¹ Kijiiji kyoonse kya beena Isalela baimeene lweendo kfuuma ku kiselebwa kya bubi, ne kuloondela mikaambizho ya Yehoba. Bateebelejile ku Lefidimu, mino keechi kyajiinga meema a kutoma baantu ne. ² Byonkabyo baantu ba muneenene Mosesa ne kwaamba amba, "Tupai meema a kutoma." Mosesa wa ambile amba, "Maambo ka o mubeena kuneenena amiiwa? Kiika kyo mubeena ku mweesekela Yehoba?" ³ Baantu bauvvwiine kilaka biingi, kabiji bejizhaang'enye kwi Mosesa. Ba ambile amba, "Maambo ka o mwiitufumishe mu Ijipita? Mukuuba amba mwiitwipaye na kilaka atweeba ne baana beetu ne banyaama beetu?" ⁴ Poonkapo Mosesa wajijile kwi Yehoba amba, " Naanchi amiiwa nsakuuba byeepi na bano baantu? Kabiji beneengezha kuungasa mabwe." ⁵ Yehoba wa ambile kwi Mosesa amba, "Pichila kuluutwe ya baantu, uye pamo na bakuluumpe bamo babeena Isalela. Kasa waseenda mukubooko koobe kamama ko wapumineko pa mukola, kabiji nekuya. ⁶ Amiiwa nkemana ku meeso enu pa jiibwe ku Holeba, ukapume pa jiibwe, kabiji mukafuma meema ne baantu bakatoma." Poonkapo Mosesa waubile byonkabyoku meeso a bakuluumpe babeena Isalela. ⁷ Aye wi itelele aya mpuunzha amba Masa ne Meliba na maambo a kwiijizhaang'anya kwa beena Isalela, ne na maambo ba mweesekele Nkambo pa kwaamba amba, "Bushe Yehoba uji mukachi keetu nyi naangwa ne?" ⁸ Poonkapo bashilikale ba baantu beena Ameleki baishile ne kulukuka Isale ku Lefidimu. ⁹ Byonkabyo Mosesa wa ambile kwi Yoshiwa amba, "Salapo baana balume baamo uye naabo. Mukalwe na beena Ameleki. Keesha amiiwa nkemana peulu ya mutuumba na kamama ka Lesa mu kubooko kwaami." ¹⁰ Byonkabyo Yoshiwa walwiishishe beena Ameleki byonka bya mukaambizhizhe Mosesa, mino Mosesa, Alona, ne Hula baile peulu ya mutuumba. ¹¹ Mosesa byo a imikilenga kubooko kwaanji mwiulu, beena Isalela bashiinjilenga; Inge waponya kubooko kyaanji amba kutuushe, beena Ameleki batatwiilenga kushiinda. ¹² Kubooko kwa Mosesa byo kwa nemene, Alona ne Hula bashikwiile jibwe ne kwijibiika muunshi yaanji amba aye ekalepo. Pa kimye kimootu, Alona ne Hula ba imikilenga kubooko kwaanji mwiulu, muuntu umo kulubaji lwaanji lumo kabiji ne mukwaabo kulubaji lukwaabo. Byonkabyo Mosesa mabooko anji akosele kufikatu ne juuba byo ja ponene. ¹³ Byonkabyo Yoshiwa washiinjile baantu beena Ameleki na mpoko. ¹⁴ Yehoba wa ambile kwi Mosesa amba, "Neemba bino mubuuku kabiji wibitaange ku matwi akwa Yoshiwa omvwe, maambo amiiwa nkazhimaang'anya kuvuluka kwa beena Amaleki pano paanshi." ¹⁵ Keepo Mosesa washimikile kya kusookelapo bitapisho ne kwiikitela amba "Yehoba yo mbaandela yaami." ¹⁶ Aye wa ambile amba, "Maambo kubooko kwaji kusuuntwiwa ku kipona kya Yehoba-amba Yehoba usa kubuusha nkoondo na beena Amaleki kufuma ku kisemi ne kisemi.