¹ Mino Saulo, byo a kyaambilenga bya kuchinya nangwa bya kwiipayang'ana kwaambila baana ba bwaanga ba Nkambo, waile kwi ng'anga mukataampe ² ne kumuloomba makalata a mashinagoga mu Damasikasa, byonkabyo amba inge aye wataana muuntu uji yeense wa mujooja jishiinda, nangwa ba balume nangwa ba bakazhi, akakoonshe kwibaleeta sa bakaswa ku Yelusalema. ³ Byo ailenga, kya mweekela amba byo afikiile kwiipi ku Damasikasa, poonkapotu kwamusamijile kyeeya kya muzhookolokele aye kufuuma mwiulu; ⁴ kabiiji aye waponene paanshi ne kuumvwa jiiwi amba, "Saulo, Saulo, kiika kyo ubeena kumanyikila amiiwa?" ⁵ Saulo wakuumbwile amba, "Yeenu ba ng'anyi, Nkambo?" Nkambo wa ambile amba, "Amiiwa ne Yesu, ye ubeena ku manyika; ⁶ mino imana, tweela mu muzhi, kabiiji nsa ku kubula kyo wakoonsha kuuba." ⁷ Ba balume baile na Saulo baimeenetu nzoo kwakubula ne kyaambo, pa kuumvwa jiiwi, mino kumona muuntu ne. ⁸ Saulo waimeene kufuuma paangye, kabiiji byo ashiinkwile meeso anji, keechi wa koonsheshe kumona biji byoonse ne; byonkabyo ba mutaangijile na kubooko ne ku muleeta mu Damasikasa. ⁹ Pa mooba asatu keechi wamweenenga ne kabiiji aye keechi wajiile nangwa kutoma ne. ¹⁰ Pano kwajiinga mwaana wa bwaanga mu Damasikasa wajizhiina ja Ananyasa. Nkambo wa mwaambijile mu kimweesho amba, "Ananyasa!" Aye wa ambile amba, "Monai, amiiwa nji pano, Nkambo." ¹¹ Nkambo wa mwaambijile aye amba, "Imana, uye ku jishiinda jo bateela amba jaoloka, kabiiji pa nzuubo yakwa Yudasa wipuzhe muuntu wafuuma ku Tasusa wa jizhina ja Saulo, pakuuba aye ubeena kuloomba. ¹² Aye wamona mukimweesho muuntu wa jizhiina ja Ananyasa sa eya mukachi ne kuteenteka mabooko anji pe aye, byonkabyo amba akoonshe kumona jibiji." ¹³ Mino Ananyasa wakuumbwile amba, "Nkambo, amiiwa naumvwa ku bavula maambo a uno muuntu, byo a onauna baantu bazhila ba Lesa bavula mu Yelusalema. ¹⁴ Aye unji na luusa kufuuma ku ba ng'anga bakataampe lwa kukasa boonse muno beeta pa jizhiina jeenu." ¹⁵ Mino Nkambo wa ambile kwi aye amba, "Yaanga, pakuuba aye kyo kiingijisho kyaami kyasalwa, ku kuseenda jizhiina jaami ku ba Ngentila ne mafumu ne baana ba Isalela; ¹⁶ Pakuuba amiiwa nka mumweesha aye byo a koonsha kumanama na maambo a jizhiina jami." ¹⁷ Byonkabyo Ananyasa waile, kabiiji watwelele mukachi ka nzuubo. Paku muteenteka mabooko aye, wa ambile amba, "Saulo muloongo wami, Nkambo Yesu, wamweekele kwi obeewa mu jishiinda byo waishilenga, wantuma amiiwa byonkabyo amba obeewa utaambule kumona ne kuyuuzhiwa na Mupashi Wazhila." ¹⁸ Poonkapo biintu bimo biji noobe mabaamba byaponene kufuuma pa meeso a kwa Saulo, kabiiji wamweene jibiji; waimene kabiiji wa batishiwe; ¹⁹ ne aye wajiile kabiiji ba mukoseeshe. Aye waikele na baana ba bwaanga mu Damasikasa mooba avula. ²⁰ Poonkapotu aye wa sapwiijile Yesu mu mashinagoga, ne kwaamba amba aye ye mwaana Lesa. ²¹ Boonse ba mumvwiine bakuminye ne kwaamba amba, "Keechi iye uno muuntu waonawine booba mu Yelusalema baichilenga pa jino jizhiina ne nyi? Waiya kuno na kwibatwaala sa ebakasa ku ba ng'anga bakataampe." ²² Mino Saulo waikele na bulume bukataampe, kabiiji aye waleengelenga kifwe mukachi ka ba Yudea baikalaanga mu Damasikasa na