¹ Lesa wa ambile abino byaambo byoonse amba: ² "Amiiwa ne Yehoba Lesa weenu, wimufumishe mu kyaalo kya Ijipita, mu kyaalo kya buzha. ³ Keechi mukeekalepo na balesa bakwaabo bakila pe amiiwa ne. ⁴ Keechi kesoongele nkishi naangwa kipashang'ano kya byeepi kya kiintu kiji mwiulu, naangwa kya kiintu kiji pano pa ntaanda ne, naangwa akya kiintu kiji mu meema aji muunshi. ⁵ Keechi mukebafukamine ne naangwa kwiiba poopwela ne, maambo amiiwa, Yehoba Lesa wenu ne Lesa wa mukao. Manyika kukooka kwa bashakulu ne kuleeta kumanyikwa mubisemi, mukisemi kya busatu, ne kya buna kubooba ba mpata. ⁶ Mino kasa mweesha butemwe bubula kwaaluka ku biumbi bya booba bantemwa ne kulama mikaambizho yaami. ⁷ Keechi mukejitoongolenga jizhina ja Yehoba Lesa weenu patuutu ne. Maambo aye Yehoba keechi ukamuleka awa muuntu watoongola jizhina jaanji patuutu ne. ⁸ Kasa muvuluka juuba ja Sabado, mukwiijizhijika kwi amiiwa. ⁹ Mukeengilenga mu mooba atanu ne jimo ne kuuba miingilo yeenu yoonse. ¹⁰ Mino juuba ja butanu na bubiji jo ja Sabado kwi Yehoba Lesa weenu. Kabiji keechi mukeengilengapo mwiingilo naangwa wa byeepi ne, naangwa anweeba beene, naangwa mwaanenu wa mulume, naangwa wa mukazhi, naangwa wa mwiingilo weenu wa mulume, naangwa wa mukazhi, naangwa banyaama beenu, naangwa mweenyi weenu wiikala mu bibelo byeenu ne. ¹¹ Pa mooba atanu ne jimo Yehoba wapaangile jiulu ne taanda, ne kaluunga ka meema, ne byoonse bijimo. Pa juuba ja butanu na bubiji wakookolokele. Onkao maambo Yehoba wapeesheshe juuba ja Sabado ne kwiijizhijika. ¹² Neemeka ba shoobe ne ba inoobe, mooba obe akavule pa ntaanda yo emupa Yehoba Lesa weenu. ¹³ Ku kepayaang'ana ne. ¹⁴ Kuuba bulaale laale ne. ¹⁵ Kwiibila muuntu ne. ¹⁶ Kubeepa bubela ne. ¹⁷ Ku kuubwa nzuubo ya mukweenu ne; ku kuumbwa muka mukweenu ne, naangwa wa mwiingilo waanji wa mulume, naangwa wa mukazhi ne, naangwa ng'oombe waanji, naangwa mboongolo waanji ne, naangwa kiintu kya byeepi kya mukweenu ne." ¹⁸ Baantu boonse pakumona kutatauka kwa mvula ne kubeesha, baumvwiine jiiwi ja luseengo, ne kumona mutuumba byo afutumukilenga bwiishi. Kabiji byo ba mweeneko baantu, bakamine ne kwimeena kwaleepa. ¹⁹ Kabiji ba mwaambijile Mosesa amba, "Ambai kwi atweeba, kabiji ne atweeba tusa kuumvwa: Pakuuba aye Lesa keechi etwaambile ne, twakafwa." ²⁰ Mosesa wa ambijile baantu amba, "Kuchiina ne, maambo Lesa waiya mu kwi mweseka amba muneema wa ku muneemeka ekale mwi anweeba, kabiji mubule kuleenga maambo. ²¹ Keepo baantu baimene kwaleepa, kabiji Mosesa wafwenyenye ku jikuumbi jafiinda mo ajiinga Lesa. ²² Yehoba wa ambile kwi Mosesa amba, "Ukebaambile beena Isalela bino amba: 'Mwaamona byo ne mwaambila kufuma mwiulu. ²³ Keechi mukaleenge balesa ba siliva naangwa ba golide ba kukila pe amiiwa ne, balesa ba siliva naangwa ba golide ne. ²⁴ Mukaampangile kya kusookelapo bitapisho kya maloba, kabiji ne kutapishapo milaambo yeenu ya kusooka, ne milaambo ya kusaambakana ya mikooko yeenu ne ba ng'oombe beenu. Koonse ko nkaleenga jizhina jami kutuumbijikwa, nkeeya kwi anweeba ne kwimipeesha. ²⁵ Kabiji inge mukaampangile kya kusookelapo bitapisho kya jiibwe, keechi mu kekituunge na maabwe a kusoonga ne, maambo inge mwa ingijisha byeela byeenu, mukejipelula. ²⁶ Keechi mwakoonsha kukaanjila ku kyakusookelapo bitapisho ne ko kuuba amba mulekese weenu akabule kumweekana na ne."