¹ Mba twambe kuchi ? Ngwetu tunyongonone mu shili nyi hanga vumbi likalumbame? ² Ka pundu yetu hitunafu ku shili, ngwe kuchi mututwamamo nawa? ³ Shina nunalajala ngwe chize anji hanapapachisa muli Kilishitu Yesu hana papachisa mu kufwa chenyi? ⁴ Hanatufundu , keshika , hamwe nenyi ku upapachiso mu kufwa . Achi chasolokele hanga chize chene ngwe hanahindwisa Kilishitu hakachi ka afu ku uhenya wa mwe Tata , chocho yetu nawa tukende mu mwono waha. ⁵ Mumu kachi hitunalifutula nenyi mu kufwa chenyi , kachi chocho nawa kumutukapwa mu kulifwa cha uhindukilo wenyi. ⁶ Se tunanyingika , ngwetu hanahachila mutu wetu mukulu ha kulusu hamwe nenyi hanga mujimba wa shili ukahwe. Achi chilingiwile hanga kutuchi kapwa nawa mu undungo wa shili . ⁷ Mumu yoze wafwile kanasambe ku shili. ⁸ Alyoze nyi hitunafu hamwe nyi Kilishitu , tunafulyela ngwetu kumukapwa nyi mwono nawa hamwe nenyi. ⁹ Mumu tunanyingika se hanahindwisa Kilishitu hakachi ka afu , keshi kufwa nawa; kufwa kuchoshi chiyulo hali yiye nawa. ¹⁰ Mumukufwa chize afwile wafwile ku shili wafwile ku shili kamuwika kunahu. Alyoze mwono uze atwama nawo , katwama nawo wa Zambi . ¹¹ Mujila yimuwika ,nyi yenu nawa linyongenu ngwe nuli afu chamwenemwene ku shili , alyoze nuli a mwono kuli Zambi muli Kilishitu Yesu . ¹² Kanda nutayiza shili kuyula mu mijimba yenu ya kufwa hanga nukononoke ku usolo wayo. ¹³ Kanda nukatumbikila yihanda yenu yitwaya uhenge ku shili , hanga yipwe yuma ya kuzachisa mu uhenge . Alyoze litumbikilenu kuli Zambi chizechene ngwe waze a mono hanaahindwishila hakachi ka afu , nyi yihanda yenu yikwa ya ululi kuli Zambi . ¹⁴ Kanda nutayiza shili kupwa nyi chiyulo hali yenu . Mumu kunushi kushilya shimbi, alyoze kushi lya vumbi. ¹⁵ Mba kuchi ? Tuvulumune mumu kutushi kushi lya shimbi alyoze kushi lya vumbi nyi? Ka pundu . ¹⁶ Kunwanyingikine ngwo nyi munulitumbikile yenwene ngwe wu ndungo , nuli ndungo ja yoze munonokene? chipwe nuli ndungo ja kuli shili , ya kutwale ku kufwa, hanji wu ndungo wa kwononoka, wize wa kutwala ku ululi . ¹⁷ Alyoze tusakwilenu kuli Zambi ! chipwe nwapwile te ndungo ja shili , mba nwononokene mu mbunge ku chiseke cha longeso lize anukunjikileko. ¹⁸ Se hinunatusuka ku shili , hinunapu ndungo ja ululi. ¹⁹ Ngunahanjika ngwe mutu mumu ha ulelu wa misunya wenu. Mumu chizechene ngwe nwatumbikile yihanda yenu ngwe ndungo ja luchisa nyi ku ungulungulu ha ungulungulu , chizechene halyapwila tumbikilenu yihanda yenu ngwe ndungo ja ululi ndo ku usandu. ²⁰ Mumu muze nwapwile ndungo ja shili, nwatusukile ha kutwala kuli ululi . ²¹ Ha wola yize mihuko yika nwapwile nayo ku yuma yize halyapwila nunavwila sonyi ? mumu songo lya yuma yize kufwa. ²² Alyoze halyapwila se hinunatusuka ku shili hinunapu ndungo ja Zambi , mihuko nuli nayo ndo usandu . Nyi songo lyawo mwono wa mutolo . ²³ Mumu fweto ya shili kufwa , alyoze chawana cha vumbi lya Zambi mwono wa mutolo muli Kilishitu Yesu Mwene wetu.