¹ Abano bo bajiinga ba ntaangi ba baloongo ba bashaakulu baabo, kabiji uno ye mutaanchi wa bafumine mu Babilona ne amiiwa mu kimye kya bufumu bwa mfumu Atakakesa. ² Wa mu kisemi kya Finehasa, Geshoma. Ba mukisemi kya kwa Itama, Danyela. Ba mukisemi kya kwa Davida, Hatushi. ³ Ba mukisemi kya kwa Shekaniya, ao wafumine ku kisemi kya kwa Paloshi, Zekaliya, kabiji wajiinga na ba balume 150 bataanchikwa mu buuku waanji. ⁴ Ba mukisemi kya kwa Pahati-Moabu, Elihoenai mwaana Zelahiya kabiji aye wajiinga ba balume bitoota bibiji. ⁵ Ba mukisemi kyakwa Zatu, Beni Yahazila kabiji aye wajiinga na ba balume bitoota bisatu. ⁶ Ba mukisemi kyakwa Adina, Ebeda mwaana wamulume wakwa Yonafani kabiji wajiinga na ba balume makumi atanu. ⁷ Ba mukisemi kyakwa Elama, Yeshaya mwaana Ataliya kabiji wajiinga na ba balume makumi atanu na abiji. ⁸ Ba mukisemi kyakwa Shefatiya, Zebadiya mwaana Mishela kabiji wajiinga na ba balume batanu ne basatu. ⁹ Ba mukisemi kyakwa Yoaba, Obadiya mwaana Yehila kabiji wajiinga na ba balume 218. ¹⁰ Ba mukisemi kya kwa Bani, Shelomiti mwaana Yosifya kabiji wajiinga na ba balume 160. ¹¹ Ba mukisemi kyakwa Bebai, Zekaliya mwaana Bebai kabiji wajiinga na ba balume makumi atanu ne batanu na basatu. ¹² Ba mukisemi kyakwa Azigada, Yohanani mwaana Hakatana kabiji wajiinga na ba balume 110. ¹³ Aba ba mukisemi kya kwa Adonikama bapeleleko kwiiya. Ano oajiinga mazhina abo: Elifeleta, Yeula, kabiji ne Shemaya kabiji abo baishile na ba balume makumi atanu najimo. ¹⁴ Ba mukisemi kya kwa Bigivai, Utai ne Zakula kabiji wajiinga na ba balume makumi atanu na abiji. ¹⁵ Amiiwa na koonkenye ba kang'eenda ku Kanala aja jaaya ku Ahava, kabiji twa tebelejile kooka mooba asatu. Na esekele baantu ne ba ng'aanga, mino keechi natainepo naangwa umo wa mu kisemi kya beena Levi ne. ¹⁶ Byonkabyo natumine baluwe na kumwiita Eliezela, Aliela, Shemaya, Elanatana, Yaliba, ne Elinatana kabiji ne Natana, Zekaliya, ne Meshulama-bajiinga bakuluumpe-kabiji Yoyaliba ne Elanatana-bajiinga bafuunjishi. ¹⁷ Jaloondejilepo amiiwa ne batumine kwi Ido, ntaangi mu Kasifya. Nebabuujile byakwaamba kwi Ido ne ku baloongo baanji, ba miingilo ba mu teempele beekala mu Kasifya, kuuba amba, betutumineko ba kwiingila mu nzuubo ya Lesa. ¹⁸ Byonkabyo betutumine atweeba na kubooko kwa waama kwa Lesa ku muuntu uteelwa amba Shelebiya, muuntu wa luumbuluka. Wajiinga wa mu kisemi kya kwa Mahili mwaana Levi mwaana Isalela. Aye waishile na baana ba balume jikumi ne batanu na basatu kabiji ne baloongo baanji. ¹⁹ Aye waishile na Hashabiya. Kwajiinga ne Yeshaya, umo wa mukisemi kya kwa Melali, ne baloongo baanji ne na baana baabo ba balume, ba balume boonse pamo makumi abiji. ²⁰ Ku booba batoongwelwe kwiingila mu tempele, abo Davida ne ba bineemanga baanji bo bapele kwiingijila beena Levi: 220, boonse pa muuntu pa muuntu batoongwelwe na mazhina. ²¹ Keepo nasapwiijile kuzhikilwa na nzaala ku Kanala waya ku Ahava mukwiipelula atweeba