¹ Keshika mumu ku ufulyelo hana tusambisa , sambukila tuli nayo nyi Zambi kuli Mwene wetu Yesu Kilishitu . ² Kuli yiye nawa unjililo tuli nawo ku vumbi lino muze twakumana , mumu ha ufulyelo twakulisamba ha kutalatala uhenya wa Zambi . ³ Hichize wika ko, alyoze twakulisamba mu luyinda wetu nawa. Mumu tunanyingika luyinda kakulinga kunyongonona. ⁴ Nyi kunyongonona kuchakulinga kukola, nyi kukola kuchakulinga kutalatala, ⁵ nyi kutalatala kuchishi kukolesa sonyi mumu zango lya Zambi hanalizukwila mu mbunge jetu ku tachi ja Shipilitu Musandu yoze atuhele. ⁶ Mumu shimbu te kutushi tachi, ha mwaka wa kulita Kilishitu wafwilile yitaanganyanyi . ⁷ Mumu chikalu umwe mafwila mukwa ululi , hindu hanji umwe mahamuka kufwila mutu mupema. ⁸ Alyoze Zambi kanasolola chinyingi cha zango lyenyi kuli yetu , mumu shimbu te tuchili, yivulumunyi , Kilishitu watufwilile . ⁹ Shinaho chikolo keshika , se hanatusambisa halyapwila nyi manyinga jenyi , kuli yiye makatulamwina ku utenu. ¹⁰ Mumu , kachi shimbu twapwile akwakole , twawanyine nyi Zambi kukufwa cha mwanenyi, shinaho chikolo se hitunawane makatulamwina nyi mwono wenyi . ¹¹ Hi chize wika ko , alyoze twakulisamba muli Zambi kuli Mwene wetu Yesu Kilishitu , kuli yiye halyapwila hitunatambula uwanyino. ¹² Keshika , chizechene ngwe kuli mutu umuwika shili yanjilile hano hashi , nyi ku shili kufwa chanjilile . Chocho kufwa chahetele kuli atu eswe , mumu te eswe avulumwine. ¹³ Mumu ndo ku shimbi , shili yapwile hano hashi , alyoze keshi kwalula shili kuze shimbi yakuhi. ¹⁴ Hindu kufwa chayulile chize ku Alama ndo kuli Mose , chipwe kuli waze kavulumwineko nyi kulita nyi kulifwa cha utanguko wa Alama , mwenawo chizulye cha yoze meza . ¹⁵ Alyoze chawana cha vumbi kuchapwile ngwe we mulonga . Mumu kachi ku mulonga wa umuwika anji afwile , shinaho chikolo vumbi lya Zambi nyi chawana ku vumbi lya mutu umuwika, Yesu Kilishitu , lyalumbamine kuli anji. ¹⁶ Chikwo nawa che chawana kuchapwile ngwe chejile chize chejile kukuvulumuna cha mutu umuwika . Mumu upatwilo wejile kuli umuwika nyi kuneha uhiso alyoze chawana aha vumbi chejile ku milonga yinji nyi kuneha usambiso. ¹⁷ Mumu kachi ku mulonga wa mutu umuwika , kufwa chayulile mumu hali umuwika , shinaho chikolo waze akutambula kulumbama cha vumbi nyi chawana cha ululi mayula mu mwono mumu hali umuwika , Yesu Kilishitu. ¹⁸ Chocho chizechene , ngwe ku mulonga umuwika upatwilo wejile hali atu eswe, chocho nawa ku chilinga chimuwika cha ululi chawana chejile kuli atu eswe nyi kuneha usambiso wa mwono. ¹⁹ Mumu chizechene ngwe ku uhulya wa mutu umuwika anji aapwishile yivulumunyi , chocho nawa ku kwononoka cha mutu umuwika aanji kumaapwisa akwa ululi . ²⁰ Achi shimbi yanjilile hanga mulonga akalumbame. Alyoze kuze shili yalumbamine vumbi lyalumbamine kuhyana chikolo . ²¹ Hanga chizechene ngwe shili yalumbamine mukufwa , chocho nawa vumbi likayule ku ululi ndo ku mwono wa mutolo mumu hali Yesu Kilishitu Mwene wetu.