¹ Yehoba wa ambile kwi Mosesa amba, "Yaanga kwi Felo, pakuuba amiiwa nakosesha muchima waanji ne michima ya miingilo baanji. Nauba kino mukumweesha bino biyuukilo bya bulume bwaami mukachi kaabo. ² Kabiji nauba ne kino byonkabyo amba mukabuule baana beenu ne baankana biintu byo nauba, byo na mubila bukaji Ijipita, kabiji ne byo napana biyuukilo byavula bya bulume bwaami mukachi kaabo. Mujino jishinda mukayuuka amba amiiwa ne Yehoba." ³ Byonkabyo Mosesa ne Alona baile kwi Felo ne kwaamba kwi aye amba, "Yehoba, Lesa wa ba Hebelu, wa amba bino amba: 'Bimye biinga byo musakukaana kwipelula ku meeso ami? Leka baantu baami baye ba ka mpoopwele. ⁴ Mino inge ukane kwi baleka amba baye baantu baami, umvwa, keesha nkaleeta nzhiiye mu ntaanda yoobe. ⁵ Ikazhika peulu ya mushiji byonkabyo amba kafwaako naangwa umo ukamona ntaanda ne. Ikaja byoonse byashaajilepo byoonse bya pulukile ku kiluumo. Ikaja bichi byoonse abya bimumenena mu majimi. ⁶ Ikakuumbana mu mazuubo enu, ne oa a ba miingilo boobe, ne oa abeena Ijipita onse-biintu naangwa basheenu, naangwa ba nkaambo yeenu byo babujile kumonapo, kafwako kyamweekelepo kutatula juuba jo bajiinga pa ntaanda kufika ne kujino juuba ja leelo."' Poonkapo Mosesa wafumineko kwi Felo ne kuya. ⁷ Ba miingilo bakwa Felo ba ambile kwi aye amba, "Bimye biinga uno muuntu byo a sakwiikala wa kuleeta byamalwa kwi atweeba? Lekai beena Isalela bayenga na kupoopwela Yehoba Lesa waabo. Naanchi keechi mwakiyuuka amba Ijipita ba monauna ne nyi?" ⁸ Mosesa ne Alona bebaleetele jibiji kwi Felo, wa ambile kwi abo amba, "Yainga mukapoopwele Lesa weenu. Mino baantu ka basa kuya?" ⁹ Mosesa wa ambile amba, "Tusakuya na baana beetu ba bacheeche, ne na bakuluumpe beetu, ne na baana beetu ba balume ne ba bakazhi. Tusakuya na mataanga etu a mikooko ne a ba ng'oombe, maambo twafwainwa kwiikala na majiila akwa Yehoba." ¹⁰ Felo wa ambile kobaji amba, "Yehoba kiine ekale ne anweeba, inge kine naleka anweeba ne kuya kabiji ne baana ba bacheeche baya. Talai, muji na buubi mu maana. ¹¹ Ine! Yainga, baana balumetu boonka mukachi keenu, mukapoopwele Yehoba, pakuuba kyo kyo mwasaka." Keepo Mosesa ne Alona bebapaangile mukyeenyi kya kwa Felo. ¹² Keepo Yehoba wa ambile kwi Mosesa amba, "suuntwila kubooko koobe pa ntaanda ya Ijipita ku nzhiiye, amba ikoonshe kulukuka ntaanda ya Ijipita ne kuja bijimwa byoonse bijimo, byoonse byashiile kinkuunkwila." ¹³ Mosesa wa suuntwijile kubooko kwaanji pa ntaanda ya Ijipita, kabiji Yehoba waleetele kipuupu kufuma kumusela mu ntaanda aja juuba joonse mute ne bufuku. Byo kyafikile lukeelo, kipuupu kya kumusela kya leetele nzhiiye. ¹⁴ Nzhiiye yaile moonse mu ntaanda ya Ijipita ne ku kuumbana mpuunzha yoonse. Keechi kwajiingapo kala nzhiita ya nzhiiye mu ntaanda ne, kabiji keechi kukeeyapo kyauno mutuundu jibiji ne. ¹⁵ Yazhikile peulu ya mushiji poonse kyakuuba amba kwaubile ne bwi. Yajiile bijimwa byoonse mu ntaanda ne bipaangwa byoonse bya ku bichi byashiile kinkuunkwila. Moonse mu ntaanda ya Ijipita, kafwaako kijimwa kyashaajilemo ne, naangwa kichi naangwa kijimwa mu majimi. ¹⁶ Poonkapo Felo bukiji waichile Mosesa ne Alona ne kwaamba amba, "Amiiwa naleenga maambo kwi Yehoba Lesa weenu ne kwi anweeba. ¹⁷ Pano kabiji, ndekelaiko maambo kino kimye, kabiji muloombe kwi Yehoba Lesa weenu amba afumye aluno lufu kwi amiiwa." ¹⁸ Byonkabyo Mosesa wafumineko kwi Felo kabiji waloombele kwi Yehoba. ¹⁹ Yehoba waleetele kipuupu kikataampe kufuma ku muzhika kya seendele nzhiiye yoonse ne kwi itaaya mu kaluunga ka Leedisa; keechi mwashaajilepo naangwa nzhiiye umo mu mipaka ya Ijipita ne. ²⁰ Mino Yehoba wakoseshe muchima wakwa Felo, ne Felo keechi walekele beena Isalela amba bayenga ne. ²¹ Keepo Yehoba wa ambile kwi Mosesa amba, suuntula kubooko koobe mwiulu, byonkabyo kwiikale mfiinshi mu ntaanda ya Ijipita, mfiinshi yo bafwainwa kuumvwa." ²² Mosesa wa suuntwile kubooko kwaanji mwiulu, kabiji kwajiinga mfiinshi ine mu ntaanda moonse ya Ijipita pa mooba asatu. ²³ Kafwaako naangwa umo wakumona mukwaabo ne; kafwaako naangwa umo wafumine mu nzuubo pa mooba asatu ne. Naangwa byonkabyo, beena Isalela boonse bajiinga na kyeeya ko baikajilenga. ²⁴ Felo waichile Mosesa ne kwaamba amba, Yainga mukapoopwele Yehoba. Ne bisemi byeenu mwafwainwa kuuya naabyo, mino mataanga enu a mikooko ne a ba ng'oombe afwainwa kushaala." ²⁵ Mino Mosesa wa ambile amba, "Tuswiishai atweeba kwiikala na bitapisho ne milaambu ya kusooka byonkabyo amba tukapaane kwi Yehoba Lesa weetu. ²⁶ Ba ng'oombe beetu twafwainwa kuuya naabo; kafwaako naangwa mukono wafwainwa kushaala ne, pakuuba twafwainwa kwibaseenda mukupoopwela Yehoba Lesa weetu. Pakuuba atweeba keechi twayuuka byotwafwainwa ku mupoopwelako naabyo Yehoba ne poso twafika kookwa." ²⁷ Mino Yehoba wakoseshe muchima wakwa Felo, kabiji keechi wakoonsheshe kwibaleka baya ne. ²⁸ Felo wa ambile kwi Mosesa amba, "Fumako kwi amiiwa! Jimuka pa kiintu kimo, amba keechi umone amiiwa jikwaabo ne, pakuuba pa juuba jo ukamona kiluungi kyaami, ukafwa." ²⁹ Mosesa wa ambile amba, "Anweeba beene mwa amba. Amiiwa keechi nkamona kiluungi kyeenu jibiji ne."