¹ Keepo Yehoba wa ambile kwi Mosesa amba, "Yaanga kwi Felo ukamubuule amba, 'Yehoba, Lesa wa ba Hebelu, wa amba bino amba: "Leka baantu baami baye ba ka mpoopwele." ² Mino inge ukane kwi baleka amba baye, inge wibakaanye, ³ keepo kubooko kwa Yehoba kukaleeta mwaalo wakatazha pa bilelwa byoobe biji mu bujimi-ba mbili, ba mboongolo, ......, pa mataanga a ba ng'oombe, kabiji ne pa mataanga a mikooko. ⁴ Mino Yehoba ukabiika lupusano lukataampe pakachi ka bilelwa byabeena Isalela ne bilelwa byabeena Ijipita, byonkabyo amba kafwaako nyaama naangwa umo ubeena Isalela ukafwa ne. ⁵ Yehoba waneengezha kimye; aye wa amba amba, "Ke keesha po nkooba bino biintu mu ntaanda.""' ⁶ Yehoba waubile kino juuba ja loondejilepo: Ba ng'oombe boonse babeena Ijipita bafwiile, mino keechi pafwiile naangwa nyaama umo wabeena Isalela ne, naangwa nyaama umo ne. ⁷ Felo wataine bishiinka, kabiji, wamweene, naangwa umo nyaama wabeena Isalela wafwiile ne. Mino muchima waanji wajiinga nabitaala, byonkabyo keechi wibalekele baantu amba baye ne. ⁸ Poonkapo Yehoba wa ambile kwi Mosesa ne Alona amba, "Shikula buuto mu mabooko mu kisha kya mujilo. Obeewa, Mosesa, utaaye buuto mwiulu mu mweela Felo kasa abeena kumona. ⁹ Bukaluka ke tulukuungu tucheeche moonse mu ntaanda ya Ijipita. Lukaleengesha maboobela a mujilo ne biloonda kwiiya ku baantu ne ku ba nyaama moonse mu ntaanda ya Ijipita." ¹⁰ Byonkabyo Mosesa ne Alona bashikwiile buuto mukisha kya mujilo ne kwiimana ku meeso akwa Felo. Keepo Mosesa wataile buto mwiulu mu mweela. Buuto bwaleengeshe maboobela a mujilo ne biloonda kwiiya ku baantu ne ba nyaama. ¹¹ Ba biingelengezha keechi ba muleekele Mosesa ne maambo a maboobela a mujilo, maambo maboobela a mujilo ajiinga pe abo kabiji ne beena Ijipita boonse. ¹² Yehoba wakoseshe muchima wakwa Felo, byonkabyo Felo keechi waumvwiine kwi Mosesa ne Alona ne. Akino kyajiinga moonka mwa ambijile Yehoba kwi Mosesa amba Felo byo akakoonsha kuuba. ¹³ Keepo Yehoba wa ambile kwi Mosesa amba, "Ukeemane keesha kumakya, ne kwiimana ku meeso akwa Felo, ne kwaamba kwi ko aji amba, 'Yehoba , Lesa wa ba Hebelu, wa amba bino amba: "Leka baantu baami baye ba ka mpoopwele. ¹⁴ Pakuuba luno amiiwa nkatuma myaalo pe obeewa mwiine, pa ba miingilo boobe kabiji ne pa baantu boobe. Amiiwa nkooba kino byonkabyo amba ukakoonshe kuyuuka amba keechi kuji naangwa umo uji noobe amiiwa mu ntaanda moonse ne. ¹⁵ Akino kimye inge navuungulwiile kubooko kwaami ne ku kulukuka obeewa ne baantu boobe na kikola, kabiji inge wafuminepo pa ntaanda. ¹⁶ Mino ke na ano maambo amiiwa naswiishishe obeewa kwiikala na buumi: Mukuuba amba nkumweeshe obeewa ngovu yaami, byonkabyo amba jizhina jaami jikasapwiilwe pa ntaanda poonse. ¹⁷ Obeewa ukituumbijika obeewa mwiine ku baaantu na kubula kwibaleka