¹ Poonkapo Yehoba wa ambile kwi Mosesa amba, "Yaanga kwi Felo ukamwaambile amba, 'Yehoba wa amba bino amba: "Leka baantu baami bayenga ba ka mpoopwele amiiwa. ² Inge ukane kwibaleka amba baye, amiiwa nkamanyika kyaalo kyoobe kyoonse na ba boombwe. ³ Mukola ukayuula na ba boombwe. Bakeeya ne kutweela mu nzuubo yoobe, kumwaanya, ne pa mwaanya. Bakaya mu ma zuubo a ba miingilo boobe. Bakaya pa baantu boobe, mwa kusookela bashiinkwa, ne mu bikoombola bya ba shiinkwa. ⁴ Ba boombwe ba kakulukuka obeewa, ne baantu boobe, kabiji ne ba miingilo boobe."''' ⁵ Yehoba wa ambile kwi Mosesa amba, "Amba kwi Alona amba, 'Tanyika kubooko koobe ne nkoonta yoobe pa mikola, ne pa tu mikola tucheeche, kabiji ne pa bizhiba, kabiji kaleete ba boombe mu ntaanda ya Ijipita."' ⁶ Alona watanyikile kubooko pa meema a mu Ijipita, kabiji ne ba boombwe baishile ne ku kuumbana ntaanda yoonse ya Ijipita. ⁷ Mino booba biingelengezha baubile byonkabyo na biingelengezha byaabo; baleetele ba boombwe mu ntaanda ya Ijipita. ⁸ Keepo Felo waichile Mosesa ne Alona ne kwaamba amba, "Loombai kwi Yehoba pakuuba amba aye afumye ba boombwe kwi amiiwa ne ku baantu baami. Keepo amiiwa nsa kuleeka baantu baye, amba ba katapishe kwi aye." ⁹ Mosesa wa ambile kwi Felo amba, "Mwakoonsha kwiikala na jishuuko ja ku mbuula amiiwa byo nafwainwa kwimuloombelela anweeba, ne miingilo beenu, kabiji ne baantu beenu, byonkabyo amba, ba boombwe bakoonshe kufumako kwi anweeba, ne ku ma zuubo enu kabiji ne kwiikalatu mu mukola." ¹⁰ Felo wa ambile amba, "Keesha." Mosesa wa ambile amba, "Lekai kiikale byoonka byo mwa amba, byonkabyo amba muyuuke kuuba amba kafwaako mukwaabo uji noobe Yehoba, Lesa weetu ne. ¹¹ Ba boombwe bakafumako kwi anweeba, ne ku ma zuubo enu, ne ku ba miingilo beenu, kabiji ne ku baantu beenu. Bakeekalatu mu mukola." ¹² Mosesa ne Alona bafumineko kwi Felo. Poonkapo Mosesa Wajijile kwi Yehoba na maambo a ba boombwe bo a leetele pe Felo. ¹³ Yehoba waubile moonka mwa loombele Mosesa: Ba boombwe bafwiile mu ma zuubo, ne mu bipaango, kabiji ne mu majimi. ¹⁴ Baantu be ba buungizhe pamo mu miluumba, kabiji ne ntaanda ya pemenwe. ¹⁵ Mino Felo byo a mweene amba kwajiinga kukuulwa, aye wakoseeshe muchima waanji kabiji keechi wi boomvwijile ba Mosesa ne Alona ne, noobe byoonka bya ambile Yehoba amba wakoonsha kuuba. ¹⁶ Yehoba wa ambile kwi Mosesa amba, " Amba kwi Alona amba, 'Suuntula kamama koobe ne kupuma pa lukuungu paanshi, amba lukoonshe kwaluke ke bizhiitula mu ntaanda ya Ijipita moonse.''' ¹⁷ Baubile byonkabyo. Alona byo a suuntwiile kubooko kwaanji ne kamama kaanji ne kupuma pa lukuungu paanshi, bizhiitula byaishele pa baantu ne ba nyaama. Lukuungu loonse paanshi lwa alukile ke bizhiitula moonse mu ntaanda ya Ijipita. ¹⁸ Booba biingelengezha ba esekele na biingelengezha