¹ Londai butemwe ne kwikala na kizaku nabya bupe bya bumupashi , kiikataakata mba mwaule na mupashi. ² Maambo awa umo waamba kwi Lesa. Maambo kafwako umumvwa ne maambo waamba byabfyamika bya mupashi. ³ Pakuba awa waula waamba kubantu maambo wibakomesha, kwibatundaika , ne kwibatekenesha. ⁴ Awa waamba munjimi wikomesha mwine, pakuba awa waula ukomesha kipwilo. ⁵ Kabiji nasaka naamba anwe bonse mwambe munjimi. pano ne kyakila nasaka naamba, mwaule na mupashi. Awa waula wakila yewa waamba munjimi (poso paikala umo wakwibilumbulula mba kipwilo kikome) ⁶ Pano kabiji, balongo bami, inge naiya kwi anweba sangamba munjimi, kika kyo mukamwenamo? ke nakonsha ne, kanatu nemwambila mulumwekesho, nangwa mu maana nangwa mu bungauzhi, nangwa mu lufunjisho. ⁷ Umvwe byansa byabula bumi bibena kuvuma nobe kinkunkubele nangwa nobe kyansa_ kabiji ne kufuma mawi apusana ne, pano ao muuntu ukayuka byepi amba jo jiwi ja kinkunkubele nangwa amba jo jiwi ja kyansa jibena kwimba? ⁸ Maambo umvwe ntolompita beimba kimbeimbe, Bushe muuntu wakonsha kuyuka byepi kimye kyakwimunengezhelamo mukondo? ⁹ Pano kiji kwi anweba. umvwe mwaamba byambo byabula kumvwanyika, bushe muuntu ukekyumvwa byepi byo mwaamba? mukambanga, mino kafwako ukemyumvwanga ne. ¹⁰ Kafwako luzhinauko namaambo a misango ne misango ya milaka iji panopantanda ibula kumvwanyika ne. ¹¹ Kabiji inge nabula kuyuka mo aila mulaka, nkekala mwenyi ku yewa ubena kwamba, kabiji ne yewa waamba naye ukekala mwenyi kwi amiwa. ¹² Pano kiji kwi anweba_ pakuba byo mwasakisha kwikala na bupe bwa bumupashi, esekeshai kukizhamo mu bya bupe bikomesha kipwilo. ¹³ Byonkabyo awa ulomba mujimi alombe amba ayuuke mwakulumbulwila. ¹⁴ Maambo inge nalomba munjimi, mupashi wami ulomba, pakuba maana ami kechi amwenamo kintu ne. ¹⁵ Nanchi ngube ka? nsakulomba na mupashi wami kabiji nsakulomba na maana ami. nsakwimba na mupashi wami, kabiji nsakwimba na maana ami. ¹⁶ Byonkabyo umvwe mwasanta kwi Lesa na mupashi, nga awa muuntutu ukamba byepi amba "Amena" samweena kupana lusanchilo inge kechi wayuuka mwena kwaamba n? ¹⁷ Maambo anweba mufikizha kusanta bulongo saana, mino mukwenu muuntu kechi mwamukomesha ne. ¹⁸ Namusanchila Lesa maambo ne mukila bonse kwaamba munjimi. ¹⁹ Mino mukipwilo nakonshe kutemwa kwaambatu nangwa byambo bitanatu byo naumvwa amiwa mwine pakuba mba ntangijile bakwetu, kukila kwaamba byaambo byiumbi jikumi myabo munjimi. ²⁰ Balongo bami, kange mwikale nobe banyike mumilanguluko yenu ne. pakuba, mu bubi mwikale balukeke.Mino mwikale bakoma mumilanguluko. ²¹ Mu mizhilo kya lembwa amba, "Na bantu ba njimi ingi ne na byatunwa bingi nkebambila bano baantu. Nangwa byonkabyo kechi bakanguvwa ne," byo aamba nkaambo. ²² Byonkabyo, jimi ingi ke kiyukilo, kechi kubaitabila ne, kana ku babula kwitabila. pakuba kaula na mupashik ke kiyuukilo, kechi kuboba babula kwitabila ne, poso kana kuboba baitabila. ²³ Umvwe, byonkabyo, kipwilo pamo ne bonse baamba munjimi ingi, ne baantutu ne babula kwitabila batwelamo, kechi bakamba amba mwakonyanenyi? ²⁴ Bino umvwe anweba bonse mwaula na mupashi kabiji ukabula kwitabila ne muntutu watwelamo, wakonsha kushimunwa ku bonse bo aumvwa. kabiji wakonsha kupingulwa ku bonse baamba. ²⁵ Ne byafyamika mumuchima wanji bikasoloka. kabiji ponkapo ukaponena pa kilungi kyanji ne kumupopwela Lesa. Ne kwaamba amba kine Lesa uji mukachi kenu. ²⁶ Bika bisakulondololapo, Balongo bami? byo mupwila pamo, yense pamuuntu pa muuntu uji na salamo, Lufunjisho, lumwekesho, jimi ingi, nangwa kuluumbulula. ubai byonse bino kuba amba umkomeshe kipwilo. ²⁷ Umvwai paji umo waamba munjimi ingi ,Lekai bekale babiji nangwa basatu, saka balondankana, kabiji umo alumbululenga bya ambiwa. ²⁸ Pakuba umvwe ke paji wakwiilimbulula ne kibafwainwa bonse kuzhindama mu kipwilo. Lekai yense pa muuntu pa muuntu eambile mwine na Lesa. ²⁹ Lekai bangauzhi babiji nangwa basatu baambe, kabiji bakwaabo bomvwe na kwibipima bya ambiwe. ³⁰ Pano umvwai milangwe ya panwa ku yewa waikala monka, lekai yewa ubena kwaamba azhindame. ³¹ Maambo bonse kyawama kwaula na mupashi umo naamba mufunde kabiji naamba bonse mutundaikwe. ³² Maambo mipashi ya bangauzhi itangijilwa na bangauzhi. ³³ Maambo Lesa kechi ye Lesa wa byongo ne ye Lesa wa muutende. uno ye mukambizho mubipwilo byonse bya bazhijikwa. ³⁴ Baana bakazhi bazhindame mu bipwilo. maambo kechi baswishiwa kwaamba ne. mino, abo bekale banekena, maambo ne mizhilo byobyo yaamba. ³⁵ Umvwe paji bimo byasaka kufunda, Lekai bepuzha ba mwata wabo ku nzubo kwabo bene. maambo kyo kya bumvu mwana mukazhi kwaamba mu kipwilo. ³⁶ Bushe ko kwi anweba kwafuma byaambo bya Lesanyi? ye anweba bonka ko byafika byaambo bya Lesanyi? ³⁷ Umvwe umo wisangulukila mwine amba ne Ngauzhi wa Lesa nngwa amba ne wa bumupashi, etabe mba bintu byonse byo nemunembela nweba byo byakambizha aye nkaambo. ³⁸ Pakuba umvwe umo wabula kuyuka bino, naye kechi ayukanyikiwe ne. ³⁹ Byonkabyo, balongo bami sakishai kwaula na mupashi, kabiji kange mukanyepo nangwa umo kwaamba munjimi ingi ne. ⁴⁰ Bino Lekai bintu byonse byubiwe bulongo ne mundonda ya bintu.