¹ Wajiinga aye uno Melekizedeki, mfumu wa ku Salema, ng'anga wa Lesa mwiine wakila, wasambakene Abalama kasa afuma ko akatapile mafumu kabiji wa wamupeesheshe aye. ² Ko kwi aye Abalama ko a paine kya bujikumi kya biintu byoonse. Pataanshi, kutuuntulula kwa jizhina jaanji kuluumbulula amba, "Mfumu wa baoloka"; pano aye ye "mfumu wa ku Salema," ko kuuba amba, "mfumu wa muteende." ³ Aye ye waubula bashaanji, bainaanji, bashaakulu, wabula nteendekelo ya mooba naangwa mpeelo ya buumi. Kabiji kasa a pasha Mwaana Lesa, aye waikala ng'anga myaaka ne myaaka. ⁴ Monai buneeme bo ajiinga naabo uno muuntu ku mushaakulu Abalama ko a paine kya bujikumi kya pa biintu byo a taambwile mu nkoondo. ⁵ Baana ba kwa Levi bataambwile bu ng'anga baji na mukaambizho mwaila muzhilo wakutaambula bya bujikumi ku baantu, ko kuuba amba, kufuma kubaloongo baabo, naangwa abo, naabo, bafumine ku kisemi kya kwa Abalama. ⁶ Mino Melekizedeki, uji na mushaakulu wa bujile kufuma mwi abo, wataambwile bya bujikumi kwi Abalama, kabiiji wamupeesheshe aye, awa wajiinga na milaye. ⁷ Kafwaako waluba amba muuntu wabula muneema upeeshiwa ku muuntu uji na muneema mukataampe. ⁸ Mu ano maambo, baantu baafwa bataambula bya bujikumi, mino mu o a maambo kishimuna kuuba amba ukiji na buumi. ⁹ Kabiji, mwaila ng'aambilo, Levi, wataambwile bya bujikumi, ne aye wapaine bya bujikumi kupichila mwi Abalama, ¹⁰ maambo Levi wajiinga mu mubiji wa mushaakulu waanji Melekizedeki byo a saambakene Abalama. ¹¹ Pano kuluumbuluka inge kwakoonshekele kupichila mu bu ng'anga bwa beena Levi (pakuuba mukino baantu bataambwile mizhilo), kukajilwa ka kukwaabo kwa koonsheshe kwiikalako pakuuba amba ng'anga mukwaabo emane wa musaango wa kwa Melekizedeki, kabiji ne kuyuukanyikwa ne musaango wa kwa Alona ne nyi? ¹² Pakuuba bu ng'anga inge bwa kiingishiwa, ne muzhilo wafwainwa kukiingya. ¹³ Pakuuba pe aye ye ba ambilepo bino biintu ye wa mukisaka kikwaabo, amo mwabula naangwa umo wa ingijilepo pa kya kusookelapo bitaposho. ¹⁴ Pano kyaluumbuluka amba Nkambo yeetu wasemenwe mukisaka kya Yuda, kisaka kyo a bujile kuteelapo Mosesa na maambo a ba ng'anga. ¹⁵ Byo twaamba atweeba bya umvwanyike ne kuumvwanyika inge ng'anga mukwaabo waimana mu kipasha kya kwa Melekizedeki. ¹⁶ Uno waikele ng'anga, keechi na mwaila muzhilo wa bisakiwa ku mubiji ne, mino na bulume bwa buumi bwa myaaka. ¹⁷ Pakuuba bineembelo bipaana bukamonyi pe aye amba: "Obeewa wi ng'anga myaaka moonka mwaijile bwakwa Melekizedeki." ¹⁸ Pakuuba keechi kufumyapotu mukaambizho wakala ne maambo wanekena kabiji ye watuutu- ¹⁹ pakuuba muzhilo keechi watookeshelepo kiintu ne-mino ne luketekelo lwafwainwa belupiingishapo, amo mo twiishila kubwiipi kwi Lesa. ²⁰ Kabiji keechi kyajiinga kwakubula luchipo ne! Bakwaabo baikele ba ng'anga kwakubula luchipo luji loonse ne, ²¹ mino aye waikele ng'anga na luchipo na yeewa wa ambile kwi aye amba, "Aye Nkambo wachipa kabiiji aye keechi ukaluka ne: 'Obeewa wi ng'anga myaaka ne myaaka."' ²² Nakino kabiji Yesu wapana mulaye wa lulayaang'ano lwa waamisha. ²³ Ba ng'anga bajiiko bavujile mu naambala, maambo lufu lwiibakashile kwiikala mu mwiingilo. ²⁴ Mino maambo Yesu watwajijila kwiikala myaaka, uji na bung'anga bubula kupwa. ²⁵ Onkao maambo aye wakoonsha kupulusha kupwiijijika aba beeya kwi Lesa kupichila mwi aye, maambo aye joonse wiikala na kwi baloombelelako abo. ²⁶ Pakuuba kifikijilemo kya kiine amba twafwainwa kwiikala na ng'anga mukataampe wa byonkabye, wazhila, wabula kaneeneno, watooka, wafumishiwako ku baandenga maambo, wasuuntulwa peulu ya meulu. ²⁷ Aye keechi ukajilwa, noobe ba ng'anga bakataampe ne, ku kupaana bitapisha mooba onse ne, pataanshi wa buundenga maambo anji, kabiji keepo wa buundenga maambo bwa baantu. Aye waubile kino jimootu kyaapwa byo e laambwile aye mwiine. ²⁸ Pakuuba muzhilo utoongola noobe baantu ng'anga bakataampe bayuuka ku nekena. Mino byaambo bya luchipo, byaishile panyuuma ya muzhilo, byatoongwele Mwaana, ao watookeshiwa myaaka.