¹ Pano kwajiinga muuntu umo mu muzhi wa Kaesalea, wa jizhiina ja Koneliasa, mukuluumpe wa kipanyi kyateelwanga amba bashilika ba ku Itali. ² Aye wajiinga muuntu walukookelo, ao wachiinanga Lesa ne ba mu nzuubo yaanji boonse, wapanaanga bya buupe byavula ku baantu, ne kuloomba kwi Lesa mooba onse. ³ Peepi mu awaala wa butanu na ana a mute, aye wa mweene buloongo kimweesho malaika wa Lesa sa eya kwi aye. Malaika wa ambile kwi aye amba, "Koneliusa!" ⁴ Koneliusa wa mutajile malaika kabiiji wa umvwiine mooyo biingi ne kwaamba amb, "Kiika , mwaane?" Malaika wa mwaambijile amba, "Miloombelo yoobe ne buumpanyi boobe byaaya mwiulu noobe kuvuluko kya buumpanyi mu kyeenyi kya Lesa. ⁵ Pano tuuma baantu ku muzhi wa Yoopa ba kaleete muuntu wa jizhina ja Shimona ao ye bateela amba Petelo. ⁶ Aye ubeena kwiikala na muuntu uteelwa amba Shimona, ao uji na nzuubo iji kuunsa ya kaluunga." ⁷ Malaika wa ambile kwi aye byo aile, Koneliusa waichile ba miingilo ya mu nzuubo yaanji babiji, ne mushilika wa muneema ba mu booba ba mupulushishe aye. ⁸ Koneliusa wi babuujile byoonse bya mweekele ne kwi batuma ku Yoopa. ⁹ Pano pa juuba ja loondejilepo pa awaala wa butanu na umo, byo bajiinga pa lweendo lwaabo kabiiji byobafikile kwiipi na muzhi, Petelo waile peulu ya muteenge wa nzuubo na kuloomba. ¹⁰ Keepo aye wa umvwiine nzaala kabiiji wasakile byakuja, mino baantu byo ba kiteekelenga byakuja bimo, kimweesho kyaishile pe aye, ¹¹ kabiiji wa mweene mwiulu mwashiinkuka ne kijilo kekiikile, noobe kisapi kikataampe kibeena kwiiya paanshi pa ntaanda, kwi kituula paanshi na makoonka akyo ana. ¹² Mukachi ka kyo mwajiinga misaango yoonse ya banyama ba maulu-ana kabiiji ne biintu bya kalabaanga pa ntaanda, ne ba ng'onyi ba mwiulu. ¹³ Keepo jiiwi ja ambile kwi aye amba: "Imana, Petelo, wipaya ne kuuja." ¹⁴ Mino Petelo wa ambile amba, "Akyo ne, Nkambo; pakuuba amiiwa kyaangye kujapo akya kyazhila kabiiji kyakoweela ne." ¹⁵ Mino jiiwi jaishile kwi aye ja bubiji: "Akya kyo a tookesha Lesa, keechi wafwainwa kwiteela amba kyakoweela ne." ¹⁶ Akye kya mweekele jisatu; keepo kijiilo poonkapotu be kibwezhezhe mwiulu. ¹⁷ Pano Petelo byo a kizhinaukilenga pa kimweesho akya kyo a mweene byo kyakoonsha kuluumbulula, ponkapo, ba balume bo a tumine Koneliusa baimeene pa kibeelo, panyuuma ya kwiipuzha jishiinda jakuya ku nzuubo. ¹⁸ Abo ba bijikile ne kwiipuzha kana Shimona, ao wateelwanga jikwaabo amba Petelo, waikelenga kokwa. ¹⁹ Petelo byo a kilaangulukilenga pa kimweesho, mupashi wa ambile kwi aye amba, "Tala, baantu basatu babeena ku kusaka obeewa. ²⁰ Imana wikile paanshi kabiiji uye naabo. Keechi uzhinauke kuya naabo ne, maambo amiiwa ne batuma." ²¹ Byonkabyo Petelo waile paanshi ku ba balume kabiiji wa ambile amba, "Amiiwa yaami ye mubeena kusaka anweeba. Kiika kyo mwaishila?" ²² Ne abo ba ambile amba, "Mukuluumpe uteelwa amba Koneliusa, muuntu waoloka kabiiji umo uchiina Lesa, kabiiji uteelwa buloongo ku byaalo byoonse bya ba Yudea, ba mukambizhizhe kwi malaika wazhila kwi mwiita anweeba kwiiya ku nzuubo yaanji, byonka byo amba aye omvwe byaambo kufuuma kwi anweeba." ²³ Byonka byo Petelo wibechile amba batweele mukachi ne kwiikala naanji. Byo bwakiile lukeelo aye waimeene ne kuuya naabo, kabiiji ne baloongo baamo kufuuma ku Yoopa baile naanji. ²⁴ Pa juuba ja loondejilepo bafikile ku Kaesalea. Koneliusa wiiba peembejilenga; aye waichile pamo ne baloongo baanji ne baluunda naanji bakiipi. ²⁵ Kyafikile pa