¹ Ponkapo Yehoba wa ambile kwi Mosesa, amba, ² "Amba ku beena Isalela amba baluluke bakatebele ku bwiipi na Pi Hailota, pakaachi ka Migidola ne kaluunga ka meema, kubwiipi na Baela Zetona. Mukatebelele ku kaamba kuumbaji ya kaluunga ka meema katalaang'ana na Pi Hailota. ³ Felo ukaambapo pa beena Isalela amba, 'Babeena kuluulutatu ne kuvulaang'ana mu ntaanda. Kiselebwa kibashiinkila mukachi.' ⁴ Amiiwa nkakosesha muchima wa kwa Felo, kabiiji ukebaloondela. Nkataambula muneema na maambo a kwa Felo ne bashilikale baanji boonse. Beena Ijipita bakayuuka amba amiiwa ne Yehoba." Beena Isalela batebelejile moonka mo bebakaambizhe. ⁵ Mfumu wa beena Ijipita ba mu buujile amba beena Isalela ba boomboka, milaanguluko ya Felo ne bakalume baanji ya alukijile baantu. Ba ambile amba, "Twauba ka? Twaleka beena Isalela amba baye betwiingijila atweeba." ⁶ Pakuuba Felo watolele makalaki anji ne kwi neengezha ne kuseenda bashilikale baanji ne kuya naabo pamo. ⁷ Waseendele makalaki biumbi bitanu na kimo bya salululwa kabiji ne makalaki onse amu Ijipita, ne ba kapitao bao. ⁸ Yehoba wakoseshe muchima wakwa Felo, mfumu wa Ijipita, kabiji ne mfumu wapuupijile beena Isalela. Mino beena Isalela baile ne kufumamo na kuchiinchika. ⁹ Mino beena Ijipita bebaloondejile, pamootu ne ba mbili boonse ne makalaki, kabiji ne baantu ba pa ba mbili, ne bashilikale baanji. Bebataine beena Isalela kasa batebelela kuumbaji ya kaluunga ka meema ku Pi Hailota, kwatalang'ana na Baela Zetona. ¹⁰ Mino Felo byo a fweenyenyeb kwiipi, beena Isalela batajile mwiulu kabiji bakuminye. Beena Ijipita baloondejilenga pa nyuuma yaabo, kabiji bakwachilwe na mooyo. Beena Isalela bajijile kwi Yehoba. ¹¹ Ba ambile kwi Mosesa amba, "Niinshi na maambo a kuuba amba keechi mwajiinga bileende ne, a byo byo wituseendele amba tufwiile mu kiselebwa nyi? Ikika kyo witubila kino, kwitufumya mukyaalo kya Ijipita? ¹² Mino keechi byo byo twakubuujile mu Ijipita ne nyi? Twa ambile kwi obewa amba, 'Tuleke buunke bweetu kasa twiingijila beena Ijipita. Kituwamijile atweeba kwiingijila beena Ijipita kukila kufwiila mu kiselebwa." ¹³ Mosesa wa ambile ku baantu amba, "Kuuba mooyo ne. Imanai nzoo ne kumona kupolokololwa ko asa kwi mumweena Yehoba mujuuba ja leelo. Pakuuba keechi mu kebamonapo jibiji beena Ijipita bo mwamona ja leelo ne. ¹⁴ Yehoba usa kwi mulwiila anweeba, kabiji mwafwainwatu kwiimana nzoo." ¹⁵ Keepo Yehoba wa ambile kwi Mosesa amba, "Maambo ka obewa, Mosesa, o watwajijila kungita amiiwa? Buula baantu beena Isalela bayeenga kulutwe. ¹⁶ Imika nkoonto yoobe mwiulu, ne kwi ifikizha na kubooko koobe pa kaluunga ne kwi abanya pabiji, Pakuuba amba beena Isalela bapite mukachi ka kaluunga pa mushiji wauma. ¹⁷ Muyuuke kuuba amba nsakukosesha michima yabeena Ijipita pakuuba amba bemiloondele panyuuma. Nsakutaambula muneema maambo a Felo ne nzhiita yaanji yoonse ne makalaki anji, kabiji ne ba mbili. ¹⁸ Pakuuba beena Ijipita basa kuyuuka amba amiiwa ne Yehoba inge ntambule muneema maambo a Felo, ne makalaki anji, kabiji ne na ba pa baambili." ¹⁹ Malaika wa Lesa, watangijilenga kaamba wa beena Isalela, waendele ne kwi baloondela panyuuma yaabo. Ne jikuumbi jafumine kwi abo ne kuya na kwiimana pa nyuuma yaabo. ²⁰ Jikuumbi jaishile pakachi ka kaamba ya beena Isalela. Jajiinga jikuumbi jifiita kubeena Ijipita, mino jatookeshenga bufuku ku beena Isalela, pakuuba amba lubaji lumo keechi lwiiye kwiipi na lukwaabo ne bufuku boonse. ²¹ Mosesa watanyikile kubooko kwaanji pa kaluunga. Yehoba wabweezhezhe kaluunga ne mweela mukataampe wa kukabeta abwa bufuku boonse. Kabiji ne kuleenga kaluunga ke mushiji wauma. Mujino jishiinda meema a abeene. ²² Baantu beena Isalela baile pakachi ka kaluunga pa mushiji wauma. Meema apaangile kibaamba kwi abo ku kubooko kwa kilujo kyaabo ne ku kipiko kyaabo. ²³ Beena Ijipita be bapuupijile. Baile panyuuma yaabo pakachi ka kaluunga-boonse ba mbili bakwa Felo, makalaki, kabiji ne beenda pa ba mbili. ²⁴ Mino mu ma awala a lukeelo lukeelo, Yehoba watajile muunshi pa nzhita ya beena Ijipita kupichila mu mashiki a mujilo ne jikuumbi. Aye waleengele lukabisho mukachi ka beena Ijipita. ²⁵ Mawiilo a makalaki abo a kyoombele, ne beenda pa ba mbili kibakateezhe biingi mu ng'eendelo. Beena Ijipita ba ambile amba, "Ubai tufumeeko ku beena Isalela, pakuuba Yehoba ubeena kwi balwiilako na atweeba." ²⁶ Yehoba wa ambile kwi Mosesa amba, "Tanyika kubooko koobe pa kaluunga pakuuba amba meema abweelele beena Ijipita, ne makalaki abo, ne ba pa baambili." ²⁷ Kabiji Mosesa watanyikile kubooko kwaanji pa kaluunga, kabiji meema abweelele byo ajiinga ne pa kukya lukeelo. Beena Ijipita bayuujilwe mu kaluunga, kabiiji Yehoba wibatwaajile beena Ijipita mukachi ka meema. ²⁸ Meema abweelele kunyuuma ne kuzhikilamo makalaki akwa Felo, ba pa ba mbili, kabiji ne nzhita yaanji ya loondejile makalaki mukaluunga. Kafwaako ne wapulukile. ²⁹ Naangwa byonkabyo, ne baantu beena Isalela baendele pa mushiji wauma mukachi ka kaluunga. Meema ajiinga ke kibaamba kwi abo ku kubooko kwa kilujo kabiji ne kukuboko kwa kipiko. ³⁰ Kabiji Yehoba wapulushile Isalela jooja juuba kufuma ku kubooko kwa beena Ijipita, kabiji beena Isalela bamweene beena Ijipita baafwa kukitulu. ³¹ Kabiji beena Isalela ba mweene bulume bukataampe abo Yehoba bo a ingijishe pa beena Ijipita, baantu bachinine Yehoba, kabiji baketekejile Yehoba ne kalume waanji Mosesa.