¹ Kiwoowo byo kyapwiila, Paulo waichile baana ba bwaanga kabiiji panyuuma ya kwi batuundaika, wi bashaajikilepo ne kwiibasha ke aye ne ku Makedonya. ² Byo a pichile mu oa maande ne byo a ambile byaamba bya lutuundaiko byavula kwi abo, aye waile ku Ngilisi. ³ Panyuuma ya kwiikala ba ng'oondo basatu kookwa, ba muumvwang'enejile ba Yudea byo a sakile kuvuwa byaato kuuya ku Silya, byonkabyo aye wafuukwile kubweelela ku Makedonya. ⁴ Baile naanji kufiika ne Ashya bajiinga Sopatela mwaana Pilusa kufuuma ku Belea; Alisitakusa ne Sekundusa, boonse kufuuma ku baitabila ba ku Tesalonika; Ngaiusa wa ku Dabe; Timoti; ne Tikikusa kabiiji ne Tolofimusa kufuuma ku Ashya. ⁵ Mino abe ba balume bataangijileko pe atweeba kabiiji betupeembejilenga atweeba ku Toloasa. ⁶ Twavuwile bwaato kufuuma ku Filipai pakupita mooba a ba shiinkwa bakubula mbiizho, kabiiji mu mooba atanu twafikiile ko bajiinga mu Toloasa. Akwa twaikeeleko mooba atanu ne abiji. ⁷ Pa juuba jitaanshi ja muluungu, byo twapwiijile pamo mu kutebula shiinkwa, Paulo wa ambile ku baitabila. Aye walaangulukilenga kuuya juuba ja loondejilepo, byonkabyo aye watwaajijile na byaambo byaanji kufiika ne pakaachi ka bufuku. ⁸ Mwajiinga ma laampi avuula mu kibaamba kya peulu mo twapwiijile pamo. ⁹ Mukipeenze mwaikajile nsoongwalume wajizhiina ja Yutikusa, ao waponeene mutulo tukataampe. Paulo byo a baanjile mu kwaamba, awe nsoongwalume, sa a kilaala, waponeene paanshi kufuuma ku jishimikila ja busatu kabiiji ba mutoolele kasa afwa. ¹⁰ Mino Paulo waile muunshi, wiolweele aye mwiine pe aye, ne ku mukuumbata. Keepo a ambile amba, "Kuzhiingila naangwa pacheeche ne, pakuuba muumi." ¹¹ Kabiiji aye waile peulu jibiji kabiiji watebwile shiinkwa ne kuuja. Panyuuma ya kubaanda naabo kufiika ne kumakya, wafumineko. ¹² Ba mubweezhezhe nsoongwalume muumi kabiiji batekeneshiiwe kine. ¹³ Atweeba beene twataangijileko kuluutwe yakwa Paulo na bwaato ne kuvuwa bwaato kuuya ku Assosa, ko twalaangulukile kutwaala Paulo na bwaato. Akino kyo kyo a sakile aye mwiine kuuba, maambo wa neengezhezhe kuuya paanshi. ¹⁴ Byo etusaambakene atweeba ku Assosa, twamutwaajile aye mu bwaato ne kuuya ku Mitilene. ¹⁵ Kabiiji twavuwile bwaato kufuuma kookwa ne kufiika juuba ja loondejilepo ku kimpelampela na kitulu kya ku Kiosa. Juuba ja loondejilepo twafiikile ku kitulu kya Samosa, ne panyuuma ya juuba jimo twafikile ku muzhi wa Miletusa. ¹⁶ Pakuuba Paulo wafuukwile kuvuwa bwaato kuuya kukila Efisesa, byonkabyo amba abule kutaaya kimye mu Ashya; pakuuba wapeelawizhenga kufiika mu Yelusalema maambo a juuba ja Peentekosita, inge kyajiinga kyakoonsheka aye kuuba byonkabyo. ¹⁷ Kufuuma ku Miletusa aye watumine baantu ku Efisesa ne kwiibatela aye mwiine amba bakuluumpe ba bipwiilo. ¹⁸ Byo baishile kwi aye, wa ambile kwi abo amba, "Anweeba beene mwayuuka amba, kufuuma juuba jitanshi