¹ Yehoba wa ambile kwi Mosesa amba, "Mona, nakuleenga noobe lesa kwi Felo. Alona kolojoobe ukeekala ngauzhi obe. ² Ukaamba byoonse byoonka byo nkamukaambizha kwaamba. Alona kolojoobe ukaamba ku baantu kwi Felo maambo a kuuba amba akebalekeko beena Isalela kufuma mu ntaanda yaanji. ³ Mino amiiwa nkakosesha muchima waanji Felo.Kabiji nkasolola bimweesho bya ngoovu yaami, bya kukumya byavula, mu ntaanda ya Ijipita. ⁴ Mino Felo keechi ukoomvwa kwi anweeba ne, mino nkabiika kubooko kwaami mu Ijipita ne kufumya bangikazhi baami, baantu baani beena Isalela mu ntaanda ya Ijipita na byuubilo bikataampe bya buunchiba maambo. ⁵ Beena Ijipita bakayuuka amba amiiwa ne Yehoba byo nkafika na kubooko kwaami mu Ijipita nekuleeta baantu baami beena Isalela mwi abo. ⁶ Mosesa ne Alona bekyuubile kino: Baubile moonka mo ebakaambizhizhe Yehoba. ⁷ Mosesa wajiinga na myaaka makumi atanu na asatu ne Alona wajiinga na myaaka makumi atanu na asatu kimye kyo baile mukwaamba kwi Felo. ⁸ Yehoba wa ambile kwi Mosesa ne kwi Alona amba, ⁹ "Inge Felo ukaamba kwi anweeba amba, 'Ubai bya kukumya,' Keepo ukaamba kwi Alona amba, 'Nyamuna kamama koobe ne kwi kataaya paanshi ku meeso akwa Felo, maambo akuuba amba kakaluke muloolo.''' ¹⁰ Keepo Mosesa ne Alona baile kwi Felo, baubile moonka mo ebakaambizhizhe aye Yehoba. Alona wataile kamama kaanji ku meeso akwa Felo, nebakalume baanji, ka alukile ke muloolo. ¹¹ Keepo Felo waichile beena Ijipita bamaana ne ba ng'aanga ne ba mpaanda maanga. Baubile biintu bimo bingelengezha. ¹² Boonse ba balume bataile tumama twaabo, ne tumama twa alukile ke miloolo. Mino kamama kakwa Alona kaminyine miloolo yoonse. ¹³ Felo muchima waanji wakosele. Kabiji keechi wa umvwiine ne, noobe mwamubuujile Yehoba. ¹⁴ Yehoba wa ambile kwi Mosesa amba, "Felo muchima waanji wakosa, kabiji wakaana kuswiisha baantu kuuya. ¹⁵ Ukaye kwi Felo lukeelo byo akayaanga kumeema, ukemane kuunsa yamukola ukasaambakane naanji. Ukaseende ne kamama aka ka alukile muloolo. ¹⁶ Ukamwaambile amba, 'Yehoba, Lesa wabeena Ebelu, waantuma amiiwa kwi anweeba amba, "Baleke baantu bayeenga, maambo a kuuba amba ba kaampopwele muungye. Kufika neluno keechi wa umvwiine ne." ¹⁷ Yehoba wa ambile amba, "Maambo akino ukayuuka amba amiiwa ne Yehoba. Mbeena kukemika meema mumukola wa Nailo nakamama kaanji mukubooko kwaami, kabiji mukola ukaluka ke mashi. ¹⁸ Masabi aji mumeema akafwa, kabiji mukola ukanuunka. Beena Ijipita keechi bakatoma meema kufuma mu uno mukola ne.""' ¹⁹ Keepo Yehoba wa ambile kwi Mosesa amba, "Amba kwi Alona, ashikule kamama nekufika nakamama koobe mukubooko koobe, ku meema a Ijipita, peulu ya mukola, netukola tucheeche, ne poboowela, ne poonse paji meema pobapooya, maambo a kuuba amba meema aluke mashi. Uba kino maambo a kuuba amba koonse kwiikale mashi mu ntaanda ya Ijipita, naangwa pateenkamina meema palupako lwa kichi naangwa jiibwe."' ²⁰ Mosesa ne Alona baubile moonka mo bebakaambizhizhe kwi Yehoba. Alona watanyikile kamama ne kwiimika meema mumukola, pakachi kakwa Felo ne ba mwiingilo baanji. Meema onse mumukola a alukile mashi. ²¹ Masabi mumukola afwiile, kabiji mukola wataatwile kunuunka. Beena Ijipita keechi batomene meema kufuma mumukola ne, kabiji mashi akuumbene koonse mu ntaanda ya Ijipita. ²² Mino baantu booba biingelengezha ba mu Ijipita basoombolwele kuuba biintu bimo biingelengezha. Mino muchima wakwa Felo wakoseletu. Kabiji wakaine kuumvwa kwi Mosesa ne Alona, amba bya amba Yehoba byafwainwa kubiiwa. ²³ Mino Felo wa alulukile ne kukatweela mu nzuubo yaanji. Keechi wateeleko ne maana biibye ne. ²⁴ Boonse beena Ijipita bapoyele tumishima kuunsa ya mukola meema a kutoma, mino keechi batomene meema a mumukola ne. ²⁵ Mooba atanu ne abiji apichilepo Yehoba kasa alula meema byonkabya ke mashi.