¹ Mu ng'oondo wa busatu kufuma ku kimye kyafumine beena Isalela mu Ijipita. Pa joonka ja juuba, bafikile ku kiselebwa kya Sinai. ² Panyuuma yakusha Lefidimu bafikile mu kiselebwa kya Sinai, batebelejile mu kiselebwa kuluutwe ya mutuumba. ³ Mosesa wakaanjijile kwi Lesa. Keepo jiiwi ja Yehoba jaishile kufuma ku mutuumba ne kwaamba amba, "Wafwainwa kubuula ba mu nzuubo ya kwa Yakoba, ne mukooka wa beena Isalela." ⁴ Mwaamona byo naubile kubeena Ijipita, kabiji ne byo ne mupaapile pa byaapi bya kwa mpuungu ne kwi muleeta koonji. ⁵ Onkao maambo, inge mwakookela jiiwi jaami ne kulama lulayaang'ano, pano mukeekala ke kya bunoonshi bwaami kufuma mu baantu, maambo ntaanda yoonse yaami. ⁶ Mukeekala ke bufumu bwa ba ng'aanga ne mukooka wazhila waami. Abino byo byaambo byo wafwainwa kwaamba kubeena Isalela." ⁷ Poonkapo Mosesa waikijile ne kwiibeta bakuluumpe babeena Isalela ne kwi babuula bino byaambo byoonse bya mukaambizhizhe Yehoba. ⁸ Keepo baantu boonse ba mukuumbwile, amba, "Atweeba tusa kuuba byoonse bya amba Yehoba." Poonkapo Mosesa wabweezhezhe jiiwi ja baantu kwi Yehoba. ⁹ Yehoba wamukuumbwile Mosesa, amba, "Nkeeya ko uji mu jikuumbi jafiita maambo a kuuba amba baantu bakoomvwe byo nkesaambanga noobe." Nekukuketekela myaaka yoonse. Keepo Mosesa wa buujile Yehoba byaambo bya ambile baantu. ¹⁰ Yehoba wa mwaambijile Mosesa amba, "Yaanga ku baantu, ukebazhijike ja leelo ne ja keesha bakachaape bivwaalo byaabo. ¹¹ Ba keneengezhezhe jimo maambo pa juuba ja busatu, Yehoba ukeekila ku meeso a baantu boonse poonka pa mutuumba wa Sinai. ¹² Ukebachibile baantu mipaka yoonse yazhookoloka mutuumba ke ya baantu. Ne kw baambila amba jimukai keechi mukaanjile pa mutuumba naangwa kukwaatako ku mupaka ne. Pano bino kukwaata kumutuumba kine mukafwa. ¹³ Kafwaako kubooko kuka mukwaata aye ne, baka mwaasa mabwe naangwa muketo; naangwa nyaama, naangwa muuntu keechi ukeekala na buumi ne. Ntoloompita byo ikavumiishatu baka kaanjile pa mutuumba. ¹⁴ Kabiji Mosesa waikijile kufuma ku mutuumba kuuya ku baantu. Kabiji wi bazhijikile baantu, kwi Yehoba ne kuchapa bivwaalo byaabo. ¹⁵ Kabiji wi baambijile baantu amba: Ineengezhezhai jimo maambo juuba ja busatu keechi mukafweenye kwiipi bakazhi beenu ne." ¹⁶ Pa juuba ja busatu, lukeelo, mvula yatataukilenga ne kubeesha kabiji kwafiinjile ne jikuumbi ku mutuumba, kabiji jiiwi jakosa biingi ja luseengo wa mukooko mulume ja umvwaanyikile kya kuuba amba baantu boonse ba mu kaamba bazakamine. ¹⁷ Keepo Mosesa wa lupwiile baantu mu kifulo kyobatebelejilemo mukumusaambakana Lesa, kabiji baimene muunshi ya mutuumba. ¹⁸ Kabiji mutuumba yeense wa Sinai wafutumukilenga bwiishi maambo Yehoba waikijile poonka na mujilo; bwafutumukile byoonka byuuba bwiishi ku kibili; Mutuumba yeense wasuunkenenga biingi ¹⁹ Ne jiiwi ja luseengo byo jailenga nakuvuma kyakosa biingi, Mosesa wa ambile byaambo kabiji Yehoba wa mukuumbwile na jiiwi. ²⁰ Kabiji Yehoba waikijile pa mutuumba wa Siani, poonka peulu ya mutuumba, Yehoba wa mwiichile Mosesa amba akaanjile pa mutuumba peulu. Keepo Mosesa wakaanjijile ku mutuumba. ²¹ Yehoba wa mwaambijile Mosesa amba, "Ikila yaanga ukebajimune baantu bakeeya ku kaanjila pa mutuumba amba tukamumone Yehoba, maambo bafwainwa konaika. ²² Swiishai ba ng'aanga bakataampe bafweenya kwi Yehoba bezhijike, kuchiina amba Yehoba wakebavuundamina. ²³ Mosesa wa ambile kwi Yehoba amba, "Baantu keechi bakoonshe kukaanjila ku mutuumba wa Sinai ne, maambo anweeba beene mwiitulaile amba 'Mukachiba mipaka ku mutuumba ne kumuzhijika kwi Yehoba." ²⁴ Yehoba wa mwaambijile amba, "Yaanga ikila wiiye naanji Alona, mino keechi wibaleke ba ng'aanga ne baantu keechi bapulumuke mubukaji kwi Yehoba ne. Wakeeya kwi bavuundumukila." ²⁵ Keepo Mosesa waile paanshi ku baantu ne kwi baambila.