¹ Saulo wajiinga mu luumvwang'ano na lufu lwaanji. Byonkabyo kwatatwiile pa jooja juuba lumanamo lukataampe ku kipwiilo kyajiinga mu Yelusalema, kabiiji ne baitabijile boonse ba palang'enejila mu maande a Yudea ne Samaliya, kufumwakotu batumwa. ² Baantu bakamwa Lesa ba muzhikile Setefana ne kuleenga majiilo akataampe pe aye. ³ Mino Saulo waesekele konauna kipwiilo. Aye wakoonsheshenga kutweela nzuubo pa nzuubo, wafumisheemo ba balume ne ba bakazhi pamo, ne kwi ba biika mukaleya. ⁴ Mino baitabila aba bapalang'enejilemo baile sa basapwiila byaambo. ⁵ Filipa waile ku muzhi wa Samaliya kabiiji wiba sapwiijile Kilishitu. ⁶ Mabuumba a baantu ba fweenyenyenga kwiipi na kuteeleka ku bya sapwiijilwenga Filipa; na milaangwe imo ba muumvwine, ne kumona biyuukilo byo a ubile. ⁷ Mipashi ya koweela yafumiine mu bavula bajiinga naayo, sa bajila na jiiwi jikataampe, kabiiji ne bavula ba kalepu ne balema babukiwe. ⁸ Byonkabyo mwajiinga lusekelo lwiine mu yeewa muzhi. ⁹ Mino mwajiinga mwaana mulume umo mu muzhi ye bateela amba Shimona, ao wajiinga ng'anga; aye wakumishileenga baantu beena Samaliya sa amba'mba kineemanga. ¹⁰ Beena Samaliya boonse, kufuuma ku banyike kufiika ne ku bakuluumpe, ba muumvwiinenga; ba ambile amba, "Awe muuntu bo bulume bwa Lesa abwa bwakila." ¹¹ Ba muumvwiinenga maambo aye wiba kumishele pa kiimye kyaleepa na bu ng'anga bwaanji. ¹² Mino byo baitabijile Filipa byo a sapwiijile maambo a waama a pa bufumu bwa Lesa ne jizhiina ja Yesu Kilishitu, ba batishiwe, ba balume ne ba bakazhi pamo. ¹³ Ne Shimona mwiina waitabijile, kabiiji panyuuma ya kubatishiwa aye waikajile na Filipa kikupu. Byo a mweene tuyuukilo ni miingilo ya bulume sa yuubiwa, aye wakuminye. ¹⁴ Pano batumwa byo ba umvwiine mu Yelusalema amba Samaliya wataambula byaambo bya Lesa, be batumijiile Petelo ne Yoano. ¹⁵ Byo baishile koonka, be baloombejile, amba bakoonshe kutaambula Mupashi Wazhila. ¹⁶ Pakuuba kufiika ne kyo kya kimye, Mupashi Wazhila keechi waishile pe abo ne; ba batishiwe tu mu jizhiina ja Nkambo Yesu. ¹⁷ Keepo Petelo ne Yoano ba teentekele mabooko abo pe abo, kabiiji ba taambwile Mupashi Wazhila. ¹⁸ Pano Shimona byo a mweene amba Mupashi Wazhila wapainwe kupichila mu kuteentekwa mabooko a batumwa, aye wi bapeele mali, ¹⁹ Wa ambile amba, "Mpeenai luno luusa, naalo, amba uji yeense ye na teenteka mabooko ami wakoonsha kutaambula Mupashi Wazhila." ²⁰ Mino Petelo wa mwaambijile amba, "Lekai shilifa weenu onaike pamo ne obeewa, maambo waji kulaanguluka kutaambula kya buupe kya Lesa na mali. ²¹ Keechi uji na lubaji nangwa mwiingilo mu ano maambo ne, maambo muchima obe keechi waoloka na Lesa ne. ²² Onkao maambo lapila ku buno bu ndeenga maambo boobe, ne kuloomba kwi