¹ Kyafiikile kimye Apolosa byo a kijiinga ku Kolinda, Paulo wapichijile ku kyaalo kya peulu ne kuya ku muchi wa Efisusa, kabiiji wataine baana ba bwaanga baamo konka kwa. ² Paulo wa ambile kwi abo amba, "Bushe anweeba mwataambwile Mupashi Wazhila byo mwaitabjile nyi?" Ne ba mwaambijile amba, "Ine, atweeba keechi twa umvwiine po ne pa Mupashi Wazhila ne." ³ Paulo wa ambile amba, "Naanchi muka mo mwa batishiwe?" Ba ambile amba, "Mu lubatisho lwa kwa Yoano." ⁴ Byonkabyo Paulo wa kuumbwile amba, "Yoano wa batishilenga na lubatisho lwa lulapilo. Aye wabuujile baantu amba bafwainwa kwiitabila mu umo ukeeya panyuuma yaanji, mo, mwi Yesu." ⁵ Baantu byo baumvwiine bino, ba batishiwe mu jizhiina ja Nkambo Yesu. ⁶ Kabiiji Paulo byo eba teentekele mabooko anji, Mupashi Wazhila waishile pe abo kabiiji ba ambilenga mu njimi ne kwaula. ⁷ Mu byoonse bajiinga peepi ba balume jikumi na babiji. ⁸ Paulo waile mu shinagoga kabiiji wa ambile na kuchiinchika ba ng'ondo basatu, sa a fuunjisha ne kwi babula pa bufumu bwa Lesa. ⁹ Mino ba Yudea bamo byo ba koseshe ne kubula muneema, abo batatwiile kwaamba byatama bya jishiinda ku meeso a jibuumba. Byonkabyo Paulo wi bashiile ne kuseenda baana ba bwaanga pamo, sa e bafuunjisha mooba onse mu kibaamba kya ku Tailanusa. ¹⁰ Akye kyatwajijile pa myaaka ibiji, byonkabyo amba boonse baikajile mu Ashya baumvwiine byaambo bya Nkambo, ba Yudea ne ba Ngiliki pamo. ¹¹ Lesa waubilenga biintu bya kukumya na mabooko akwa Paulo, ¹² byonkabyo amba nangwa miswala ne tusalu twa munshiingo twa mukwaachile be tutwaajile ku bakolwa kabiiji ne bikola byaabo byapwiile ne mipashi yakoweela ya fuminemo mwi abo. ¹³ Mino kwajiinga ba Yudea basha yuuka baendelenga mu mpuunzha. Baichilenga pa jizhiina ja Nkambo Yesu byonkabyo amba bakoonshe kwiikala na bulume pa ba ndemoona byo ba ambilenga amba, "Na Yesu ao wa sapwiijile Paulo, amiiwa na kukaambizha kulupuka." ¹⁴ Ng'anga mukataampe wa ba Yudea, ao wajiinga na jizhiina ja Shikefa, wajiinga baana ba balume batanu na babiji baubilenga bino. ¹⁵ Mupashi wa biipa wi bakuumbwile amba, "Amiiwa Yesu na muyuuka, ne Paulo na muyuuka; mino anweeba mwiiba ng'anyi?" ¹⁶ Mupashi wa biipa mu muuntu wakilukijile pe ba shayuuka wi bamaka paanshi ne kwi bapuuma. Keepo banyeemenemo mu yooya nzuubo mulekese kabiji na biloonda. ¹⁷ Akino kya yuukanyikilwe ku boonse, ba Yudea ne ba Ngiliki pamo, baikele ku Efisusa. Bakele biingi na mooyo, kabiiji ne jizhiina jna Nkambo Yedsu ja nemekelwe. ¹⁸ Kabiiji, baitabila b avula baishile ne kwisolola ne kuluumbulula biintu byataaama byo baubile. ¹⁹ Bavula baubilenga bingelengezha baletele ma buuku abo pamo ne kwiasoka ku meenso a boonse. Byo ba bapeendele muneema wao , ajiinga biumbi makumi atanu a Silifwa. ²⁰ Byonkabyo byaambo bya Nkambo bya kuumbene koonse mu bulume. ²¹ Pano panyuuma ya kupwa bino biintu, Paulo walaangulukile mu Mupashi kupichila mu Makedonya ne mu Akaya pa lweendo lwaanji lwa ku Yelusalema; aye wa ambile amba, "Panyuuka ya kwiikala koonka, amiiwa nafwainwa ne kumoona Loma." ²² Paulo