¹ Onkao maambo, mulaaye wakutweela mwaanji mwa kukookolokela byo a kiswiishiwa kwiimana, lekai atweeba tuchiine, byonka byo amba keechi naangwa umo mwi anweeba a mweeke kupelelela ku kino ne. ² Pakuuba betubuujile maambo awaama byonka byo bebabujile abo. Mino a a maambo keechi e bakwashishe aba babujile kukwaantankana mu lwiitabilo na booba ba kookejile ne. ³ Pakuuba atweeba twaitabila tukatweela moomwa mwa kukookolokela, byonka byo a ambile aye amba, "Byo nachipile mu bukaji bwaami, Keechi ba katweela mwaami mwa kukookolokela ne." Naangwa byonka byo, miingilo yaanji yapwiile kufuuma ku kiteendekesha kya ntaanda. ⁴ Pakuuba aye wa amba kuuntu kumo pa juuba ja butaanu na abiji amba: "Kabiiji Lesa wakookolokele pa juuba ja butaanu na abiji ku miingilo yaanji yoonse." ⁵ Kabiiji ne jikwaabo mu kyoonka kino kibaaba aye wa ambile amba, "Abo keechi bakatweela mwaami mwa kukookolokela ne." ⁶ Onkao maambo, kyashaajila bamo kutweela amwa mwa kukookolokela, kabiji aba bajiinga na maambo awaama panyuuma kacheeche basapwiijile kwi abo keechi batwelele ne maambo a mileengulwila yaabo. ⁷ Byonka byo Lesa watoongwele jibiji juuba jimo, ne kwijiteela amba "Leelo," aye byo a ambile kupichila mwi Davida byavula paluutwe kacheeche mu byaambo bya neembwa kala amba: "Leelo inge mwaumvwa jiiwi jaanji, kukosesha michima yeenu ne." ⁸ Paakuuba inge Yoshiwa wibapeele mwakukookolokela, Lesa keechi wakoonsha kwaamba pa juuba jikwaabo ne. ⁹ Byonka byo kwashaala Sabaado wakukookoloka walaminwa baantu ba Lesa. ¹⁰ Pakuuba awa utweela mwa kukookolokela mwa Lesa aye wakookoloka ne ku miingilo yaanji mwiine, byonka byo aubile Lesa ku yaanji. ¹¹ Onkao maambo lekai tusakishe kutweela moomwa mwa kukookolokela, byonka byo amba naangwa umo akabule kuponena mu yeewa musaango wa mileengulwila yo baubile. ¹² Pakuuba byaambo bya Lesa byo byuumi kabiji bingila kabiji byatwiisha kukila mbaji ibiji ya mpooko. Ichibaula naangwa ku kwabanya mweo ne mupashi, manuungi nae bikuupa, kabiiji aye wakoonsha kusolola milaangwe ne kusaka kwa muchima. ¹³ Kafwaako kiintu kyaleengwa kyafyamika ku meeso a Lesa ne, mino biintu byoonse biji patooka ne kumweeka ku meeso a yeewa yetukakoonsha kuluumbulwilanga. ¹⁴ Byonka byo, byo tuji na ng'anga mukataampe wakila aye wapichile kupichila mwiulu, Yesu mwaana Lesa, lekai atweeba tukakachile ku kwisolola kweetu. ¹⁵ Pakuuba atweeba keechi tuji na ng'anga mukataampe wakoonsha kubula kuumvwa lusa lwa kunekena kweetu ne. Mino, tuji na umo waesekwa mu mashiinda onse noobe atweeba, kufumyakotu maambo aye keechi uji na buundenga maambo ne. ¹⁶ Lekai atweeba pano tuye na kuchiinchika ku kipona kya buupe, byonka byo amba tukakoonshe kutaambula lusa ne kutaana buupe bwa kwitukwaasha mu kimye kya kukajilwa.