jo na nyaanchile maulu mu Ashya, byo naikeele bimye byoonse ne anweeba. ¹⁹ Amiiwa natwajijile kwiingijila Nkambo na kwiipelula koonse kwa maana ne na mipoolo, kabiiji ne mu meseko a mweekele kwi amiiwa maambo a ku nguvwang'ena kwa ba Yudea. ²⁰ Anweeba mwayuuka byo nabujile kuleka kwaamba kwi anweeba biintu bya byaneema, kabiiji ne byo ne mufuunjishenga mu baantu ne pa nzuubo pa nzuubo, ²¹ mu kushimuuna ku ba Yudea ne ba Ngiliki pamo pa lulapilo kwi Lesa ne ku lwiitabilo mwi Nkambo Yesu. ²² Pano talai, amiiwa mbeena kuuya ku Yelusalema,na kaambizhiwa na Mupashi Wazhila, keechi nayuuka bikamweekela amiiwa kookwa ne, ²³ kufuumyakotu amba Mupashi Wazhila ushimuna kwi amiiwa mu mizhi yoonse amba minyoololo ne kumanama bibeena ku mpeembela amiiwa. ²⁴ Mino amiiwa keechi mona buumi bwaami kuneema kwi amiiwa mwiine ne, kanaatu inge napwiisha kunyeema ne kupwiisha miingilo yo nataambwile kwi Nkambo Yesu, kushimuna ku maambo a waama a buupe bwa Lesa. ²⁵ Pano talai, amiiwa nayuuka amba anweeba boonse, mu booba mo naile na kushimuna bufumu, keechi baka mona kiluungi kyaami ne. ²⁶ Onkao maambo amiiwa mbeena kushimuna kwi anweeba jino juuba, amba amiiwa ne wakaele ku maashi a muuntu yeense. ²⁷ Pakuuba amiiwa keechi nalekele kwaamba kwi anweeba byoonse bisaka Lesa ne. ²⁸ Onkao maambo ikalai bajimuka pe anweeba beene, ne pa mataanga onse ao Mupashi Wazhila o e mitoongwela kwiikala ba bakuluumpe. Ikalai bajimuka ku kufuunga kipwiilo kya Lesa, akyo kyo a potele na maashi anji mwiine. ²⁹ Amiiwa nayuuka amba panyuuma ya kufuumapo kwaami, misuka ikaji ikeeya mukachi keenu anweeba kabiiji keechi ikaleka mataanga ne. ³⁰ Nangwa mwi anweeba beene baantu bakeemana ne kulubaankanya bu kiine ne kufweenyesha baana ba bwaanga kunyuma yaabo ³¹ Byonkabyo ikalai ba kuloonda. Vulukai amba pa myaaka isatu amiiwa keechi nalekele kwi mujimuna anweeba boonse bufuku ne muute na mipolo ne. ³² Pano amiiwa ne mupaana anweeba kwi Lesa ne ku byaambo bya buupe bwaanji, abyo byakoonsha kwi mushimika anweeba ne kwimuupa buswaanyi mu booba boonse babeena kuzhijikwa. ³³ Amiiwa keechi nakumbilwepo shiliva wa muuntu ne, nangwa golode, nangwa kivwaalo ne. ³⁴ Anweeba beene mwayuuka amba ae mabooko aingijile byuubilo byaami ne byuubilo bya booba bajiinga ne amiiwa. ³⁵ Mu biintu byoonse amiiwa ne mupeele kya kumweenako pa byo mwafwainwa kukwaasha ba nekena na kwiingila, ne na byo mwafwainwa kuvuluka byaambo bya Nkambo Yesu, byaambo abya byo a ambile aye mwiine: 'Kyakila biingi mapeesho kupaana kukila kutaambwila."' ³⁶ Panyuuma ya kwaamba mujino jishiinda, aye wafukamine paanshi ne kuloomba naabo boonse. ³⁷ Kwajiinga kujila biingi kabiiji ba mukuumbachile Paulo ne ku mufyoompa. ³⁸ Bajiinga mu bulaanda bavula maambo a byo a ambile, amba keechi ba kakoonsha kumona kiluungi kyaanji jibiji ne. Keepo ba mushiinjikinye ku bwaato.