¹ Pano nasaka kwi miyuukisha anweeba, baloongo, maambo awaama o nasapwijile kwi anweeba, o mwataambwile kabiiji apo po mwaimana, ² kabiiji po mubeena kupulukila, inge mwakwachisha ku byaambo o na sapwile kwi anweeba, keechi muketabila kyatuutu ne. ³ Pakuuba amiiwa naleetele kwi anweeba noobe bitaanshi bya neema byo nataambwile ne amiiwa, amba Kilishitu wafwiijile maambo etu moonka mwaila bineembelo, ⁴ amba wazhiikilwe, kabiiji amba wabuushiwe pa juuba ja busatu moonka mwaila bineembelo. ⁵ Kilishitu wa mweekele kwi Kefasa, kabiiji ne ku ba jikumi na babiji; ⁶ kabiiji wa mweekele ku baloongo bakiila pa bitoota bitanu pa kiimye kimotu. Ne bavula mwi abo bakiji boomi, mino bamo ba poneena mutulo. ⁷ Keepo a mwekele kwi Yakoba, kabiiji ne batumwa boonse. ⁸ Kyapelako ku byoonse, aye wa mweekele kwi amiiwa, noobe ku umo waseemwa kya kupulumuka. ⁹ Pakuuba amiiwa napelako ku batuumwa, Amiiwa keechi nafwainwa kuteelwa amba mutuumwa ne maambo na manyikile kipwiilo kya Lesa. ¹⁰ Mino na buupe bwa Lesa nji byo nji, kabiiji buupe bwaanji mwi amiiwa keechi bwajiinga bwatuutu ne, Mino, amiiwa naingijile na buluume kukila ne abo boonse. Mino keechi wajiinga amiiwa ne, mino buupe bwa Lesa abwa buuji ne amiiwa. ¹¹ Byonkabyo nangwa amiiwa nangwa abo, byonkabyo tusapwila kabiiji byonkabyo mwaitabile. ¹² Pano inge Kilishitu wa sapwilwa amba wabushiiwe kufuuma mu baafwa, baamo mwi anweeba bafwainwa kwaamba byeepi amba kafwaako lusaanguko lwa baafwa? ¹³ Mino inge kafwaako lusaanguko lwa baafwa, nanchi nangwa Kilishitu keechi wabushiiwa ne; ¹⁴ kabiiji inge Kilishitu keechi wabushiiwa ne, nanchi kusapwila kweetu kwatuutu, ne luketekelo lweenu naalo lwatuutu. ¹⁵ Kabiiji, twataanwa kwiikala ba tumoonyi ba bubela pe Lesa, maambo twa amba'mba Lesa wabushishe Kilishitu kufuuma mu baafwa. Mino keechi wa mubushishe ne, inge kya kiine baafwa keechi ba bushiwa ne. ¹⁶ Pakuuba inge kya kiine baafwa keechi ba bushiwa ne, nangwa Kilishitu inge keechi wabushiwa ne; ¹⁷ kabiiji inge Kilishitu keechi wabushiwa ne, luketekelo lweenu lwatuutu kabiiji mukiji mu bubi bweenu. ¹⁸ Ne booba ba poneena mutuulo mwi Kilishitu naabo baonaika. ¹⁹ Inge moonka mu buuno buumi tuketekela mwi Kilishitu, ku baantu boonse atweeba twakilamo kubilwa bulanda. ²⁰ Pano mino Kilishitu wabushiwa kufuuma mu baafwa noobe kipaangwa kitaanshi kya booba balaala. ²¹ Pakuuba maambo luufu lwaishile na muuntu, ne ku muuntu naako kwaishile lusaanguko lwa baafwa. ²² Pakuuba noobe mwi Adama boonse bafwa, byonkabyo ne mwi Kilishitu boonse ba kaleengwa ke boomi. ²³ Mino umo umo mundoonda yaabo: Kilishitu, aye kipaangwa kitaanshi, kabiiji ne booba bakwa Kilishitu bakaleengwa boomi pa kwiiya kwaanji. ²⁴ Keepo ikeekala mpeelo, byo aka lubula bufumu kwi Lesa Taata, byo akafumyapo mizhilo yoonse kabiiji ne luusa loonse ne buluume. ²⁵ Pakuuba wafwainwa kwiikala pa bufumu kufiika ne byo akabiika balwanyi baanji boonse muunshi ya maulu anji. ²⁶ Mulwanyi ukapelako konaulwa ke lufu. ²⁷ Pakuuba "aye wabiika byoonse muunshi ya maulu anji." Mino inge kya ambiwa amba "aye wabiika byoonse," kya luumbuluka amba kino keechi kyabiikako ne aye ubiika byoonse mukwibipaana muunshi yaanji. ²⁸ Biintu byoonse inge byapaanwa muunshi yaanji, keepo ne mwaana mwiine ukepaana muunshi ya yeewa ubiika biintu byoonse mu luusa munshi yaanji, amba Lesa akoonshe kwiikala byoonse mu byoonse. ²⁹ Nangwa aba bakooba ka aba ba batishiwa baafwa? Inge baafwa keechi basaangulwa nangwa jiimo ne, kika kyo be ba batishila abo? ³⁰ Kika kabiiji kyotwaikela mu buleemo