byaabo ku leenga bizhiitula, mino keechi bakoonsheshe ne. Byonkabyo kwajiinga bizhiintula pa baantu ne ba nyaama. ¹⁹ Poonkapo ba biingelengezha ba ambile kwi Felo amba, "Auno ke munwe wa Lesa." Mino muchima wakwa Felo wakosele, byonkabyo wakaine kuumvwa kobaji. Kyajiinga byonka bya ambile Yehoba Felo kufwainwa kuuba. ²⁰ Yehoba wa ambile kwi Mosesa amba, "Ukabuuke lukeelo keelo ne kwiimana kuluutwe ya kwa Felo byo akayaanga ku mukola amba, 'Yehoba wa amba bino amba: "Leka baantu baami baye pakuuba anba bakakoonshe ku mpoopwela amiiwa. ²¹ Mino inge ubule kuleka baantu baami amba baye, Amiiwa nkatuma ba luunzhi pe obeewa, pa ba miingilo yaabo, ne baantu boobe, kabiji ne mu ma zuubo enu. Ma zuubo abeena Ijipita akayuula na ba luunzhi, kabiji naangwa pa mushiji po beemana pakayuula na ba luunzhi. ²² Mino pa jooja juuba amiiwa nkooba biingi ntaanda ya Goshena, ntaanda amo mubeena kwiikala baantu baami, byonkabyo amba keechi mukeekalepo ba luunzhi ne. Akino kikamweeka byonkabyo amba mukakoonshe kuyuuka amba amiiwa yami Yehoba mukachi ka ntaanda. ²³ Amiiwa nkaleenga lupusano lukataampe pakachi ka baantu baami ne baantu boobe. Akino kimweesho kya bulume bwaami kikobiiwa keesha.""' ²⁴ Yehoba waubile kino, kabiji ne baluunzhi bavula baishile mu nzuubo yakwa Felo ne mu ma zuubo a ba miingilo yaanji. Ne moonse mu ntaanda ya Ijipita, ntaanda ya onaikile maambo a ba luunzhi. ²⁵ Felo waichile Mosesa ne Alona ne kwaamba amba, "Yainga, katapishai kwi Lesa weenu mu yoonka ino ntaanda yeetu." ²⁶ Mosesa wa ambile amba, "Keechi kitufwainwa atweeba kuuba byobyo ne, maambo bitapisho byo tupaana kwi Yehoba Lesa weetu ke biintu byabula kuswiishiwa ku beena Ijipita. Inge twaleenga bitapisho kumeeso abo abya byabula kuswiishiwa ku beena Ijipita, keechi betwaase maabwe ne nyi? ²⁷ Ine, aluno ke lweendo lwa mooba asatu lotwafwainwa kuleenga, mukuuba amba tukatapishe kwi Yehoba Lesa weetu, moonka mo etukaambizhizha atweeba." ²⁸ Felo wa ambile amba, "Amiiwa nsa kwimuswiisha anweeba kuya na kutapisha kwi Yehoba Lesa weenu mujiisaka. Keechi mwafwainwa kuuya kwaleepesha ne. Ndoombelelai amiiwa." ²⁹ Mosesa wa ambile amba, "Byo nsa kufumatu kwi anweeba, amiiwa nsa kuloomba kwi Yehoba amba bipanyi bya ba luunzhi bifumeeko kwi anweeba, ba Felo, ne ku ba miingilo beenu kabiji ne ku baantu beenu keesha. Mino keechi mwafwainwa kuuba kino na bujiimbijiimbi ne na kubula kuleka baantu beetu kuya na kutapisha kwi Yehoba ne." ³⁰ Mosesa wafumineko kwi Felo kabiji waloombele kwi Yehoba. ³¹ Yehoba waubile moonka mwa loombejile Mosesa; kabiji wafumisheko baluunzhi kwi Felo, ne ku ba miingilo baanji, kabiji ne ku baantu baanji. Keechi kwashaajile naangwa umo ne. ³² Mino Felo wakoseshe muchima waanji ne pa kyookya kimye naakyo, kabiji keechi walekele baantu amba baye ne.