watumine ku Makedonya babiji mu booba ba mupulushile, Timoti ne Elasitusa. Mino aye mwiine waikajile mu Ashya pa kiimye kiipi. ²³ Pa kyo kya kiimye keechi kwajiinga kulubaankana nangwa kucheeche mu Efisusa pa maambo a jishiinda ne. ²⁴ Seendwe umo wa silifwa uteelwa amba Demetiliusa, wapaangile bilubi bya Atemisa, waletele biingi busulu ku baseendwe ba bankishi. ²⁵ Byonkabyo wabuungizhe pamo ba balume ba yooya miingilo ne kwaamba amba, "anweeba baana balume, mwayuuka amba mu buuno busulu tupaanga maali avula nyi. ²⁶ Mwamona ne kuumvwa amba, keechi mu Efisusa tu ne , mino peepi ne mu Ashya moonse, awe Paulo waongola ne kwaalula baantu bavula. Aye ubeena kwaamba amba ba lesa ba kuleenga na mabooko keechi ba lesa ne. ²⁷ Keechi mujitu lukatazho lwa busulu bweetu amba busa kusuulwa ne, mino amba ne tempele wa ba lesa ba Atemisa wakoonsha kutalwa noobe watuutu, kabiiji ne buwaame bwaanji bwakoonsha kwiikala bwatuutu, aye ye ba poopwela beena Ashya boonse ne ntaanda." ²⁸ Byo baumvwiine bino, bayuujilwe na bukaji ne kubijika, amba, "Wakiila ke Atemisa wa beena Efisesa." ²⁹ Muzhi yeense wakuumbene na makatazho, kabiiji ne baantu nyeemene na milaangwe imo kuya mu teata. Bakwaachile bakwaabo na Paulo bo a endaanga naabo, Gayusa ne Alisatakusa, abo bafuumine ku Makedonya. ³⁰ Paulo wasakile kutweela mukachi kupichila mu jibuumba ja baantu, mino baana ba bwaanga ba mukanyishile. ³¹ Kabiiji, ba biloolo bamo ba mu Ashya bajiinga bakwaabo ba mutumine sawakya wa kumusaanshijila aye kubula kutweela mu teata. ³² Baantu baamo babijikilenga kiintu kimo, ne bamo kikwaabo, pakuuba jibuumba jajiinga mu lukatazho. Bavula keechi bayuukile nangwa ene maambo o baishijile pamo ne. ³³ Bamo ba mu jibuumba ba mukwaashile Alekisanda, ao ye ba shiinjikilenga kuluutwe. Byonkabyo Alekisanda waendele na mabooko anji, mukusaka kuuba amba apaane kya kwiimenako ku jibuumba. ³⁴ Mino byo ba muyuukile amba wajiinga mu Yudea, boonse babijikile peepi ma awaala abiji na jiiwi jimo, amba, " Wakiila ke Atemisa wabeena Efisesa." ³⁵ Muneembeshi byo a zhiindamikile jibuumba, aye wa ambile amba, " anweeba baana balume beena Efisusa, ng'anyi wa mulume ujiko ao wabula kuyuuka amba muzhi wabeena Efisesa ye kalama wa tempele ya Atemisa wakila kabiiji wa kikope kyaponene kufuuma mwiulu? ³⁶ Pa kwi bimona amba abye biintu keechi bya kukaana ne, wakoonsha kuzhiindama kabiiji na kubula kuuba byalubilo ne. ³⁷ Pakuuba anweeba mwaleeta baano baantu kuno ku kiije abo babula nangwa bangivi ba tempele nangwa kweendeleka lesa weetu. ³⁸ Onkao maambo, inge Demetiliusa ne baseendwe baji naanji baji na maambo a kuupa uji yeense, biije bya shiinkulwa kabiiji kuji ne baleengele mizhilo. Balekai be shinawine umo ne mukwaabo. ³⁹ Mino inge mubeena kusaka biji byoonse kabiji, bya fwainwa kupwiila mu kusaambakana jibuumba. ⁴⁰ Pakuuba tuji mu bulemo bwa kupeewa maambo a kupanga malwaang'ano leelo, kabiiji keechi kuji kyaleengela kyo twakoonsha kupaana mu kupaana bu kamonyi bya bino byoongo ne." Byo a ambile bino, aye wapalaang'enye jibuumba.