¹ Jitete ja painwe kwi amiwa ku kwingishiwa nobe kamaama ka kupiminako. Ba mbujile amba, "Imana kabiji upime nzubo ya Lesa ne kyakusokelapo bitapisho, ne abo bapopwela monka. ² Bino kangiye upime Lubanza pangye ya nzuubo ne, maambo pa panwa ku bangetila. Abo bakanyantaula muzhi wazhila bangondo makuumi ana na abiji. ³ Amiwa nkapa bakamonyi bami babiji luusa lwa kwaula mooba 1,260, saka bavwala bivwalo bya majila," ⁴ Bano bakamonyi bo bichi bya maolivi bibiji ne bituulwapo malampi bibiji bya imaana kumenso a Nkaambo wa pamo pa ntaanda. ⁵ Inge uji umo wasalapo kwi boba bibi abo, mujilo ulupuka mu tunwa twabo ne kusoka balwanyi babo. Uji umo usaaka kwi boba bibi abo ufwainwatu kwipaiwa mu yenkao musango. ⁶ Bano bakamonyi baji na luusa lwa kushinka mwiulu pakuuba amba mvula abule kunokanga mu ao mooba a kwaula kwabo. Abo baji na buluume bwa kwaula meema aikala ke mashi ne kupuuma ntaanda na myaalo ya misoongo ne misoongo monka mo bakasakila. ⁷ Ne byo bakapwisha lushimuno lwabo, lukinyaama awa ukafuuma mu kalengwa kabula kupela ukalwa nabo nkondo. Aye ukebashinda ne kwi bepaya abo. ⁸ Ne mbili yabo ikalaalatu mu mukwakwa wamuzhi mukaatampe (ye baesakanya kwitwa amba sodoma ne ijipita) amo nkaambo yabo mo a popelwe. ⁹ Mu mooba asaatu ne ja kupelelezha pakaachi bamo kufuuma mu mitundu ya baantu, mu milaka, mu bisaka ne mumikoka bakeya mu kutala pa mbili yabo. Abo kechi bakaswisha mbili yabo kwi ibika mu kilende ne. ¹⁰ Abo bekala pano pa ntanda bakasangalala na maambo a abo ne kusekelela. Abo baketuminanga ne bya buupe ku umo ne mukwaabo maambo amba bano bangauzhi babiji bamanyikile booba bekala pano pantanda. ¹¹ Bino pa kupwa mooba asatu ne jimo japelela pakaachi muuya ukafuuma kwi Lesa ne kwiba twala abo, kabiji bakemaana na maulu abo. Ne mooyo mukaatampe ukaponeena pa booba ba kebaamona. ¹² Kabiji abo bakomvwa jiwi jo bakabijika kufuma mwiulu amba, "iyai peulu kuno!" Kepo abo ba saka be bataala byo baya. ¹³ Pa kyokyo kimye kukekaala kitentaanshi kikataampe, ne lubaji lumo lwa jikuumi lwa muzhi lwa ponene. Biumbi bitaanu na bibiji bya baantu bikepaiwa mu kitentanshi, ne bakashalapo bakobiwa bingi mooyo ne kupaana lutumbijiko kwi Lesa wa mwiulu. ¹⁴ Malwa a bubiji apita. Talai malwa abusatu abena kwiya bukiji. ¹⁵ Kabiji malaika wa butaanu na bubiji waimbile ntolompita yanji, ne jiwi jikataampe ja ambile mwiulu ne kwamba amba, "Bufuumu bwa pano pa ntanda bwa aluka ke bufuumu bwa Nkaambo yetu ne bwa kilishitu wanji, kabiji aye ukekala mu bufuumu myaaka ne myaaka." ¹⁶ Kabiji ba kuluumpe makuumi abiji ne baana, abo bekala pa ma tanda abo ku meenso a Lesa, ba ponene kinkuvuumene ne kumupopwela Lesa. ¹⁷ Ba ambile amba "Twimusanchila anweeba, Nkaambo Lesa wabuluume boonse, anweeba umo ujipo, ne wajiipo, maambo anweeba mwasenda buluume bwenu bukaatampe kwikala ke Mfuumu. ¹⁸ Ba mikooka yoonse bazhingijile, bino bukaji bwenu bwa iya. Kimye kyafika kya kupinguula bafu ne anweeba ku kulambula bakaluume benu ba ngauzhi ne baantu bazhila ba kwa Lesa, ne boba bachininenga jizhina jenu, boonse pamo babula kunema ne bangovu. Kimye kya Akila anweeba kya konauna boba babeena ko nauna ntanda." ¹⁹ Kabiji ponkapo Nzubo ya Lesa mwiulu beishinkwile ne jikwaachi wa lulayangano wamwekele monka mu Nzuubo yanji yazhila. Amo mwajinga kubesha, bilulumo, kutatauka, kitanshi, ne mvuula mukaatampe wa maabwe.