kuuba amba Petelo byo a tweleele, Koneliusa wa musambakeene aye kabiiji waponeene paanshi pa maulu anji mu kumu poopwela aye. ²⁶ Mino Petelo wa mwiimenye, ne kwaamba amba, "Imana! Ne amiiwa ne muuntu." ²⁷ Petelo byo a kyaambilenga naanji, aye waile mukachi kabiiji wataine baantu bavula bapwiila pamo. ²⁸ Aye wibaambijile amba, "Anweeba beene mwayuuka amba kyazhiila muuntu mu Yudea kwivwaanga nangwa kupeempula wa mukoka ungi. Mino Lesa wa mweesha amiiwa amba keechi wakoonsha kuteela muuntu uji yeense amba wabiipa nangwa wakoweela ne. ²⁹ Kyo kyo naishijile kwa kubula kupachika ne, amiiwa byo naichilwe. byonka byo amiiwa ne mipuzha anweeba kiika kyo mwangichiile amiiwa." ³⁰ Koneliusa wa ambile amba, "Mooba ana apita pa yeenka uno awaala, amiiwa na loombelenga pa awaala wa butanu na ana mu nzuubo yaami; kabiiji na mweene, mwaana mulume sa aimana kwi amiiwa mu bivwaalo bisama. ³¹ Aye wa ambile amba, 'Koneliusa, luloombelo loobe Lesa wa umvwa, kabiiji ne buumpanyi boobe bya mu vulula Lesa pe obe. ³² Byonka byo tuuma muuntu ku Yoopa, ba kakwiichile muuntu wa jizhiina ja Shimona, kuunsa ya kaluunga.' ³³ Byonka byo ponkapotu amiiwa ne mwiichile anweeba. Anweeba mwa wamisha pakwiiya. Pano kabiiji, atweeba boonse tuji pano ku meeso a Lesa mu kuumvwa byoonse byo be mukambizhizhe anweeba kwaamba kwi Nkambo." ³⁴ Keepo Petelo wa shiinkwile kanwa kaanji ne kwaamba amba, "Kiine amiiwa nayuukisha amba Lesa keechi usalulula ne. ³⁵ Mino, mu byaalo byoonse awa yeense umwakamwa aye ne kuuba byaoloka waitabilwa kwi aye. ³⁶ Anweeba mwayuuka byaambo byo a tumine ku baantu ba ku Isalela, aye byo a bijikile maambo awaama pa muteende kupichila mwi Yesu Kilishitu, aye Nkambo wa boonse- ³⁷ anweeba beene mwayuuka biintu bya mweekele, byaubiiwe mu Yudea moonse, kutaampila mu Ngalilea, panyuuma ya lubatisho alwa lwa bijikile Yoano; ³⁸ bya mweekele na maambo a Yesu mwiina Nazaala, byo ba mushiingile maanyi aye kwi Lesa na Mupashi Wazhila ne na bulume. Aye wapitang'enenga na kuuba bya waama ne kubuka boonse bo ba manyikile ku mulwaanyi, pakuuba Lesa wajiinga naanji aye. ³⁹ Atweeba twi ba kamonyi ba pa biintu byoonse byaubile Yesu, moonse mu byaalo bya ba Yudea ne mu Yelusalema. Abo ba mwiipaile aye na kumu kujiika pa kiichi, ⁴⁰ mino Lesa wa mubushishe aye pa juuba ja busatu ne kuleemgesha aye kumweekana, ⁴¹ keechi na baantu boonse ne, mino ku bakamonyi basajilwe na kubooko kwa Lesa- na atweeba twajiile ne kutoma naanji panyuuma ya kubuuka aye kufuuma ku baafwa. ⁴² Aye witukaambizhizhe atweeba kusapwiila ku baantu ne kushimuna amba aye ye iye wasajilwe na Lesa kwiikala mutonyi wa boomi ne baafwa. ⁴³ Pe aye ba ngauzhi boonse bashimuna, amba boonse betabila mwi aye bataambula lulekelo lwa maambo kupichila mu jizhiina jaanji." ⁴⁴ Petelo byo a kyaambilenga bino biintu, Mupashi Wazhila waikijile pa boonse batelekelenga ku byaambo byaanji. ⁴⁵ Baantu ba mu jibuumba ja ba mukaanda baitabijile-boonse mu booba baishile na Petelo-bakuminye, maambo buupe bwa Mupashi Wazhila naabo bwaitulukijile pa ba Ngentila. ⁴⁶ Pakuuba ba umvwiine abe ba Ngentila sa baamba mu njimi ne kutuumbijika Lesa. Keepo Petelo wakuumbwile amba, ⁴⁷ "Nanyi muuntu wakoonsha kukaanya meema ku bano baantu byonka byo amba bakoonshe kubula ku batishiwa, abe baantu bataambula Mupashi Wazhila noobe atweeba nyi?" ⁴⁸ Keepo aye wi bakambizhe abo kubatishiwa mu jizhiina ja Yesu Kilishitu. Keepo ba muloombele aye kwiikala naabo mooba avula.