¹ Kabiji baantu baimeene lweendo kufuma ku Elimu, kabiji ne kijiiji kyoonse kya beene Isalela bafikile mujiisaka buundenga maambo, jiji pakachi aku Elimu aku Sinai, pa juuba ja bujikumi na butanu ja ng'oondo wa bubiji kufuma ku kimye kyo bafuminemo mu kyaalo kya Ijipita. ² Kabiji ne kijiiji kyoonse kya beena Isalela bejizhang'enye kwi Mosesa ne Alona moonka mu jiisaka. ³ Ne baantu ba mu mukooka wa beena Isalela ba ambile kwi abo amba, "Inge twafwiile ku kubooko kwa Yehoba moonka mu ntaanda ya Ijipita kasa twaikala ku mapuki a nyaama na kuja shiinkwa ne kwiikuta. pakuuba wituleeta muno muungyetu mu kwiipaya kijiiji kyoonse na nzala." ⁴ Keepo Yehoba wa ambile kwi Mosesa amba, "Amiiwa nkemunookeshesha paanshi mvula kufuma mwiulu kwi anweeba. Keepo baantu bakalupukaanga pa juuba pa juuba nkebeseka ne kumona inge bakoonsha kweenda mu mizhilo yaami inyi kana ne. ⁵ Jikeekala juuba ja butaanu na jimo, pakuuba amba bakaneengezhe jibiji kwesakanya na byo baneengezha pa juuba, bakateeka byo baleetele." ⁶ Kabiji Mosesa ne Alona ba ambile ku baantu boonse ba ku Isalela amba, "Pa kimye kya mabaanga musa kuyuuka amba Yehoba ye wimifumishe anweeba mu kyaalo kya Ijipita. ⁷ Pa kimye kya lukeelo mukamona lukuumo lwa Yehoba, ne aye umvwa kwiijizhanya kweenu. Yeetu ba ng'aanyi pakuuba twiijizhang'anye?" ⁸ Mosesa naaye wa ambile amba, "Musa kuyuuka bino inge Yehoba wimupa nyaama pa kimye kya mabaanga ne shiinkwa pa kimye kya lukeelo byayuula-kabiji wa umvwa kwiijizhang'anya ko mwa ambile kwi aye. Ba Alone ne amiiwa bo ba ng'anyi" Kwiijizhang'anya kweenu keechi kuji kwi atweeba ne; kuji ku lubaji lwa Yehoba." ⁹ Mosesa wa ambile kwi Alona amba, "Amba ku kijiiji kyoonse kya baantu beena Isalela, amba, 'Iyai kwiipi kwi aye Yehoba, maambo aye waumvwa kwiijizhang'anya kweenu."' ¹⁰ Kyafikile kimye kya kuuba amba, Alona byo a ambile ku boonse ba mu kijiiji kya beena Isalela, amba batajilenga mujiisaka, kabiji, talai, lukuumo lwa Yehoba lwa mweekele mu jikuumbi. ¹¹ Keepo Yehoba wa ambile kwi Mosesa, amba, ¹² "Amiiwa naumvwa kwiijizhang'anya kwa beena Isalela. Waambe kwi abo amba, 'Pakimye kya mabaanga musa kuja nyama, ne lukeelo mukeekuta na shiinkwa. Kabiji mukayuuka amba yaami Yehoba Lesa weenu."' ¹³ Kyafikile kimye kya kimabaanga kwaishile binteentu ne ku kuumbana kaamba yeense. Lukeelo kime kyazhookolokele kaamba yeense. ¹⁴ Kime byo kya kuunchikile, peulu ya jiisaka pajiinga bya papakana noobe byachiimba paanshi. ¹⁵ Kabiji beena Isalela byo bekimweene, ba ambile beene na beene amba, "Naanchi kika?" Maambo keechi bayuukile byo kyajiinga ne. Mosesa wa ambile kwi abo amba, "Ye shiinkwa ye bemupa kwi Yehoba amba muje. ¹⁶ Auno ye mukaambizho ye be mupa kwi Yehoba amba: 'Musaambakane, umo ne mukwaabo, kipimo kyo mwakoonsha kuja, omela pa muuntu pa muuntu kweesakanya na naambala ya baantu boobe. Bino byo byo musa kwi bibuungizha: Mubuungizhe byaavula byafwainwa kya muuntu yeense uji mu teente weenu."' ¹⁷ Poonkapo beena Isalela baubile byonkabyo. Bamo