¹ Onkao maambo twafwainwa kuteeshako maana ku byo twaumvwa, byonka byo amba tubule kufumako. ² Pakuuba inge byaambo abya bya ambiwe kupichila mu ba malaika bya luumbulukile buloongo, kabiiji ne mizhilulwiila yoonse ne mileengulwila yoonse itaanbula mfweeto yafwainwa, ³ twafwainwa byeepi kunyeema inge atweeba twasuula luno lupulukilo lukataampe? Luno lo lupulukilo lwabibijikilwe pataanshi na Nkaambo kabiiji be tuluumbulwiljile kubooba be luumvwine. ⁴ Pakimye kimootu Lesa wilushimwiine na byuubilo, bya kukumya, kabiiji ne na bya kukumya byavula, ne na kwabanya bya buupe bya Mupashi Wazhila mwaila kyaswa muchima waanji. ⁵ Pakuuba keechi kyajiinga ku ba malaika amba Lesa ko a ambile ntaanda kwiishila ne, pa byo tubeena kwaambapo. ⁶ Mino muuntu umo washimwine paantu pamo, amba, "Muuntu ye ng'anyi, byo mwamuta muchima aye? Naangwa mwaana muuntu, byo mumulama buloongo aye? ⁷ Anweeba mwaleengele muuntu muunshi pacheeche kukila ba malaika; anweeba mwa muvwiikile lukumo ne muneema. ⁸ Anweeba mubiika biintu byoonse mu lukookelo muunshi ya maulu anji." Pakuuba kwi aye Lesa koko apaine biintu byoonse. Aye keechi washiilepo kiji kyoonse kyabujile kwiipana kwi aye ne. Pano luno atweeba keechi tumona biintu byoonse kwiibipana kwi aye ne. ⁹ Mino atweeba tumumona aye waleengelwe muunshi kukiila ba malaika kimye kicheeche, Yesu, kasa avwiikwa na lukuumo ne muneema maambo a kumanama kwaanji kabiiji ne lufu lwaanji, byonka byo amba na buupe bwa Lesa aye akoonshe kutoompa lufu lwa muuntu yeense. ¹⁰ Kyamufwainwe aye Lesa, mambo byonse bya ikelako aye kabiji kupichila mwi aye, mukuleeta baana bavula ku lukuumo. Kyamufwainwe aye kuleenga nsulo ya lupulukilo lwaabo kupwa kupichila mu kumanama kwaanji. ¹¹ Pakuuba boonse awa uzhijika kabiji ne booba bazhijikwa baji na nsuulo imo. Byonka byo aye keechi umvwa buumvu kwiibeta abo amba baloongo baanji ne. ¹² Aye waamba amba, "Amiiwa nkashimuna jizhina jeenu ku baloongo baami, amiiwa nkeemba pe anweeba mukachi ka kipwiilo." ¹³ Ne jikwaabo, "Amiiwa nkaketekela mwi aye." Ne jikwaabo, "Talai, amiiwa bano kabiiji ne baana abo Lesa boampa." ¹⁴ Onkao maambo, baana byo bashilang'ena mu mubiji ne mashi, aye naaye washilang'ene mu byo byo biintu mujishiinda jimootu, byonka byo amba kupichila mu lufu aye akoonshe konauna awa uji na buluume bya lufu, ao ye, jabola. ¹⁵ Akino kyajiinga byonka byo amba aye akoonshe kukasuulula aba boonse kupichila mu mooyo wa kwakamwa lufu baikajile buumi bwaabo boonse mu kwiipana ku buzha. ¹⁶ Kya kiine keechi ba malaika bo akwaasha aye ne, mino baana bakwa Abalahama. ¹⁷ Naanchi kyamufwainwe aye kwiikala noobe baloongo baanji mu mashiinda onsetu, byonka byo amba afwainwe kiikala ke walusa kabiiji ng'anga mukataampe wa lwiitabilo mu muluumvwang'ano lwa ku biintu bya Lesa, kabiiji amba aye akoonshe kwiikala ke mfuuto ya maambo a baantu. ¹⁸ Maambo Yesu mwiine wayaanjile kabiiji waesekelwe, aye wakoonsha kukwaasha aba baesekwa.