¹ Abino biintu byo bya pwiile, ba bineemanga baishile kwi amiiwa ne kwaamba amba, "Baantu beena Isalela, ba n'aanga, ne beena Levi keechi bepaatulako ku baantu ba mu ntaanda ne ku bya bunya byaabo ne: Beena Kenana, beens Hiti, beena Pelisha, beena Yebushi, beena Amoni, beena Moabu, beena Ijipita, ne beena Amoli. ² Pakuuba bashikula baana baabo bamo ba bakazhi ne ba balume, kabiji bavwaanga baantu bazhila na baantu ba mu ntaanda, kabiji ba ntaangi ne ba bineemanga bajiinga bataanshi mu luno luketekelo." ³ Byo naumvwiine bino, natabawiile bivwaalo byaami ne mukaangyo kabiji nafumishe mo nsuuki mu mutwe waami ne bweemvu, kabiji nakajile paanshi, kasa nazhiingila. ⁴ Aba boonse bazakamine pa byaambo bya Lesa wa Isalela pa luketekelo lwa bazha bapwiijile kwi amiiwa byo naikeele kasa na zhiingila kufika ne ku mulaambu wa mabaanga. ⁵ Mino pa mulaambu wa mabaanga naimene kufuma mukifulo kya buumvu mu bivwaalo byaami byatabauka ne mukaangyo, kabiji nafukamine paanshi ne kusuuntwiila mabooko ami kwi Yehoba Lesa waami. ⁶ Na ambile amba, "Naumvwa buunvu kabiji ne kusuulwa pa kwiinuna kiluungi kyaami kwi anweeba, pakuuba buubi bweetu bwakila pa mitwe yeetu, kabiji ne kuzhaatwa kweetu kwafiika mwiulu. ⁷ Kufuma ku mooba a bashaakulu beetu kufiks ne luno twatatwiila mu kuzhaatwa kukataampe. Mu buubi bweetu atweeba, ba mafumu beetu, ne ba n'aanga beetu twapanyiwe mu kubooko kwa mfumu wa ino ntaanda, ku mpooko, ku buzha, kabiji ne bwiivi ne ku biluungi bya buumvu, byotuji leelo. ⁸ Pano mu ka kimye kacheeche, lusa kufuma kwi Yehoba Lesa weetu lwaiya mukwiitwikazhe atweeba ke baantu bashaalapo ba puluka kabiji ne kwiitupa mwakwiikala mwaanji mwazhila. Akino kyaubiwe amba Lesa weetu etulabishe meeso etu kabiji ne kwiitupa kukookoloka mu buzha bweetu ⁹ Pakuuba atweeba twi bazha, mino Lesa weetu keechi witulubaako mu buzha bweetu ne. Kabiji, aye wanuungako lulayaan'ano lwa luketekelo kwi atweeba ku meeso a mfumu wa ku Pelisha. Aye witupa atweeba bulume buupya bwa kushimika nzuubo ya Lesa weetu ne kwimanya byaonaikile, kabiji aye wiitupa nsakwa ya kwiviimbila mu Yuda ne mu Yelusalema. ¹⁰ Pano mino, Lesa weetu, twafwainwa kwaamba ka pabino byoonse? Atweeba twalubako mikaambizho yeenu, ¹¹ mikaambizhi yo mwapaine ku ba mwiingilo beenu ba ngauzhi, byo mwa ambile amba, "Aye ntaanda yo mubeena kutweelamo amba ikale yeenu ke ntaanda yakoweela. Beitamisha baantu ba mu ntaanda na byabunya byaabo. Yayuula kuunsa ne kuunsa na kukoweela kwaabo. ¹² Byonkabyo pano, keechi mukapaane baana beenu ba bakazhi ku baana baabo ba balume ne; keechi musoongwele baana beenu ba balume baana baabo ba bakazhi ne, kabiji keechi mukakeebe muteende waabo watwaajijila ne bibakwaasha ne, byonkabyo amba mukakose ne kuja bya waama bya mu ntaanda, byonkabyo mukaleengela baana beenu kwiikala naayo bimye byoonse." ¹³ Pano panyuuma ya byoonse abya byaishile pe atweeba na maambo a byuubilo byeetu byatama ne kuzhaatwa kweetu kukataampe-maambo anweeba, Lesa weetu, mwaleka kwiitumanyika ne kwiitushe ke baantu bashaalapo ba puluka- ¹⁴ bushe tonaune mikaambizho yeenu ne kuvwaanga masoongola na bano baantu booba bya bunya nyi? Keechi musa kuzhiingila ne kwiitonauna atweeba byonkabyo amba kukabule kwiikala bakashaalapo, naangwa umo wakupuluka ne nyi? ¹⁵ Yehoba, Lesa wa Isalela, anweeba mwaoloka, pakuuba atweeba twaikala bapuluka bashaalapo ku jino juuba. Talai! Atweeba tuji bino ku kyeenyi kyeenu mu kuzhaatwa kweetu, pakuuba kafwaako naangwa umo wakoonsha kwiimana ku meeso enu na maambo a kino.