¹ Keepo Mosesa ne beena Isalela ba imbile uno lwiimbo kwi Yehoba . Ba imbile amba, "Nsa kwiimba kwi Yehoba , pakuuba wajizhile ntolompita ya muneema; Mbili ne weendapo bataiwa mu kaluunga. ² Yehoba bo bulume bwaami ne lwiimbo, kabiji waikala ke mupulushi waami. Awe ye Lesa waami, kabiji nkamutootanga aye, Lesa wa ba taata, nsa kumutuumbijika aye. ³ Yehoba ye ulwa nkoondo; Yehoba jo jizhina jaanji. ⁴ Waela makalaki akwa Felo ne nzhita yaanji mu kaluunga. Ba kapitao bakwa Felo basalululwa beebebizha mu kaluunga kachila. ⁵ Meema ebazhikile abo; Baile kuunshi kwazhikisha noobe jiibwe. ⁶ Kubooko kweenu kwa kilujo anweeba, 'Yhoba, kwa tuumbijikwa na bulume; Kubooko kweenu kwa kilujo anweeba, Yehoba, kwa zhiindamika balwaanyi. ⁷ Mu bulume bwa lukumo lweenu muponya aba be mwimeena. Mwatumine bukaji bweenu; bwiibaja noobe bishiki. ⁸ Ku muuya wa ku myoona ba yuuzhilemo meema; meema aloondejilenga aimeene muluumbu luumbu pa muluumba; Mazhiba a chiimbile pakaachi ka kaluunga. ⁹ Balwaanyi ba ambile amba, "Nsa kupuupila, nsa kwiibatana, nsa kwiibaja bipuukulwa; Nkasomona mpoko yaami; ne kubooko kwaami kusa kwi bonauna abo. ¹⁰ Mino mwapuile na muuya weenu, ne kaluunga kezhikile naabo; Bashikamine noobe kazhiko mu meema a bulume. ¹¹ Ng'aanyi uji noobe anweeba, Yehoba, pa ba Lesa boonse? Ng'aanyi uji noobe anweeba, lukuumo mu buzhile bweenu, nemekwai mu lutootelo, mu kuuba bya kukumya? ¹² Mwatanyikile kubooko kweenu kwa kilujo, ne ntaanda ibaminyine. ¹³ Mu lulayaang'ano lweenu lwazhila mwataangijile baantu bo mwapokolwele. Mu bulume bweenu mwi bataangijile ku mpuunzha yeenu yazhila ko mwiikala. ¹⁴ Baantu baumvwa, kabiji ke bazakame; Misoongo ikebakwaata bekala mu Filishitiya. ¹⁵ Kabiji mafumu a Edoma a kakilwe; Bashilikale ba ku Moabu bakasuunkena; ne boonse beekala mu Kenana baka zuumbulukamo. ¹⁶ Mooyo ne kwaakamwa bibaponeejile, maambo a kubooko kweenu kwa bulume, basa kuzhiindama nzoo noobe jiibwe kufikatu ne baantu beenu kwiipi, Yeboba-kufikatu ne baantu beenu bo mwa pokolwele bapite. ¹⁷ Musa kwi baleeta ne kwibabyala pa mutuumba wa buswaanyi bweenu, pa mpuunzha, Yehoba, ao ye mwapaanga wa kwiikalamo, pazhila, nkaambo yeetu, amba mabooko enu a shimika. ¹⁸ Yehoba ukeekala pa bufumu myaaka ne myaaka." ¹⁹ Pakuuba ba mbili bakwa Felo ne makalaki anji ne ba pa ba mbili baile mukaluunga. Yehoba wabwezhezhe meema panyuuma a mu kaluunga kwi abo. Mino baantu beena Isalela ba endele mukachi ka kaluunga pa mushiji wauma. ²⁰ Keepo Milyama ngauzhi, nyeenga yaanji Alona, waimbile munsakai, kabiji ne boonse ba bakazhi balupukile na misakai yaabo, kasa bazha naanji. ²¹ Milyama wa ambile kwi abo amba: "Imbai kwi Yehoba, pakuuba watuumbalala. Baambili ne beendapo bataiwa mu kaluunga." ²² Keepo Mosesa wa taangijile beena Isalela kuluutwe kufuma ku kaluunga kachila. Bafumine mu kiselebwa kya Shula. Baendele mu kiselebwa pa mooba asatu ne kutaana meema ne. ²³ Kabiji bafikile ku Maala, mino keechi batomenepo meema ne maambo alujile. Beituumbile aya mpuunzha amba Maala. ²⁴ Pakuuba baantu bejizhaang'enye kwi Mosesa ne kwaamba amba, "Tusa kutoma ka?" ²⁵ Mosesa wajijile kwi Yehoba, kabiji ne Yehoba wamumwesheshe kichi. Mosesa wikitaile ku meema, ne meema atobele a kutoma. Kwajiinga koonka kwa ako Yehoba ko ebapele muzhilo wakosa. ²⁶ Wa ambile amba, "Inge mwaumvwiisha ku jiiwi ja Yehoba Lesa weenu, ne kuuba kyawaama ku meeso anji kabiji inge wapaana kutwi ku mikaambizhi ne kwi ikookle mizhilo yoonse mizhilo yaanji-keechi ukabiikapo bikola abyo byo a biikile pa beena Ijipita ne, pakuuba ne Yehoba wimibukile anweeba." ²⁷ Keepo baantu bafikile ku Elimu, ako kwajiinga masulo jikumi ne abiji atupaukanga meema kabiji ne bichi makumi atanu na abiji a kambiji. Batebelejile kookwa ku meema.