Nkambo, byonkabyo amba aye akoonshe ku ku lekela maambo na maambo a kusaka kwa muchima obe. ²³ Pakuuba amiiwa na mona amba obeewa uji musumu ya luula kabiiji ne mu buzha bwa buumbulwa kooloka." ²⁴ Shimona wa kuumbwile ne kwaamba amba, "Ndoombelaiko kwi Nkambo amiiwa, byonkabyo amba kafwaako byo mwa amba byakoonsha kumweeka kwi amiiwa ne." ²⁵ Byo bashimwiine ne kwaamba byaambo bya Nkambo, Petelo ne Yoano ba bwelele ku Yelusalema, sa ba sapwiila maambo a waama ku mizhi yavula ya mu Samaliya. ²⁶ Pano malaika wa Nkambo wa ambile kwi Filipa, amba, "Imana uyeenga ja kabeeta ka buyeeke ku jishiinda aja jakuunkuluka kufuuma ku Yelusalema kuuya ku Ngasa." (Ajino jishiinda jiji mu kiselebwa.) ²⁷ Aye waimeene ne kuuya. Talai, kwajiinga mwaana mulume kufuuma ku Etiopya, mfumu wa luusa lukataampe muunshi ya Kandake, mfumu wamukazhi wa ku Etiopya. Aye wajiinga na luusa lwa biipe byaanji byoonse. Aye waiya ku Yelusalema mu ku poopweela. ²⁸ Waji kubweelanga ne kwiikala mu ma kalaki anji, kabiiji waji kutaanganga ne ngauzhi Isaya. ²⁹ Mupashi wa ambile kwi Filipa amba, "Yaanga koonka ukeekale kwiipi na ano makalaki." ³⁰ Byonkabyo Filipa wanyemene kuuya ko aji, kabiiji wa muumvwine sa ataanga Isaya ngauzhi, ne kwaamba amba, "Mubeena kuumvwa byo mubeena kutaanga nyi?" ³¹ Keepo aye wa ambile amba, "Nafwainwa byeepi kuumvwa, kwakubula wa ku nkwaasha?" Aye wa mwiichile Filipa kukaanjila mu makalaki ne kwiikala naanji. ³² Pano kibaaba kya bineembelo kyataangulenga mwiina Etiopya kyajiinga kiikye, "Aye wataangijilwe noobe mukooko ku kiipaya, noobe mukooko ku meeso a chiiba mikono uji nzoo, byonkabyo aye keechi washiinkwile kanwa kaanji ne. ³³ Mu bu nchiba maambo bwaanji bwaoloka bwa bu muuntu be bufumishilemo mwi aye. Ng'anyi wafwainwa kuluumbulula kisemi kyoonse kya baana baanji? Pakuuba buumi be bufumishilepo pa ntaanda." ³⁴ Byonkabyo mfumu wa mwipwiizhe Filipa , amba, "Amiiwa na kusaanshijila obeewa, ngauzhi ubeena kwaamba pe ng'anyi, aye mwiine, nangwa muuntu mukwaabo?" ³⁵ Filipa watatwiile kwaamba, kabiiji ne kuteendeka na kino kineembelo aye wa sapwiijile maambo a waama pe Yesu kwi aye. ³⁶ Byo bailenga mu jishiinda, bafikile ku meema amo ne mfumu wa ambile amba, "Tala, paji meema pano. ³⁷ Kiika kiinkanya amiiwa ku batishiwa?" ³⁸ Byonkabyo mwiina Etiopya wakaambizhi makalaki anji kwiimana. Bakuunkulukijile mu meema, Filipa pamo ne mfumu, ne Filipa wa mu batishile aye. ³⁹ Byo batuuntukile kufuuma ku meema, Mupashi wa Nkambo wa museendele Filipa, kabiiji ne mfumu keechi wa mumweenepo jibiji ne, mino wailenga sa asekela. ⁴⁰ Mino Filipa wamweekele ku Asatusa kabiiji waile kupichila ku oa maande, sa a sapwiila maambo a waama ku mizhi yoonse ne byo a fikile ku Kaesalea.