¹ Byonkabyo mfumu Daliusa wapaine jifuunde, kabiji bakebelekebelenga mu nzuubo lamijilenga bya bunoonshi, amwa mu Babilona. ² Mino mu Ekabatana ye lukena wa mukyaalo kya Media; bataine muvuungilo po bya neembelwe: ³ Mu mwaaka mutanshi wa mfumu Kilusa, Kilusa wapaine jifuunde ja mu nzuubo ya Lesa amba: 'Lekai nzuubo ishimikwe jibiji ikale nzuubo ya kitapisho, lekai kiteendekesho kyaayo be kyaanshike, lekai kuleepa kwaayo kwiikale makyuubichi makumi atanu ne imo, ne mubwiipi bwayo makyuubichi makumi atanu ne imo. ⁴ Bekishimike na mikuuku isatu ya maabwe akataampe ne mikuuku ya mapulaanga apya, lekai muteenge waayo apanyiwe ku nzuubo ya mfumu. ⁵ Pano bweezhai biintu bya golide ne siliva abya bya mu nzuubo ya Lesa, abya Nebukaneza byo a letele ku Babilona kufuma ku teempele mu Yelusalema ne kwi bibweezha abo kuteempele mu Yelusalema. Mwafwainwa kwibibiika mu nzuubo ya Lesa! ⁶ Pano Tatenai, ndama kyaalo wa kyaalo kookwa kubushiiya bwa mukola, Sheta-Bozenai, ne bakweenu baji mu kyaalo kubushiiya bwa mukola,fumaiko! ⁷ Shai mwiingilo wa nzuubo ya Lesa buunke. Ndama kyaalo ne bakuluumpe ba ba Yudea bakatuunga ino nzuubo ya Lesa apa pa mpuunzha. ⁸ Amba amiiwa mbeena kupaana mukaambizho ao ye mwafwainwa kuubila bano bakuluumpe ba ba Yudea abo batuunga ku nzuubo ya Lesa: Maali afuma ku bamfumu afuma ku bushiiya bwa mukola akeengijishiwe ku kufweeta bano baantu byonkabyo keechi bafwainwa kuleeka miingilo yaabo ne. ⁹ Biji byoonse bikakebewa-baana ba ng'oombe ba balume ne baana ba mikooko ba balume naangwa baana ba mikooko ba milaambu ya kusooka kwi Lesa wa mwiulu, nkuunwa, mukele, ne binyu naangwa maanyi mwaila mukaambizho wa ba ng'aanga mu Yelusalema-mukapanenga bino biintu kwa kubula kukaankalwa. ¹⁰ Mukoobe kino byonkabyo abo bakaleeta mukachi bitapisho bisekesha Lesa wa mwiulu ne kuloombelela buumi bwa mfumu ne baana baanji ba balume. ¹¹ Amiiwa napaana uno muzhilo naamba inge umo walubaankanya uno muzhilo, ba kamufumyemisheko mwaaba ku nzuubo yaanji ne ku musukikako, kabiji nzuubo yaanji bakeyalula ke kyaala. ¹² Lekai Lesa waleengeshe jizhina jaanji kwiikala moonka kufumyaapo uji yeense mfumu naangwa baantu bemanya mabooko kukulubaankanya uno muzhilo, naangwa kukoonauna ino nzuubo Lesa mu Yelusalema. Amiiwa, Daliusa, yaami nakaambizha uno mukaambizho. Bakatesheeko muchima mu kwibyuuba byoonse!" ¹³ Pakuuba na maambo a muzhilo mukataampe wa mfumu Daliusa, Tatenai, ndamakyaalo wabushiiya bwa mukola, Sheta-Bozenai, ne bakwaabo, baubile byoonse abya bya kaambizhe Daliusa mfumu. ¹⁴ Byonkabyo bakuluumpe ba ba Yudea bashimikile ne kumona bya waama mu bu ngauzhi bwakwa Hagai ne Zekaliya, wa mu kisemi kya Ido. Bapwiishishe kutuunga kwaabo mwaila mukaambizho wa Lesa wa Isalela ne na mukaambizho wa kwa Daliusa, ne Atazakeshi mfumu wa ku Pelisha. ¹⁵ Nzubo beipwiishishe pa juuba ja busatu ja ng'oondo wa Adala, mu mwaaka wa butanu na umo wa bufumu bwa Daliusa. ¹⁶ Baantu ba Isalela, ba ng'aanga, beena Levi, ne bakwaabo bo bakwaachile basaangalele kushimikwa kwa ino nzuubo ya Lesa na lesekeelo. ¹⁷ Bepaine kitoota kimo kya ba ng'oombe balume, ne kitoota kimo kya mikooko ilume, ne bitoota bina bya baana ba mikooko bya kuzhijikila nzuubo ya Lesa. Jikumi na babiji ba mbuzhi balume ne byo bapaine kwiikala mulaambu wa bu ndeenga maambo bwa beena Isalela boonse, umo pa mulaka wa mu Isalela. ¹⁸ Babiikile ne ng'aanga ne beena Levi ku kwiingila maambo a miingilo ya Lesa mu Yelusalema, byonkabyo kya neembwa mu buuku wa Mosesa. ¹⁹ Byonkabyo abo bajiinga mu buzha basekejile kijiilo pa juuba ja bujikumi na buna bwa ng'oondo mutaanshi. ²⁰ Ba ng'aanga ne beena Levi boonse bewamisha; abo boonse bajiinga babiipa. Keepo baipaile bitapisho bya kijiilo kya lupitailo kya boonse aba bajiinga mubuzha, kubiikapotu ne abo beene. ²¹ Baantu ba mu Isalela aba bajiile nyaama wa kijiilo kya lupitailo bajiinga booba babweelele kufuma mu buzha kabiji beepatwiile abo beene kufuma kububiipisho bwa muyooya mikoka ya baantu ba mu kyaalo mu kuuba amba tupoopwele Yehoba Lesa wa Isalela. ²² Bajiile ne kijiilo kya ba shiinkwa bakubula mbiizho mooba atanu ne abiji, na lusekeelo maambo Yehoba wibasaangajikile pa kwalulula muchima wa mfumu wa Asilya kya kuuba amba wibakwashishenga mu mwiingilo wa nzuubo, mu nzuubo ya Lesa wa beena Isalela.