¹ Ano o malamuna o ukakoonsha kwiibapa: ² Inge mwaapota wa mwiingilo mu Hebelu, ukeengilanga myaaka itanu ne umo. Kabiji mu mwaaka wa butanu ne bubiji ukaya kwakubula kupanapo kiji kyoonse ne. ³ Inge waishile aye mwiine wafwainwa kuuya muteende pa lwaanji; Inge wasoongolwa, apa mino mukazhaanji wafwainwa kuuya muteende naaye. ⁴ Inge nkambo yaanji wamupa mukazhi kabiji wasemenamo baana ba balume naangwa ba bakazhi, awa mukazhi ne baana baanji bakeekala ke ba kwa nkaambo yaanji, kabiji aye ukafumamo buunke bwaanji ne kuuya. ⁵ Mino inge muzha wa amba patooka amba, "Namutemwa nkaambo yaami, ne mukazhami, ne baana bami; Keechi nsakuya muteende ne." ⁶ Apa mino nkaambo yaanji ukamuleeta kwi Lesa. Nkaambo yaanji ukamuleeta pa kibelo naangwa kujishiki ja kibelo. Kabiji nkaambo yaanji ukamusaba kutwe nakyeela kyakusabilako. Pakuuba wa mwiingilo waanji kimye kyoonse. ⁷ Inge muuntu wapotesha mwaananji wa mukazhi noobe wamwiingilo, keechi wafwainwa kubweela muteende byoonka byuuba wa mwiingilo waanji wa mulume ne. ⁸ Inge wabula kusaanshijila nkaambo yaanji wa kwiisajila aye mwiine. Pakuuba wafwainwa kupokololwa. Keechi uji na luusa lwa kumupotesha ku mukooka wa baantu baangi ne. Keechi uji na loolo luusa ne maambo wa mumanyikile na myeendeleko. ⁹ Inge nkaambo yaanji wamusala amba ekale muko mwaananji, ukamulama noobe mwaananji wa kwiisemena. ¹⁰ Kabiji inge wasoongola mwaana mukazhi mukwaabo, keechi ukaleke kumupa byakuja, bivwaalo, naangwa kuleeka kulaala naanji ne. ¹¹ Inge ne kuuba bino biintu bisatu ne, apa wakoonsha kuuya kwakubula kulipila maali. ¹² Awa yeense waasa muuntu ne kufwa, awa muuntu wafwainwa naaye kwiipaiwa. ¹³ Inge keechi wabeepele kasa abeena kupeembela, mino Lesa wikiswiishishe kumweeka. Kabiji nkemitoongwela ku mpuunzha koonkaya. ¹⁴ Inge muuntu waipaya mukwaabo mujishiinda jatama ja bujimuko, mwakoonsha ku mukwaata, naangwa uji pakyakusookelapo kya Lesa, pakuuba amba afwe. ¹⁵ Awa yeense ukapuma shaanji naangwa inaanji wafwainwa kufwa. ¹⁶ Kabiji awa wiiba muuntu-naangwa ngivi wamupotesha, naangwa wataanwa naanji mukuboko kwaanji kine wafwainwa kwiipaiwa. ¹⁷ Awa ufiinga shaanji naangwa inaanji wafwainwa kwiipaiwa. ¹⁸ Inge baantu baalwa kabiji umo wakozha mukwaabo na jiibwe naangwa na kinkonyi, kya kuuba keechi waafwa ne, mino wakaankalwa kubukwa; ¹⁹ Mino inge wabukwa ne kweenda kwiingijisha mikoombo yaanji, awa wamupumine wafwainwa ku mufweeta pa kumutaila kimye kyaanji ; Kabiji wafwainwa kumona amba wabukwa. Pano awa muuntu keechi wazhaatwa amba waipayaang'ana ne. ²⁰ Inge muuntu wapuma wa mwiingilo waanji wa mulume naangwa wa mukazhi na kiintu, Kabiji inge wa mwiingilo waanji wafwa na maambo a bipumo, byoonkabyo awa muuntu wafwainwa kupanyikwa. ²¹ Byonkabyo, inge wa mwiingilo waikala juuba jimo naangwa abiji kafwaako kushiinkanya ne, maambo ukamanama kwakubula kumweenamo wamwiingilo. ²² Inge baana balume babeena kulwa kabiji bakozha wamukazhi uji na jiimi kyakuuba amba wapulumuna, pano kafwaako kikozha kwi aye ne, awa wazhaatwa wafwainwa kulipila moonka mukaambizhizha mwiina mukazhi, wafwainwa kupaana moonka mwa ambila mitonyi. ²³ Mino inge kya malwa kyamweeka ukapaana buumi pa buumi. ²⁴ Jiinso pa jiinso jikwaabo, jiino pa jiino jikwaabo, kubooko pa kubooko kukwaabo, kuulu pa kuulu kukwaabo. ²⁵ Kusooka pa kusooka kukwaabo, kiloonda pa kiloonda kikwaabo, kwiikozha pa kwiikozha kukwaabo. ²⁶ Inge muuntu wapuma pa jiiso ja wa mwiingilo waanji wa mulume naangwa ja wa mukazhi ne kwi jonauna, pano wafwainwa kumuleka waaya mu muteende ne ku mufweeta pa jiiso jaanji. ²⁷ Naangwa inge wamutebula jiino wa mwiingilo waanji wa mulume naangwa wa mukazhi, kabiji wafwainwa kumukasulula na maambo a jiino. ²⁸ Inge ng'oombe watabula mwaana mulume naangwa wa mukazhi maseengo waafwa, bakamwaasa maabwe, kabiji ne nyaama yaanji keechi bakeija ne; mino ne mwiina ng'oombe ukazhaatishiwa. ²⁹ Inge ng'oombe wajiinga na kisuuse kya konauna kala kabiji inge mwiinaye bamujimwiine keechi wamulamine mukachi ne, kabiji inge ng'oombe waipaile wa mulume naangwa wa mukazhi awa ng'oombe wafwainwa kwashiiwa maabwe, kabiji ne mwiinaye wafwainwa kwiipaiwa. ³⁰ Inge bamutoongwela kya kukuula mweo waanji, awa muuntu ukapaana moonka mobakamutoongwela. ³¹ Inge wa asa mwaana naangwa wamulume naangwa wa mukazhi, mwiina ng'oombe wafwainwa kuuba mooba mutoongwela. ³² Inge ng'oombe watabula wa mwiingilo wa mulume naangwa wa mukazhi, mwiina ng'oombe ukapaana masheekele makumi asatu a siliva, kabiji ne ng'oombe bakamwaasa maabwe. ³³ Inge muuntu washiinkula kiimbo, naangwa wapooya kiimbo kwakubula kushinkapo ne, mwaponena ng'oombe naangwa mboongolo, ³⁴ mwiina kiimbo wafwainwa kulipila byaonaika. Wafwainwa kupaana maali kumwiina nyaama waafwa, ne nyaama ukeekala waanji. ³⁵ Inge ng'oombe wa muuntu wakozha ng'oombe wa muuntu mukwaabo kabiji ne kufwa waafwa, pakuuba bafwainwa kupotesha ng'oombe muumi ne kwabanya muteengo, kabiji bafwainwa kwabana awa ng'oombe waafwa. ³⁶ Mino inge kyayuukanyikwa amba awa ng'oombe wajiinga na kisuuse kya konauna mukimye kyapita, kabiji inge mwiinaye keechi wamusuungilanga mukachi ne, wakoonsha kupaana ng'oombe pa ng'oombe, ne yeewa nyaama ukeekala ke waanji.