keechi mwiina mikooko ne. Aye umona musuka sa eya kabiiji uleka mikooko ne kunyeema, kabiiji ne musuka wi ikwaata ne kwi ipalaang'anya. ¹³ Aye unyeema maambo wa mwiingilo wa kwaashima kabiiji keechi uteya muchiima ku mikooko ne. ¹⁴ Amiiwa ne kafuunga wawaama, kabiiji amiiwa nayuuka baami, ne baami bangyuuka amiiwa. ¹⁵ Ba Taata ba ngyuuka amiiwa, ne amiiwa ne bayuuka ba Taata, kabiiji amiiwa ngeelela mweo waami mikooko. ¹⁶ Amiiwa nji na mikooko ikwaabo ayo yabula ya kukino kipaka. Amiiwa nafwainwa kwi ileeta naayo, kabiiji naayo ikoomvwa jiiwi jaami pakuuba byonka byo amba ku keekale kipanyi kiimo ne kafuunga umo. ¹⁷ Kino kyo kyo bantemenwa ba Taata amiiwa: Amiiwa neyeelela mweo byonka byo amba nkakoonshe kwi itaambula jibiji. ¹⁸ Kafwaako nangwa umo wiyaangata kwi amiiwa ne, mino amiiwa mwiine ne yeelela. Amiiwa nji na luusa lwa kwi ilaajika paashi, kabiiji nji na luusa lwa kwi ibuusha jibiji. Amiiwa nataambwile uno mukaambizho kufuuma ku ba Taata." ¹⁹ Lwabano lwa mweekele jibiji mukaachi ka ba Yudea maambo a bino byaambo. ²⁰ Bavula ba ambile amba, "Aye uji na ndeemona kabiiji wakonya. Kiki kyo mu mumvwiina?" ²¹ Bakwaabo ba ambile amba, "Bino keechi byaambo bya muuntu uji na ba ndeemona ne. Naanchi ndeemona wakoonsha kulabisha meeso a mpofu nyi?" ²² Kabiiji kyajiinga kiimye kya kijiilo kya kivuluko mu Yelusalema. Kyajiinga kiimye kya mashiika, ²³ kabiiji Yesu waendeleenga mu jiteempele mu mubukoonde bwa kwa Solomoni. ²⁴ Keepo ba Yudea ba muzhookolokele aye kabiiji ne ku mwaambila amba, "Mooba anga o tusa kukuzhinauka naanchi? Inge yoobe Kilishitu, tubuule patooka." ²⁵ Yesu wibakuumbwile amba, "Amiiwa ne mubujile anweeba, mino keechi mwaitabile ne. Miingilo yo nguba mu jizhiina ja ba Taata, abino bishimunabpe amiiwa. ²⁶ Mino anweeba keechi mwaitabile ne maambo anweeba keechi mwi mikooko yami ne. ²⁷ Mikooko yaami yuumvwa jiiwi jami; ne amiiwa ne iyuuka, kabiiji naayo indoondela amiiwa. ²⁸ Amiiwa neipa buumi bwa myaaka; ayo keechi ikafwa ne, kabiiji kafwaako nangwa umo ukeisoompola mu kubooko kwaami ne. ²⁹ Ba Taata, abo be impeele yo amiiwa, bakila boonse bakwaabo, kabiiji kafwaako nangwa umo wakoonsha kwi isoompola mu kubooko kwa ba Taata ne. ³⁰ Amiiwa ne ba Taata twi umo." ³¹ Keepo ba Yudea batoolele jibiji mabwe amba ba mwaase. ³² Yesu wibakuumbwile amba, "Amiiwa ne mumweesha anweeba miingilo yawaama yavula kufuuma kwi ba Taata. Pakuuba mwiingila ka ye mubeena ku ngashila mabwe amiiwa?" ³³ Ba Yudea ba mukuumbwile amba, "Atweeba keechi tubeena kwi mwashila mabwe anweeba pa mwiingilo wawaama uji yeense ne, mino na maambo a mweenga, maambo obeewwa, wi muuntu, wiipa bu Lesa." ³⁴ Yesu wi bakuumbwile amba, "Naanchi keechi kyaneembwa mu mizhilo yeenu amba, 'Na ambile amba, "Anweeba mwi tuba lesa ne nyi?"' ³⁵ Inge wi bateelele amba tu ba lesa, ku ba ng'anyi ko byaishile byaambo bya Lesa(kabiiji ne bineembelo keechi byakoonsha kuzhilululwa ne), ³⁶ naanchi anweeba mwaamba ku yeewa ye batuujile paambaji ba Taata ne ku mutuma pano pa ntaanda amba, 'Ubeena kuuba mweenga,' maambo amiiwa na ambile amba, Amiiwa ne Mwaana Lesa nyi?' ³⁷ Inge amiiwa keechi mbeena kuuba miingilo ya ba Taata ne, ku ngitabila ne. ³⁸ Mino inge mbeena kwi yuuba, nangwa mwabula ku ngitabila amiiwa, itabilai mu miingilo byonkabyo amba mukoonshe kuyuuka ne kuyuukisha amba ba Taata ba mwi amiiwa kabiiji amba amiiwa nji mwi ba Taata." ³⁹ Abo baesekela ku mukwaata aye jibiji, mino aye waile kufuuma mu mabooko abo. ⁴⁰ Aye waile jibiji kukiila ne ku Yodano ku mpuunzha ko a batishileenga Yoano pataanshi, kabiiji waikajile koonka. ⁴¹ Baantu bavula baishile kwi aye kabiiji ba ambile amba, "Kya kiine Yoano keechi waubilepo bimweesho ne, mino biintu byoonse byo a ambile Yoano pa uno muuntu byo bya kiine." ⁴² Baantu bavula baitabijile mwi aye koonka kwa.