¹ Pano kishina kya byo tubeena kwaamba ke kino: Atweeba tuji na ng'anga mukataampe ao waikala paanshi ku kubooko kwa kiluujo kwa kipona kya bufumu mu meulu. ² Aye ye wa mwiingilo moomwa mwazhila, teente wa kiine wa Nkambo, keechi muuntu, wa mupaangile ne. ³ Pakuuba ng'aanga mukataampe yeense utoongolwa ku kupaana byabupe ne bitapisho pamo. Onkao maambo kyamufwainwa ne uno kwiikala na kya kulaambula. ⁴ Pano inge Kilishitu wajiinga pa ntaanda, aye inge keechi wakoonsheshe kwiikala na ng'anga ne, kasa paji kala booba ba kulaambula milaambu mwaila muzhilo. ⁵ Abo beengijila kifwaanyikizho ne kiimvule kya biintu bya mwiulu. Kiji byonka byajiinga Mosesa byo ba mufuunjile kwi Lesa byo a kiji sa akyaangye kuleenga yeewa teente: Lesa wa ambile amba, "Umone amba obeewa waleenga byoonse biintu mwaila akya kya kumweenako akya kyo nakumweesheshe obeewa pa mutuumba." ⁶ Mino aluno Kilishitu wataambwile mwiingilo wa waamisha, byonka byo aji aye wakuloondela mulaye wa waama, aye waimana pa milaye ya waama. ⁷ Pakuuba inge lulayang'ano lutaanshi lwajiinga lwa luumbuluka, inge keechi pasakilwe ne lwa bubiji ne. ⁸ Pakuuba Lesa byo ataine buumbulwa kuluumbuluka na baantu, aye wa ambile amba, "Talai, mooba abeena kwiiya -byo bya amba Nkambo-amba byonkalenga lulayaang'ano lupya na ba mu nzuubo ya Isalela ne ba mu nzuubo ya Yuda. ⁹ Keechi kikeekale noobe lulayaang'ano lo na leengele na bashaakulu baabo pa juuba jo ne baseendele na kwibakwaata pa kubooko kwaabo mukwibafumya mu ntaanda ya Ijipita. Pakuuba abo keechi baikajile na kukookele lulayaang'ano lwaami ne, ne amiiwa ne basuujile-byo bya amba Nkambo. ¹⁰ Aluno lo lulayaang'ano lo nsakulayaang'ana na ba mu nzuubo ya Isalela panyuuma ya oa mooba-byo bya amba Nkambo. Amiiwa nkabiika mizhilo yaami mu milaangwe yaabo, kabiji nkeineemba ne pa michima yaabo. Amiiwa nkeekala Lesa waabo, ne abo bakeekala baantu baami. ¹¹ Abo keechi bakefuunjisja umo ne mukwaabo mobeekela mu ntaanda imo ne kabiji mukwaabo muloongo waanji, amba, 'Muyuukai Nkambo.' Pakuuba boonse ba kangyuuka amiiwa, kutatwiila ku basuulwa kufika ne ku bakila kuneema. ¹² Pakuuba amiiwa nkooba lusa ku byuubilo byaabo biipa, kabiji buundenga maambo bwaabo amiiwa keechi ke buvuuluka jikwaabo ne." ¹³ Pa kuteela luno lulayaang'ano amba, "Lupya," aye wa swiishishe lulayaang'ano lutaanshi kwiikala lwasuulwa, kabiji alwa lwaikala ke lwasuulwa ne kubaanda kukazhimang'ana bukiji.