¹ Amiiwa, byonkabyo, noobe kaili wa Nkambo, nemusaanshijila anweeba kweenda kwafikilamo kwa bwiite bo mwaichilwe. ² Amiiwa nemusaanshijila anweeba kwiikala na kwipeelula ne bukimote ne butekanye, sa mwiteekenya umo ne mukwaabo mu butemwe. ³ Kasa muuba byawaama mukulama kutwatankana kwa Mupashi mu kwikasa pamo kwa muteende. ⁴ Kuji mubiji umo ne Mupashi umo, noobe byonka byo mwaichilwe mu luketekelo lumo lwa bwiite bweenu. ⁵ Kabiiji kuji Nkambo umo, lwiitabilo lumo, lubatisho lumo, ⁶ ne Lesa umo ne Shaanja boonse, ao uji peulu ya boonse ne kupichila mu boonse kabiiji mu byoonse. ⁷ Ku muuntu yeense mwi atweeba buupe bwapaanwa mwaila kipimo kya kyabuupe bwa Kilishitu. ⁸ Kiji byonka bya amba bineembelo amba: " Aye byo a suuntwilwe peulu, aye wataangijile bazha mu buzha, kabiiji wapaine byabuupe ku baantu." ⁹ Kyaluumbulula ka kya kwaamba amba "aye wakanjijile," kufumyako kya kwaamba amba aye waikijile ne mu maande a paanshi nyi? ¹⁰ Awa waikijile ye muuntu umotu wakanjijile peulu peene kukila makuumbi onse, amba a koonshe kuyuuzha biintu byoonse. ¹¹ Kilishitu wapeele baamo kwiikala batumwa, bamo kwiikala ba ngauzhi, bamo ba kutwaala maambo a waama, ne bakwaabo kwiikala basapwiishi ne bafuunjishi ¹² mu kwi baneengezha baantu bazhila ba Lesa mu mwiingilo wa kwiingila, wa kukosesha mubiji wa Kilishitu, ¹³ poso amba atweeba boonse tufike ku kukwaantankana kwa lwiitabilo ne maana a mwaana Lesa, byonka byo amba twiikale bafikilamo ne kufika ku kipimo kya kumuyuukisha Kilishitu. ¹⁴ Kilishitu witushiimika atweeba peulu byonkabyo amba atweeba keechi twiikajijile mu bwaanyike aba bakuumpaulwa kulutwe ne kunyuuma na maanyaki ne, ne kuseendwa na luvula yeense wa mafuunjisho kabiiji na baantu ba bujiimbijiimbi mu byaabo bya maana a bunoonshi. ¹⁵ Mino, kwaamba kishiinka mu buteemwe, twafwainwa kukooma mu mashiinda onse mwi aye waikala ke mutwe, aye ye, Kilishitu. ¹⁶ Kilishitu ushimiika mubiji yeense, kabiiji wanuungakana ne ku kwaantankana pamo na kyoonse ki kwaantankanya manuungi, kabiiji inge kibese kyoonse kyaingijila pamo, akyo kileengela mubiji kukoma byonkabyo amba eshiimike mwiine peulu mu buteemwe. ¹⁷ Byonkabyo, amiiwa na amba ne kwi mubujijisha pa kiikye mwi Nkambo, amba keechi mwafwainwa kweenda noobe bweenda ba Ngentila ne, moonka mwaila maana abo. ¹⁸ Abo bafichishiwa mu kuumvwisha kwaabo, kabiiji beebabanya kufuuma ku buumi bwa Lesa maambo a bulubi abwa buji mwi abo, maambo a kukosa kwa michima yaabo. ¹⁹ Abo keechi baji na buumvu ne kabiiji bepaana abo beene mu bulaale laale, kabiiji booba misaango yoonse ya bunya. ²⁰ Mino abyo keechi byo mwafuunjile pe Kilishitu ne. ²¹ Amiiwa nalaanguluka amba mwaumvwa pe aye, kabiiji naamba mwafuunjishiwe mwi aye, noobe bukishiinka byo buji mwi Yesu. ²² Anweeba mwafuunjishiwe kutuulapo abya byajiinga mu milaangwe yeenu ya bwiikalo bwakala, kutuulapo bu muuntu bwakala. Bo bumuuntu bwakala abwa buji na mazhika kanwa maambo a lusako lwa bya bujiimbi jiimbi lwaabo. ²³ Anweeba mwafuunjishiwe kwiikala ba saangulwa mu Mupashi wa mu milaanguluko yeenu, ²⁴ kabiiji ne kuvwaala bu muuntu bwakatataka abwa bwaleengelwe mu kipsha kya Lesa-mu bololoke bwa kiine ne buzhile. ²⁵ Onkao maambo, fumyaimo bubela, kabiiji lekai muuntu yeense ambe kishiinka na muloongo waanji, maambo atweeba twi bamubiji umo ne mukwaabo. ²⁶ Zhiingilai kabiiji keechi muleenge maambo ne. Keechi muleke juuba jizhike sa mwazhiingila ne. ²⁷ Keechi mupaane jishuuko ku mulwaanyi ne. ²⁸ Awa waibilenga keechi atwaajijile kwiiba ne. Aye wafwainwa kwiingila, kwiingila pa byawaama na mabooko anji, byonkabyo amba akoonshe kwiikala na biintu bya kushiilang'ena na booba bakajilwa. ²⁹ Keechi muleke kwaamba kwatama kufuume mu kanwa keenu ne. Ingijishai byaambo byawaama kutuundaika aba bebisaka, byonka byo amba byaambo byeenu bipaane buupe ku banteeleki. ³⁰ Kabiiji keechi muubishe bulaanda Mupashi Wazhila wa Lesa ne, pakuuba kupichila mwi aye momo mwabikijilwe kayuukilo ka juuba ja kupookololwa. ³¹ Taayai byoonse bya biipa, kuzhiingila kubi, bukaji, lutoobo, ne matuka, pamo ne misaango yoonse yatama. ³² Ikalai ba kwiubila lusa umo ne mukwaabo, ba michima yakooka, kwiilekela maambo umo ne mukwaabo, byoonka byo aji Lesa mwi Kilishitu wimilekejile anweeba.