kwiibamweesha amba Yesu kiine ye Kilishitu. ²³ Panyuuma ya kupitapo mooba avula, ba Yudea ba umvwaang'ene pamo kumwiipaya aye. ²⁴ Mino milaanguluko yaabo yayuukanyikilwe kwi Saulo. Balamamine bibelo muute ne bufuku mukuuba amba ba mwiipaye. ²⁵ Mino baana baanji ba bwaanga bamuseendele bufuku ne kumuleka aye kupichila pa kibuumba, sa bamwiikizha mu musaansa. ²⁶ Byo a fikiile ku Yedlusalema, Saulo waesekele kwinuunga na baana ba bwaanga, mino boonse ba muchininenga aye, keechi baswiile amba wajiinga mwaana wa bwaanga. ²⁷ Mino Banabasa wamuseendele ne kuleeta ku batumwa, kabiiji aye wibabujile Saulo byo a mweene Nkambo mu jishiinda kabiiji amba Nkambo wa ambile kwi aye, kabiiji ne Saulo byo a ambile na kuchiinchika mu jizhiina ja Yesu ku Damasikasa. ²⁸ Aye wajiinga naabo, byo bailenga mukachi ne kulupuka kuzhookoloka Yelusalema. Aye wa ambile na kuchiinchika mu jizhiina ja Nkambo Yesu ²⁹ kabiiji wapachikile na ba Yudea ba ku Gileshana; mino abo batwaajijile nakweeseka ku mwiipaya aye. ³⁰ Baloongo byo bayuukile pa kino, abo bamuletele ku Kaesalea ne ku mutuma ku Tasusa. ³¹ Byonkabyo kabiiji, kipwiilo mu Yudea moonse, mu Ngalilea, ne mu Samaliya kyajiinga na muteende kabiiji byashimikilwe; kabiiji, ne kweenda mu mooyo wa kwaakamwa Nkambo kabiiji ne mu lutekenesho lwa Mupashi Wazhila, bipwiilo byavujile. ³² Pano kyafiikile kimye , Petelo waile na kupitang'ana mu maande moonse, wafikile ne kubaantu bazhila ba Lesa baikalanga mu muzhi wa Lida. ³³ Akwa wataine ne muuntu umo wajizhiina ja Aeneasa, ao wajiinga mu mwaanya wanji myaaka itanu ne isatu, pakuuba wajiinga na kalepu. ³⁴ Petelo wa ambile kwi aye amba, "Aeneasa, Yesu Kilishitu wa kubuka obeewa. Imana ansula mwaanya oobe," ne poonkapotu waimeene. ³⁵ Byonkabyo boonse baikalanga mu Lida ne mu Shalona ba mumweene muuntu kabiiji abo ba alulukijile kwi Nkambo. ³⁶ Pano Yopa mwajiinga mwaana wa bwaanga umo jizhiina jaanji Tabita(jituntululwa amba Dokasi"). Uno ineetu wayuujilwe na miingilo ya waama ne byuubilo bya lusa byo a ubujile balaanda. ³⁷ Kyafiikile kimye mu oa mooba amba wabelele kabiiji wafwiile; byo ba moovwele aye, ba muzhiikile mu kibaamba kya peulu. ³⁸ Lida byo ajiinga peepi na Yopa, kabiiji baana ba bwaanga byo baumvwiine amba Petelo wajiinga kookwa, batumineko baana balume babiji kwi aye, na kumusaanshijile aye amba, "Iyai kwi atweeba kwakubula kubaanda ne." ³⁹ Petelo waimeene ne kuuya naabo. Aye byo afikile, bamutwajile mu kibaamba kya peulu, ne ba muka mfwiilwa boonse sa baimana kwiipa ne aye sa bajila, sa ba mumweesha aye mikaangyo ne bivwaalo byo a paangile Dokasi byo ajiinga naabo. ⁴⁰ Petelo wibaluupwilemo bonse mu kibaamba, wafukamine paanshi, ne kuloomba; kabiiji pa kwalulukila ku mubiji, aye wa ambile amba, "Tabita, buuka." Keepo washiinkwile meeso anji, kabiiji pa kumona Petelo waikajile. ⁴¹ Petelo keepo a mupeele kubooko kwaanji ne kumwiimanya; ne byo aichile baantu bazhila ba Lesa ne ba muka mfiilwa, aye wamupaine muumi kwi abo. ⁴² Ano maambo ayuukanyikilwe mu Yopa moonse, kabiiji ne baantu bavula baitabijile Nkambo. ⁴³ Kyamweekele amba Petelo waikajile mooba avula mu Yopa na muuntu wa jizhiina ja Shimona, seendwe.