¹ Byo kyafikile kimye mu Ikonyuma Paulo ne Banabasa batwelele pamo mu shinagoga waba Yudea ne kwaamba mu jishiinda jakuuba amba jibuumba jikataampe ja ba Yudea pamo ne ja ba Giliki baitabijile. ² Mino ba Yudea aba babujile lukookelo bakolomweene milaangwe ya ba Ngentila ne kwi balengesha kwi batala bibi ku baloongo. ³ Byonka byo baikele kookwa kimye kya baya, sa baamba na kuchiinchika na buluume bwa Nkambo, aye kasa e bapa biyuukilo pa maambo a buupe bwaanji. Aye waubile bino na kwiibapa biyuukilo ne bya kukumya bikoobiwa na mabooko a kwa Paulo ne Banabasa. ⁴ Mino baantu ba mu muzhi ba abeene; bamo kulubaji lwa ba Yudea, bakwaabo na batumwa. ⁵ Boonse ba Ngentila ne ba Yudea (pamo na ba ntaangi baabo) ba esekele kwi bakatazha ne kwi baasa mabwe, ⁶ mino byo bekiyuukile bukiji, abo banyeemejile ku mizhi ya ku Likaonyana ya Lisitila ne Delebe, ne mu maande a zhookolokele, ⁷ ako ko batwaajijile kusapwiila maambo awaama. ⁸ Ku Lisitila muuntu umo waikele, wabujile ngovu mu maulu anji, kileema kufuuma muunda ya ba inaanji, wabujilepo kweenda. ⁹ Awe muuntu wa umvwiine Paulo sa amba. Paulo byo a futulwijile meeso anji pe aye kabiiji wamweene amba aye wajiinga na lwiitabilo lwa kuleengwa mutuuntulu. ¹⁰ Byonkabyo aye wa mwaambijile na jiiwi jikataampe amba, "Imana ku maulu obe." Keepo muuntu watolokele ne kuzhookoloka. ¹¹ Ne jibuumba byo jamweene Paulo byo a ubile, ba saanswiile maawi abo, ne kwaamba mu Kilikonya amba, "Ba lesa ba aluka noobe baantu ne kwiiya paanshi kwi atweeba." ¹² Ne abo baichile Banabasa amba "Zeusa," ne Paulo amba "Hamesa," maamba aye ye wajiinga ng'ambi mwiine. ¹³ Ng'anga wa kwa Zeusa, ao wajiinga na teempele waanji kiipi paangye ya muzhi, waleetele ba ng'ombe balume ne miinchinya koonka kubibelo; aye ne mabuumba ba sakileenga kupaana bitapisho. ¹⁴ Mino batumwa, Banabasa ne Paulo, byo ba umvwiine kino, batabwiile bivwaalo byaabo ne kuuya bukiiji mu jibuumba , sa babijika amba, ¹⁵ "Anweeba baantu, kiika kyo mubeena kuubila biibye biintu? Ne atweeba twi baantu baji na milaanguluko pamo ne anweeba. Atweeba tubeena kwi mubuula maambo a waama amba mwafwainwa kwalukula kufuuma ku biibye biintu bya tuutu ne kwalukila kwi Lesa wa buumi, waleengele meulu, ne ntaanda, ne tuluunga ne byoonse bijiimo. ¹⁶ Mu myaaka yapita, waswiishishe byaalo byoonse kweenda mu mashiinda aabo beene. ¹⁷ Mino nangwa byonkabyo, aye keechi wishiile mwiine kwa kubula bukamonyi ne, mu byo bya bo a ubile byawaama ne kwi miipa mvula kufuuma mwiulu ne kimye kya kaajo kavula, sa muyuuzha michima yeenu na kaajo ne lusekelo." ¹⁸ Nangwa na biibye byaambo, Paulo ne Banabasa batwajijiile ku kaanya mabuumba kubula kutapisha kwi abo. ¹⁹ Mino ba Yudea bamo kufuuma ku Antioka ne ku Ikoniuma baishile ne koongola mabuumba. Ba mwaashile Paulo mabwe ne ku mukulumwiina paangye ya muzhi, ba laangulukile amba waafwa. ²⁰ Mino baana ba bwaanga ba muzhookolokele aye, aye wa buukile ne kutweela mu muzhi. Juuba ja loondejilepo, aye waile ku Delebe na Banabasa. ²¹ Panyuuma ya kusapwiila maambo awaama mu yeewa muzhi ne kuleenga baana ba bwaanga bavula, abo ba bwelele ku Lisitila, ku Ikoniuma ne ku Antioka. ²² Ne abo batwajijile na kukosesha mweo ya baana ba bwaanga ne kwi batuundaika kutwajijila mu lwiitabilo, amba, "Atweeba twafwainwa kutweela mu bufumu bwa Lesa kupichila mu byalumanamo byavula." ²³ Byo be batoongwejile abo bakuluumpe mu bipwiilo byoonse, kabiiji ba loombele na kuzhiikilwa na nzaala, be bafikizhe abo kwi Nkambo, mu yeenka ye baitabijile. ²⁴ Keepo bapichile mu Pisidiya ne kwiiya ku Pamfiliya. ²⁵ Byo ba ambile byaambo mu Pelega, ba kuunkulukile ku Atalya. ²⁶ Kufuuma kookwa bavuwile bwaato kuuya ku Antioka, ako ko bepaine ku buupe bwa Lesa pa miingilo yo ba pwiishishe. ²⁷ Byo bafikile mu Atioka ne kupwiizha kipwiilo pamo, ba luumbulwile byoonse biintu Lesa byo ebobijile abo, ne byo e bashiinkwijile ba Ngentila kibelo kya lwiitabilo. ²⁸ Baikele kimye kya leepa na baana ba bwaanga.