biimye byoonse? ³¹ Amiiwa mfwa mooba onse! Akino kya kiine kiji noobe kya kwitootelamo kyami mwi anweeba, kyonji naakyo mwi Kilishitu Yesu Nkambo yeetu. ³² Nkamweenamo ka, mu buuntushi, inge na lwiile na biijanyi ku Efisusa, inge baafwa keechi ba bushiwa ne? "Lekai atweeba tuuje ne kutooma, pakuuba keesha tukafwa." ³³ Keechi mujiimbaikwe ne: "Kweenda na batama konaula miilangwe ya waama." ³⁴ Tekanyai! Ikalai mu bololoke! Keechi mutwajiijile kuleenga maambo me. Pakuuba baamo mwi anweeba keechi baaji na maana a Lesa ne. Na amba kino mu kwi mileengesha buumvu. ³⁵ Mino umo ukaamba amba, "Baafwa ba bushiwa byeepi, kabiiji ne mibiji yo bakabukilamo pa kwiiya ikeekala byeepi?" ³⁶ Obeewa wabula maana! Byo ubyaala keechi bikeekala na buumi ne kanatu byafwa. ³⁷ Kyo ubyaala keechi ye mubiji wikalako ne, mino ke lukunwa upaanga. Kyafwainwa kwiikala wichi nangwa bikwaabotu. ³⁸ Mino Lesa ukekipa mubiji ye asala mwiine, ne kila lukuunwa mubiji wanji. ³⁹ Mibiji yoonse keechi iji paamo ne. Mino, kuji mubiji umo wa baantu, ne mubiji mukwaabo wa banyama, kabiiji mubiji mukwaabo wa ba ng'onyi, ne mukwaabo wa masabi. ⁴⁰ Kuuji ne mibiji ya mwiulu ne mibiji ya pa ntaanda. Mino lukuumo lwa mibiji ya mwiulu ingi kabiiji ne lukuumo lwa mibiji ya pa ntaanda luungi. ⁴¹ Kuji lukuumo luumo lwa juuba ne lukuumo lukwaabo lwa ng'ondo,kabiiji ne lukuumo lukwaabo lwa tubaangabaanga. Pakuuba kabaanga baanga kamo kapusaana na ka kwaabo mu lukuumo. ⁴² Byonkabyo byobiji ne lusaanguko lwa baafwa. Kibyalwa kyonaika, kabiiji ne kya bushiiwa keechi kyonaika ne. ⁴³ Kibyaalwa mu buumvu; ki bushiiwa mu lukuumo. Kibyaalwa mu kunekena; ki bushiiwa mu buluume. ⁴⁴ Kibyaalwa na mubiji wa bu muuntu; ki bushiiwa na mubiji wa mupashi. Inge kuji mibiji wa bu muuntu, kuji ne mubiji wa mupashi. ⁴⁵ Byonkabyo kabiiji kyaneembwa amba, "Muuntu mutaanshi Adama waikeele ke mweo muumi." Adama wapeelako waikeele ke mupashi wa kupaana buumi. ⁴⁶ Mino bu mupashi keechi bwaishile pataanshi ne kana bu muuntu, kabiiji keepo bu mupashi ⁴⁷ Muuntu mutaanshi ye wa pa ntaanda, waleengelwe ku lukuungu. Muuntu wa bubiji wafuumine mwiulu. ⁴⁸ Byonka biji awa waleengelwe kufuuma ku lukuungu, kabiiji noobe muuntu wa mwiulu byo aji, byonkabyo ne booba ba mwiulu byobaji. ⁴⁹ Byonkabyo twaleengelwe mu kipasha kya muuntu wa ku lukuungu, ne atweeba tukeekala na kipasha kya muuntu wa mwiulu. ⁵⁰ Pano na amba kino, baloongo, awa mubiji ne mashi keechi byakoonsha kuswaana bufumu bwa Lesa ne. Nangwa akya kyaonaika kuswaana akya kibula konaika ne. ⁵¹ Talai! Amiiwa ne mibuula kya fyamika: Boonse keechi tukalaala ne, mino boonse tukakiingishiwa. ⁵² Tukakiingishiwa mu kiimye kicheeche, mu kukoopa kwa jiiso, pa ntoolompita ikapeelako. Pakuuba ntoolompita ikajiila, ne baafwa ba kabushiiwa kwa kubula konaika, kabiiji tukakiingishiwa. ⁵³ pakuuba uno mubiji onaika wafwainwa kuvwaala ubula konaika, kabiiji uno muiji ufwa wafwainwa kuvwaala ubula kuufwa. ⁵⁴ Mino inge uno mubiji onaika wavwaala ubula konaika, kabiiji inge uno mubiji ufwa wavwaala ubula kuufwa, keepo kukeeya ng'ambilo aya yaneembwa amba, "Lufu be lumiina mu lushiinjilo." ⁵⁵ Lufu, kushiinda koobe kujipi? Lufu, lumuna obe ujipi?" ⁵⁶ Lumuna wa lufu bundeenga maambo, ne bulume bwa bundeenga maambo ye muzhilo. ⁵⁷ Mino saante ekale kwi Lesa, aye witupa lushiinjilo kupichila mwi Nkambo yeetu Yesa Kilishitu! ⁵⁸ Byonkabyo, bateemwe baloongo baami, ikalai bakosa ne kusuunkena ne. Joonse mukelukenga mu mwiingilo wa Nkambo, maambo mwayuuka amba miingilo yeenu mwi Nkambo keechi ya tuutu ne.