bapwiijile pamo bavula, baom bapwiijile bacheeche. ¹⁸ Bino byo bapimine na kipimo kya omela, bataine amba aba ba buungizhe bacheeche keechi byashaajilepo ne, ne booba babuungizhe bicheeche keechi babujijilwe ne. Muuntu yeense wabuungizhile byavula kweesakanya na byo a kebeleenga. ¹⁹ Keepo Mosesa wa ambile kwi abo amba, "Kafwaako usa kukoonsha kufumapo ne poso lukeelotu." ²⁰ Naangwa byonkabyo, keechi bamuumvwijile Mosesa ne. Bamo baile bamo baikele kufikatu ne lukeelo, mino byabolele ne mapila ne kunuunka. Poonkapo Mosesa wibazhiinijile. ²¹ Ba buungizhenga kila lukeelo. Muuntu yeense wabuungizhe byavula byo a koonsheshe kuja pa jooja juuba. Juuba byo jaubile kyuuya, bya suungulukile. ²² Jafikile juuba ja butanu na jimo ba olele jibiji, ma omela abiji pa muuntu pa muuntu. Ba ntaangi boonse ba mu kijiiji baishile na ku mubuula Mosesa bino. ²³ Aye wa ambile kwi abo amba, "Abino byo bya amba Yehoba: 'Kesha ke kijiilo kya kukookolokelamo, ke juuba ja Sabaado jazhila kwi Yehoba. Kandulai byo mwakoonsha ku kaandula, kabiji tekai byo mwakoonsha kuteeka. Abya byoonse byashalaapo, mukebituule ke byeenu kufika ne lukeelo. ²⁴ Byonkabyo bebituujile kuumbaji kufikatu ne lukeelo, byonkabyo be bakaambizhe kwi Mosesa. Kabiji keechi byanuunkile ne, naangwa kwiikala na mapila ne. ²⁵ Mosesa wa ambile amba, "Jai leelo, maambo ja leelo keechi jo ja Sabaado ja ku muneemeka Yehoba. Leelo keechi musakwibitaana muungye ne. ²⁶ Muka buungizha mooba atanu na jimo, mino pa juuba ja butaanu na bubiji jo ja Sabaado. pa juuba ja Sabaado keechi kukeekala maana ne." ²⁷ Pa juuba ja butaanu na bubiji bamo baantu balupukile amba ba buungizhe, mino keechi be bitaineko ne. ²⁸ Keepo Yehoba wa ambile kwi Mosesa amba, "Ng'anyi kimye kyo mukaleka kukaana mukaambizho ne mizhilo yaami? ²⁹ Talai, Yehoba wimupa ja Sabaado. Maambo pa juuba ja butaanu na jimo ubeena kwimupa nshiinkwa wa mooba abiji. Muuntu yeense ukekala pa mpuunzha yaanji; kafwaako ukakoonsha kulupuka pa mpuunzha pa juuba ja butaanu na bubiji ne," ³⁰ Onkao maambo baantu bakookolokele pa juuba ja butaanu na bubiji. ³¹ Baantu ba kumukooka wa beena Isalela baichilenga kano kajo amba "Maana." Byajiinga bitooka noobe nkunwa ya bweengo, ne kuumvwanyika noobe bibebulwa byo balenga na buuki. ³² Mosesa wa ambile amba, "Abino byo byakaambizha Yehoba amba: 'Lekai omela wa maana alamiwe bimye byoonse ku baantu kufika ne ku bisemi maambo a kuuba amba bisemi byeenu bikamoneenga shiinkwa ye ne mujishishe mu kiselebwa, panyuuma ya kwi mufumya mu ntaanda ya Ijipita."' ³³ Mosesa wa ambile kwi Alona amba, seenda mpuki ubiikemo omela wa maana mukachi. Ukamulame ku meeso a Yehoba kulamwa kufika ne ku baantu ba mu kisemi." ³⁴ Byonkabyo wa kaambizhe Yehoba Mosesa, Alona walamine lulayaang'ano ne mikaambizho ya jikwaachi. ³⁵ Beena Isalela bajiile maana myaaka makumi ana poso byobafikile mu kyaalo mwajiinga baantu. Bajile kufika ne byo bafikile ku mipaka ya ntaanda ya kenana. ³⁶ Pano omela ke kya bujikumi kya Efa.