beene ku kyeenyi kya Lesa, mukukeeba jishiinda jeetu jaoloka kwi aye, baana beetu ba bacheeche, kabiji ne bya bunoonshi byeetu byoonse. ²² Naumvwiine buumvu kuloomba mushilika naangwa wa pa mboongolo kwi mfumu wa kwituviimbila atweeba ku balwaanyi mujishiinda, maambo twa ambile kwi mfumu amba, 'Kubooko kwa Lesa weetu kuji pa boonse bamukebela byawaama, mino bulume bwaanji ne bukaji bwaanji biji pa boonse bamulubaako aye.' ²³ Byonkabyo twaikeele na nzala ne kukeeba Lesa pa kino, kabiji ne aye waumvwine miloombelo yeetu. ²⁴ Jaloondejilepo na sajile ba balume jikumi ne babiji kufuma mu ba bineemanga ba bu ng'aanga: Shelebiya, Hashabiya, kabiji ne jikumi ba mu baloongo baabo. ²⁵ Ne amiiwa ne bapimijile siliva ne golide, ne biipe kabiji ne milaambu ya mu nzuubo ya Lesa amba mfumu, ne ba kije kyaanji ne ba bineemanga, kabiji ne beena Isalela boonse byo balaambwile kyaatutu. ²⁶ Byonkabyo na pimijile mu mabooko abo mataleenta 650 a siliva, kitoota kimo kya mataleenta a biipe bya siliva, kitoota kimo kya mataleenga a golide, ²⁷ makumi abiji a bidishi ao aneemene pamo pa kiumbi kimo, kabiji ne madalamu oba laambisha buloongo abiji a kapotwe auba buuya noobe golide. ²⁸ Keepo na ambile kwi abo amba, "Mwiipana kwi Yehoba, ne bino biipe naabyo, ne siliva ne golide ke milaambu yaatutu kwi Yehoba, Lesa wa bashaakulu beenu. ²⁹ Mukebisoopenga ne kwibilama poso ne byo mukebipimina ku meeso a ba ng'aanga ne ba bineemanga, ne beena Levi, ne ba ntaangi ba bashaakulu ba kisaka kya Isalela mu Yelusalema mu bibaamba bya mu nzuubo ya Lesa." ³⁰ Ba n'aanga ne beena Levi baswiile siliva wa pimiwe, ne golide, kabiji ne biipe byoonse mu kuuba amba bakebitwaale ku Yelusalema, ku nzuubo ya Lesa. ³¹ Twafumineko ku Ahava kanala pa juuba ja bujikumi na bubiji ja n'oondo mutaanshi ne kuuya ku Yelusalema. Kubooko kwa Lesa weetu kwajiinga pe atweeba; wituviimbijile atweeba ku kubooko kwa mulwaanyi ne booba basakileenga kwitoonauna mu jishiinda. ³² Byonkabyo twatweelele mu Yelusalema ne kwiikala moonka mooba asatu. ³³ Keepo pa juuba ja buna siliva, ne golide ne biipe byapimiwe mu nzuubo ya Lesa, mu kubooko kwa Melemoti mwaana Uliya n'aanga. Aye wajiinga na Eleazala mwaana Finehasa, ne Yozabada mwaana Yeshua, kabiji ne Noadiya mwaana Binui mwiina Levi. ³⁴ Naambala ne kuneema kwa byoonse kwamweekele. Kuneema koonse kwa neembelwe pa kyookya kimye. ³⁵ Aba bafumine mu buzha, baantu ba mu buzha, ba laambwile milaambu ya kusooka kwi Yehoba wa Isalela: Ba n'oombe balume jikumi ne babiji ba boonse beena Isalela, makumi atanu na ana ne batanu ne umo a mokooko, ne makumi atanu na abiji ne batanu na babiji a twaana twa mikooko, kabiji ne ne ba mbuzhi balume jikumi ne babiji kmulaamba wa buundenga maambo. Byoonse byajiinga ke mulaambu wa kusooka wa Yehoba. ³⁶ Poonkapo bapaine malamuna a mfumu ku ba bineemanga ba mfumu ne ku ba ndama byaalo mu bibuunji bushiiya bwa mukola, kabiji bakwashishe baantu ne nzuubo ya Lesa.