¹ Yefelo, ng'anga wabeena Midiana, bako baanji Mosesa, ba umvwiine byoonse byo a ubijile Mosesa ne baantu baanji beena Isalela. Aye wa umvwuune amba Yehoba wafumishishe beena Isalela mu Ijipita. ² Yefelo, bako baanji Mosesa, baseendele Zipola, mukazhaanji Mosesa, panyuuma ya kumutuma ku nzuubo, ne baana baanji ba balume babiji; ³ jizhina ja mwaana wa mulume umo wajiinga Geshoma, ao ye ba ambijile kwi Mosesa amba, "Amiiwa najiinga mweenyi mu ntaanda ya bweenyi." ⁴ Ne jizhina ja mukwaabo jajiinga Elieza, ao Mosesa ye a ambijile amba, "Lesa wa bashaakulu baami wajiinga nkwaansho waami. Aye wampokolweele ku mpooko ya kwa Felo." ⁵ Yefelo, bako baanji Mosesa, baishile na baana bakwa Mosesa ne mukazhaanji kwi Mosesa muungyetu amo mo a tebelejile pa mutuumba wa Lesa. ⁶ Aye wa ambile kwi Mosesa amba, "Amiiwa, shoobe vyaala Yefelo, mbeena kwiiya ko uji na bakazhi boobe ne baana baanji babiji ba balume." ⁷ Mosesa walupukile mukumutuundaila shaanji vyaala, wainamine paanshi kabiji wa mufyoompele. Beimwiine umo ne mukwaabo kabiji keepo batweelele mu teente. ⁸ Mosesa wabujile bako baanji byoonse byaubile Yehoba kwi Felo ne beena Ijipita mukwiimenako beena Isalela, ne pa makatazho onse eba mweekejile mu jishiinda, kabiji ne Yehoba byo ebapokolweele. ⁹ Yefelo wasekejile pa byoonse bya waama Yehoba byo a ubijile beena Isalela, mu kumona kuuba amba aye wibapokolola kufuma mu maboko abeena Ijipita. ¹⁰ Yefello wa ambile amba, "Yehoba a tuumbalale, pakuuba aye wimipokolola anweeba mu mabooko abeena Ijipita kabiji ne mukubooko kwa kwa Felo, kabiji ne kukasulula baantu ku mabooko abeena Ijipita. ¹¹ Pano amiiwa nayuuka amba Yehoba ye mukataampe kukila tu ba lesa toonse, maambo beena Ijipita byo bamanyikilenga beena Isalela na kwi luundumika, Lesa wapokolweele baantu baanji." ¹² Yefelo, shaanji muko waanji Mosesa, waletele mulaambu wa kusooka ne bitapisho bya Lesa. Alona ne bakuluumpe babeena Isalela boonse baishile na kuja kijiilo ku meeso a Lesa na bako baanji Mosesa. ¹³ Pa juuba ja loondejilepo Mosesa waikele paanshi na kuchibila baantu maambo. Baantu ba muzhookolokele kufuma lukeelo kufika ne mabaanga. ¹⁴ Bako baanji Mosesa byo ba mweene byoonse byo a ubijile baantu, wa ambile amba, "Naanchi kiika kyo ubeena kuuba na baantu? Maambo ka kyo waikeela buunke ne baantu boonse kasa ba kuzhookoloka kufuma lukeelo kifika ne mabaanga?" ¹⁵ Mosesa wa ambile ku bako baanji amba, "Baantu beeya kwi amiiwa mukusa jishiinda ja Lesa. ¹⁶ Inge baikala na maambo, beeya kwi amiiwa. Amiiwa mona kutamisha kwa pakachi ka muuntu umo ne mukwaabo, kabiji ne bafuunjisha malamuna a Lesa ne mizhilo ." ¹⁷ Bako baanji Mosesa ba ambile kwi aye amba, "Byo ubeena kuuba keechi byakila kuwaama ne. ¹⁸ Kine mukakooka anweeba beene ne beene, anweeba ne baantu bomuji naabo. Akino kiseendwa kyakila kwi muneemena anweeba. Keechi mukoonshe kwiingila buunke bweenu ne. ¹⁹ Ng'uumvwai. Amiiwa nsakwimupa bukwaasho, kabiji ne Lesa usa kwiikala ne anweeba, maambo obeewa wi wakwiimenako baantu kwi Lesa, kabiji uleeta maambo a baantu ko aji. ²⁰ Obeewa wakoonsha kwi bafuunjisha malamuna ne mizhilo. Wafwainwa kwi babuula jishiinda ja kweendamo ne miingilo ya kwiingila. ²¹ Kubiikapotu, wafwainwa kusala ba balume bafiikilamo kufuma mu baantu boonse, baantu ba neemeka Lesa, baantu bakishiinka bashikwa mazhika kanwa. Wafwainwa kwi ba biika peulu ya baantu, kwiikala ba ntaangi ba pa biumbi, bitoota, makumi ataanu, ne pa makumi. ²² Abo ba kachibila baantu maambo onse, mino maambo a katazha ba ke aleetanga kwi obeewa. Mino maambo a cheeche, bakoonsha kwi a chiba abo beene. Mu jo jo jishiinda kikakupeelela obeewa, kabiji baka seenda pamo ne obeewa. ²³ Inge obeewa wauba kino, kabiji inge Lesa wakukaambizha obeewa kuuba byo byo, keepo obeewa ukakoonsha kushiinda, ne baantu boonse bakakoonsha kuya ku mazubo kasa ba toondwa." ²⁴ Byonka byo Mosesa wa umvwiine byaambo bya bya ambile bako baanji ne kuuba byoonse abya byo ba ambile. ²⁵ Mosesa wasajile baana balume bafikilamo mu Isalela moonse kabiji ne kwibapa bukuluumpe bwa pa baantu, bakutaangijila biumbi, bitoota, makumi atanu, kabiji ne makumi. ²⁶ Ne abo bachibijile baantu maambo moonka mo kyaila. Maambo a katazha batwaajilenga kwi Mosesa, mino abo beene bachibileenga maambo a cheeche onse. ²⁷ Ponkapo Mosesa walekele bako baanji kuya, kabiji Yefelo wabwelele mu ntaanda yaanji