¹ Byonkabyo, baloongo bazhila, mushilang'ena lwiito lwa mwiulu. Langulukai pe Yesu, aye mutumwa kabiiji ng'anga mukataampe wa kwiisololako atweeba. ² Aye wajiinga wakishiinka kwi Lesa, aye wamutoongwele aye, byonka byajiinga wakishiinka Mosesa mukachi ka nzuubo ya Lesa moonse. ³ Pakuuba Yesu wateelwa amba wafikilaamo mu lukuumo lukataampe kukiila Mosesa, maambo awa ushimiika nzuubo uji na muneema kukiila nzuubo ine. ⁴ Pakuuba nzuubo yoonse ishiikwa na muuntu, mino ushimiika byoonse ye Lesa. ⁵ Pakuuba aye Mosesa wajiinga wakishiinka noobe wamwiingilo mukachi ka nzuubo ya Lesa moonse, kwiimenako bukamonyi pa biintu abya byakonsheshe kwiikala ke byakwaambapo kulutwe. ⁶ Mino Kilishitu ye wakishiinka noobe Mwaana uji na luusa lwa nzuubo ya Lesa. Atweeba twi nzuubo yaanji inge twakakachila ku kuchiinchika kweetu ne luketekelo alo lo twiitotelamo atweeba. ⁷ Byonkabyo, kiji byoonka bya amba Mupashi Wazhila: "Leelo, inge mwaumvwa jiiwi jaanji ⁸ kukosesha michima yeenu noobe mu nkoondo ne, mu bimye bya meeseko muungyetu. ⁹ Akino kyajiinga bashaakulu beenu byo baansatukijile na kungeseka amiiwa, panyuuma yakumona byuubilo byaami pa myaaka makumi ana. ¹⁰ Byonkabyo amiiwa na zhiingijile kino kisaka, Amiiwa na ambile naamba, 'Bimye byoonse baaya muungi mu michima yaabo. Abo keechi bayuuka mashiinda ami ne.' ¹¹ Kikijitu noobe byonka byo nachipile na bukaji bwaami: 'Abo keechi bakatweela mwaami mwakukookolokela ne."' ¹² Jimukai, baloongo baami, kyakuuba amba bubule naangwa umo mwi anweeba uji na muchima wabiipa wabula lwiitabilo, muchima waluka kufuuma kwi Lesa. ¹³ Mino ikoseshai umo ne mukwaabo mooba onse, naangwa jateelwa amba "leelo," byonka byo amba keechi naangwa umo mwi anweeba anemenwe na bujiimbi jiimbi bwa bubi ne. ¹⁴ Pakuuba atweeba twaikala mu mwiingilo umo wa Kilishitu inge atweeba twakakachila ku luketekelo lweetu mwi aye kufuuma ku nteendekelo kufiika ne kuumpelo. ¹⁵ Pa kino kya ambiiwa amba, "Leelo, inge mwaumvwa jiiwi jaanji, kukosesha michima yeenu ne, noobe mu kusatuka ne." ¹⁶ Wajiinga ng'anyi wa muumvwine Lesa ne kusatuka? Naanchi keechi bajiinga aba boonse bafumine mu Ijipita kupichila mwi Mosesa ne nyi? ¹⁷ Na ng'anyi ye a zhiingijile myaaka makumi ana? Naanchi keechi bajiinga aba baleengele maambo, beena mibiji yafwiile ya ponejile muungyetu ne nyi? ¹⁸ Kwi ng'anyi ko twachipile amba abo keechi bakatweela mwaanji mwakukookolokela, inge keechi kyajiinga ku booba ba musuujile aye? ¹⁹ Atweeba twamona kuuba amba abo keechi bakoonsheshe kutweela mwaanji mwakukookolokela ne maambo a kubula kwiitabila.