amba baye. ¹⁸ Umvwa! Keesha pakyoonka kino kimye amiiwa nkaleeta mweela mukataampe wa kiinkunkwila, kyakuuba amba keechi kya mweekapo kala mu Ijipita kufuma kimye kyo a tatwiile kufika ne luno. ¹⁹ Keepo pano, nkatuma baantu ne kubuungizha bilelwa ne byoone byo muji naabyo mu majimi ku mpuunzha ya waama. Muuntu yeense ne nyaama ne byoobya biji mu bujimi keechi bakabweela ku muzhi ne-malwa a kebekijila, kabiji bakafwa.""' ²⁰ Keepo aba ba miingilo ba kwa Felo baitabijile mwi mu byaambo bya Yehoba banyeemene ne kuleeta bazha babo ne bilelwa mu ma zuubo. ²¹ Mino aba babujile kuumvwa byaambo bya Yehoba bashiile bazha baabo ne bilelwa mu majimi. ²² Keepo Yehoba wa ambile kwi Mosesa amba, Olweela kubooko koobe mwiulu byonkabyo amba kwiikale kiwoowo mu ntaanda yoonse ya Ijipita, pa baantu ne pa banyaama, kabiji ne pa bijimwa byoonse bya mu bujimi mu ntaanda ya Ijipita." ²³ Mosesa waolweele kubooko na kamama kaanji mwiulu, ne Yehoba watumine kiluulumo kya mvula, kyoongyo, kabiji ne kubeesha pa mushiji. Aye wanookeshe ne kiluulumo mu ntaanda ya Ijipita. ²⁴ Byonkabyo kwajiinga kiluulumo ne kubeesha kwivwaanga na kiluulumo, kukola saana, kyakuuba amba kyabujilepo mu ntaanda ya Ijipita kufuma ku byo kyaikele ke kyaalo. ²⁵ Moonse mu ntaanda ya Ijipita, kiluulumo kya fikijile mu byoonse mu majimi, boonse baantu ne ba nyaama pamo. Kyafikijile mu kijimwa kyoonse mu majimi ne kuchimuna bichi byoonse. ²⁶ Moonkatu mu ntaanda ya Goshena, mwaikele beena Isalela, mo mwabujile kiluulumo. ²⁷ Poonkapo Felo watumine baantu na kwiita Mosesa ne Alona. Wa ambile kwi abo amba, "Amiiwa pano naleenga maambo. Yehoba ye waoloka, kabiji amiiwa ne baantu baami twi baabi. ²⁸ Loombai kwi Yehoba, maambo mapaate ne biluulumo byakila. Amiiwa nsa kwimuleka muyeenga, kabiji keechi musa kutwaajijila kwiikala muno ne." ²⁹ Mosesa wa ambile kwi aye amba, "Byonkafumatu mu muzhi, amiiwa nkasuuntula mabooko ami kwi Yehoba. Mapaate akaleka, kukeekalapo kiluulumo ne. Mujino jishiinda mukayuuka amba ntaanda ya Yehoba. ³⁰ Mino anweeba ne ba miingilo beenu, nayuuka amba keechi mukimuneemeka Yehoba Lesa ne." ³¹ Pano fulakisi ne baale byaonaikile, mino baale wakomeenenga mu kutwi, ne fulakisi wajiinga mu buluba. ³² Mino wiinchi ne speleti keechi be bifikijile ne maamba byajiinga bijimwa bya pelaangako. ³³ Mosesa byo afumineko kwi Felo ne mu muzhi, wasuuntwijile mabooko anji kwi Yehoba; mapaate ne kiluulumo byalekele, kabiji ne mvula keechi yanokele jikwaabo ne. ³⁴ Felo byo a mweene amba mvula, ne kiluulumo, mapaate byaleeka, waleenge maambo jikwaabo ne kukosesha muchima waanji, pamo ne ba miingilo baanji. ³⁵ Muchima wakwa Felo wakosele, kabiji byonkabyo keechi walekele baantu beena Isalela amba baye ne, moonka mwa ambijile Yehoba na kubooko kwa ka Mosesa.