¹ Kuli keshika ha lyapwila kushi uhiso kuli waze ali muli Kilishitu Yesu . ² Mumu shimbi ja Shipilitu Ya mwono muli Kilishitu Yesu hiyinakutusula kushimbi ja shili nyi kufwa . ³ Mumu chize shimbi kujakahashile kulinga mumu ja lelele kupalikila kumusunya , Zambi walingile .Watumine mwanenyi wika mukulifwa cha musunya wa shili nyikupwa mulambu wa shili , nawa nyikuhisa shili mu musunya . ⁴ Walingile chino hanga ululi wa shimbi ukamanunuke muli yetu , kutwendele nyi kulita nyi musunya , alyoze nyi kulita nyi Shipilitu . ⁵ Waze akutwama kulita nyi musunya kasa manyonga jo kuyuma yamusunya , alyoze waze akutwama kulita nyi Shipilitu kasa manyonga jo ku yuma ya Shipilitu . ⁶ Mumu manyonga akutwala kumusunya kufwa , alyoze manyonga akutwala ku Shipilitu we mwono nyi uhwimino . ⁷ Manyonga akutwala kumusunya chapwa kole kuli Zambi , mumu chishi kuzeyela kushimbi ja Zambi , chipwe kulinga chino . ⁸ Waze ali kumusunya kahashile kusehesa Zambi . ⁹ Keshika , enu kunushi kumusunya alyoze mu Shipilitu , nyi kachi chamwenemwene Shipilitu wa Zambi katwama muli yenu . Alyoze nyi kachi umwe keshi nyi Shipilitu wa Kilishitu , awo hinyiwenyi ko . ¹⁰ Nyi kachi Kilishitu kali muli yenu , mujimba kuwafwa pundu kushili , alyoze Shipilitu iye katwama pundu nyi ululi . ¹¹ Nyi kachi Shipilitu yenyi yize yahindwishile Yesu hakachi ka afu katwama muli yenu , iye yoze wahindwishile Kilishitu hakachi ka afu makapwisa nyi mwono nawa kumijimba yenu yakufwa kupalikila mu Shipilitu yenyi , yoze watwama muli yenu . ¹² Chocho nawa , mandumbu , kongo tuli nalyo , alyoze hikumusunyiko tuka twame kulita nyi kumusunya . ¹³ Mumu nyi kachi nwatwama kulita nyi kumusunya , munukafwa , alyoze nyikachi ku Shipilitu nwashaha yilinga ya mujimba , munu katwama . ¹⁴ Waze eswe asongwela nyi Shipilitu wa Zambi , ano e ana ja Zambi . ¹⁵ Enu kunwatambwile Shipilitu ya undungo mba nyiku twama nawa nyi woma ; alyoze nwatambwile Shipilitu wakunupwisa ana , mba muli iye twakulila , ''Tata , Tata ! '' ¹⁶ Shipilitu iye mwene kakushindakenya hamwe nyi Shipilitu wetu ngwenyi tuli ana ja Zambi . ¹⁷ Nyi kachi tuli ana , mba tuli maswana nawa , maswana ja Zambi . Nawa tuli maswana ako nyi Kilishitu , nyi kachi chamwenemwene twamona lamba hamwe nenyi hanga tukapwe nyi uhenya hamwe nenyi . ¹⁸ Mumu ngunanyongo ngwami lamba lya shimbu lino kulyatelele kutesa nyi uhenya uze makasolola kuli yetu . ¹⁹ Mumu yuma yeswe yakutangiwa ku yakutalatala nyi kulawola usolwelo wa ana ja Zambi . ²⁰ Mumu yuma yeswe atangile ayizeyesele kuyikatalo yamokomoko , hi nyi upale wa yo eneko , alyoze mumu hali yoze wayizeyesele , mukutalatala ²¹ hanga hashi hene nawa hakatusuke ku undungo wa kupola , ndo akachinehe kukutusuka cha uhenya wa ana ja Zambi . ²² Mumu tunanyingika ngwo yuma yeswe ya kutanga kuya kutwa mukuma nyi kuzata muyikola hamuwika ndo halyapwila . ²³ Hi yino wika ko , alyoze chipwe yetwene nawa , yetu tuli nyi mihuko itangu ya Shipilitu , twakutwa mikuma mu mbunge , nyi kushimbwila chaku lawoka nyi kupwa ngwe ana , acho we ukuule wamijimba yetu ²⁴ .Mumu muchino kutalatala atulamwinyine . Alyoze kutalatala chize chinasoloka hikutalatala ko . Mumu iya matalatala chize anamono ? ²⁵ Alyoze nyi kachi twatalatala chize kutwamwene , kachi twa kushimbwila nyi uhumikizo . ²⁶ Chizechene , Shipilitu nawa yakutukwasa muku zeya chetu . Mumu ktwanyingikine chaku lemba , alyoze Shipilitu iye mwene kakutuhakwila mumbunge . ²⁷ Yoze wakuhengwola mu mbunge kakunyingika manyinga a Shipilitu , mumu kakuhakwila atu ja Zambi asandu kulita nyi upale wa Zambi . ²⁸ Kutwanyingika ngwo waze akuzanga Zambi , kakuzata kuyuma yeswe hamuwika ha ipema , waze eswe hanaatambika kulita nyi upale wenyi . ²⁹ Mumu waze wa anyingikine shimbu kanda hanga nawa akatese nyi kulifwa cha Mwanenyi , hanga akapwa mutangu kusemuka hakachi ka mandumbu jenyi . ³⁰ Waze wafujikile , nawa awatambikile . Waze iye watambikile , o nawa wapwishile akwa ululi . Waze iye wapwishile akwa ululi , o nawa wapwishile akwa uhenya . ³¹ Kuchi nawa mutwamba hali ino yuma ? Nyi kachi Zambi mapwa hamwe nyi yetu , iya mahasa kulimika nyi yetu ? ³² Yoze kevwilile keke Mwanenyi mwene alyoze wamukunjikile hali yetu eswe , te kuchi katwaha hamwe nenyi yuma yeswe chawana nyi ? ³³ Iya masuma mulonga waze hanatongola Zambi ? Zambi iye mwene wa asambijile . ³⁴ Iya yoze mahisa ? Kilishitu Yesu iye yoze wafwile - kuhyana hali chino - yoze ahindwishile - yoze uli kukwokwo lya chindume lya Zambi , nawa yoze wakutuhakwila . ³⁵ Iya yoze matuhandununa ku zango lya Kilishitu ? Luyinda , hanji kupinda , hanji yihungumyona , hanji kapunga , hanji uvu , hanji utoji , hanji katana nyi ? ³⁶ Ngwe chinasonewa ngwo , '' Mumu hali yena kakutushaha tangwa lyeswe nganganga . Hanatumono kupwa ngwe mapanga mashaha. '' ³⁷ Muyino yuma yeswe kutwa hyana kukumba kupalikila mu Yoze hanatuzange . ³⁸ Mumu ngunakunuka ngwami chipwe kufwa , chipwe mwono , chipwe angelo , chipwe yiyulo , chipwe yuma ya halyapwila , chipwe yuma mu yizaho , chipwe tachi , ³⁹ chipwe usuku , chipwe kuhiha , chipwe chuma chikwo chize atangile , muchitela kutu handununa ku zango lya Zambi , lize lili muli Kilishitu Yesu mwene wetu .