¹ Pakuuba na bwaana bwa beene Kilishitu witukasulula atweeba. Imanai sa mwakosa, onkao maambo, kabiiji keechi mwiikale jibiji mu kwipaana ku kikoonkoji kya buzha ne. ² Talai, amiiwa, Paulo, ne mwaambila anweeba amba inge mwataambula mukaanda anweeba beene, Kilishitu keechi ukamweenamo mwi anweeba mu jishiinda jiji joonse ne. ³ Amiiwa na amba jibiji ku muuntu yeense utaambula mukaanda mwiine amba aye wakaambizhiwa kukookela mizhilo yoonse. ⁴ Anweeeba mwachibiwako kwi Kilishitu, anweeba mu kakoonsha mukabiingishiwa na mizhilo; anweeba keechi mumonapo buupe jibiji ne. ⁵ Pakuuba kupichila mu Mupashi, na lwiitabilo, atweeba tupeembela luketekelo lwa bololoke. ⁶ Mwi Kilishitu Yesu ba mukaanda nangwa babula mukaanda baneema, mino lwiitabilotu loonka lwiingila kupichila mu butemwe. ⁷ Anweeba mwanyemenenga buloongo. Ng'anyi wi kanyishile kukookelanga bukiine? ⁸ Abuno boongozhi keechi bufuuma kwi aye wi mwiita anweeba ne! ⁹ Mbizhi icheeche tu tutumwiisha mushiinshi yeense. ¹⁰ Amiiwa nji na luketekelo mwi Nkambo amba keechi mukalaangulukapo byapusana ne. Awa ubeena kwi mukatazha ukamanama na bunchiba maambo, nangwa ye wa byeepi. ¹¹ Baloongo baami, amiiwa inge nkisapwiila maambo a mukaanda, kika kyo nkimanyikilwa? Na byonka bino jiibwe ja kwituuntulako ja musalabu bejifuumyako. ¹² Ku booba babeena ku kukatazha obeewa, nasaka abo kukoonsha kwichibako! ¹³ Pakuuba anweeba mwaichilwe ku bwaana bwa beene, baloogo baami. Mino keechi mwiingijishe bwaana bwa beene bweenu noobe jishiinda ja buuntunshi ne; poso, kipichila mu butemwe bwa kwiingijila umo ne mukwaabo. ¹⁴ Pakuuba mizhilo yoonse yafikizhiwa mu kyaambo kimo amba: "Wafwainwa kutemwa mukweenu byonka byo witemwa obeewa mwiine." ¹⁵ Mino inge mwiisuma ne kwiija umo ne mukwaabo, jimukai kuuba amba keechi mwiija umo ne mukwaabo ne. ¹⁶ Mino amiiwa na amba'mba, endai na Mupashi kabiiji keechi mukooba bya lwiiso lwa buuntunshi ne. ¹⁷ Pakuuba lusako lwa buuntunshi bulwaang'ana na Mupashi, kabiiji lusako lwa Mupashi lulwaang'ana na buuntunshi. Pakuuba bino bilwaang'ana biine na biine, byonka byo amba mubule kuuba biintu byo musaka. ¹⁸ Mino inge mwa taangijilwa na Mupashi, anweeba keechi muji mu mizhilo ne. ¹⁹ Pano miingilo ya buuntunshi imweeka bino: bulalelale, bubipisho, bya byuunya, ²⁰ kupoopwela bankishi, bu ng'anga bwa lubuko, mafika, bya lutoobo, kichima, bukaji, bulozhi, mepatulo, maabano, bikoonkoma, ²¹ lwiiso, kupeendwa, kusaangalala kubi, ne biintu biji noobe byonka bye. Amiiwa ne mujimuna, byonka byo ne mujimwiinepo ne kala, amba aba booba biintu bya byonka bye keechi ba kaswaana bufumu bwa Lesa ne. ²² Mino kipaangwa kya Mupashi butemwe, lusekeelo, muteende, kuteekanya, lusa, buwaame, bukishiinka, ²³ bukimote, kwiikanya; ku biintu bya byonka bye keechi kuji muzhilo ne. ²⁴ Aba ba kwa Kilishitu Yesu ba poopa buuntunshi na bya kusakasaka ne bya lwiiso lwabyo pamo. ²⁵ Atweeba inge twaikala na Mupashi, lekai tweende ne na Mupashi. ²⁶ Keechi twiikale ba kwitoota ne, kwi endeleka umo ne mukwaabo ne, kwiubila kichima umo ne mukwaabo ne.