¹ Halyapwila yetu tuli nyi tachi chatutamba kumbata ulelu wa waze keshi nyi tachi, nyi kuhona kuli wahisa yetwene. ² Echenu umwe hali yetu akawahise enyembo jenyi nyi chize china peme, hanga akapwe wakumukolesa. ³ Mumu nyi Kilishitu kaliwahishile ko. Alyoze kuchapwile ngwe chizechene achisoneka, '' Luchoko wa waze akuchoka luneza hali yami.'' ⁴ Mumu yeswe yasonewene kunyima yasonewene mukutulongesa hanga kupalikila mu kuhumikiza nyi muli kukolesa kwa yisoneka mutupwa akutalatala. ⁵ Halyapwila Zambi ya uhumikizo nyi wa kulembejeka anwehe kupwa nyi kunyonga chimuwika kuli umwe nyi mukwo nyi kulita nyi Yesu Kilishitu. ⁶ Achilinge nyi kulita hanga nyi kunyonga chimuwika nukachichimyeke nyi kanwa limuwika Zambi Tata wa Mwene wetu Yesu Kilishitu. ⁷ Keshika litambulenu umwe nyi mukwo, ngwe chizechene Kilishitu wanutambwile, ha uhenya wa Zambi. ⁸ Mumu ngunambe ngwami Kilishitu hamupwisa ngamba wa ungalami mukumanyina umwenemwene wa Zambi, hanga aka kolese yilakenyo kuli tulamba, ⁹ nawa akwa mavungu akachichimyeke Zambi ha keke yenyi. Muze chinasonewa, '' Keshika munguchichimyeka kuli yenu hakachi ka mavungu nyi kwimba jina lye.'' ¹⁰ Nawa yahanjiika ngwo, '' Wahililenu , yenu akwa mavungu , hamwe nyi atu jenyi.'' ¹¹ Nawa , chichimyeka Mwene , yenu akwa mavungu eswe; mutu mweswe amuchichinyeke.'' ¹² Nawa, Isaya yamba ngwo, '' kumukukapwa chikota cha Yese, wuze makalimika hanga akayule mavungu waze aku talatala.'' ¹³ Halyapwila Zambi ya kutalatala azalise muli yenu nyi kuwahilila nyi sambukila mu kufulyela , hanga kutachi ya Shipilitu Musandu nupwe akutalatala. ¹⁴ Yami mwene ngunakunuka ha kutwala kuli yenu, Mandumbu jami .ngwe yenwene nunazale to nyi upeme weswe, mwa to nyi yinyingi yeswe , nunahase nawa kulikanyamisa umwe nyi mukwo nyi mukwo . ¹⁵ Alyoze ngunasoneka kuli yenu , kanda ngwe nyi kuhamuka , hanga mgunwiwulule cheka nawa, mumu ha vubi lize anguhele Zambi . ¹⁶ Hanga ngukapwe kavumbi ka Kilishitu Yesu kuli akwa mavungu , nyikulinga ngwe uvumbiko wa sasendote mu sango lya Zambi , hanga akwa mavungu akapwe mulambu wa kupemena chikolo , kanausela ku usandu kuli Shipilitu Musandu . ¹⁷ Chize chakulisamba nacho keshika nguli nacho muli Kilishitu Yesu nyi yuma ya kutwala kuli Zambi . ¹⁸ Mumu chichi kahamuka kuhanjika ha yuma nyimwe shina yize alingile Kilishitu ku moko jami, mukwononwesa akwa mavungu ku maliji nyi ku yitanga , ¹⁹ nyi tachi ja yilayi nyi yipekesa, nyi tachija Shipilitu Musandu ; chocho chize ku Yelusaleme nyikujinga ndo ku Ililiku , hingunamanununa kwambujola sango lipema lya Kilishitu : ²⁰ Chocho , nguneseka chikolo kwambujola sango lipema , kuze kanda achivuluka jina lya Kilishitu , hanga chichi katunga ha fundamentu ya mbala . ²¹ Alyoze ngwe chinasonewa ngwo waze kuli ayo kaambulwile nyichimwe cha kutwala kuli iye kumakamona , nyi waze kevwileko kumakanyingika . ²² Keshika nawa kanji nakwikwile kwiza kuli yenu : ²³ alyoze halyapwila se chishi muhela nawa mu yifuchi yino , mba se ngunevu usona ha myaka yino yinji kwiza kuli yenu. ²⁴ Heswaho munguyila mu wenyi wami ku Hesipanya mumu ngunatalatala kunumona ha hupalika mu wenyi wami, hanga nukangushinjikile mu jila yami, kachi hatangu nguliwahise hakehe hamwe nyi yenu . ²⁵ Alyoze halyapwila munguya ku Yelusaleme ngukavumbike asandu. ²⁶ Mumu hichinawahila akwa Masendonyiya nyi akwa Akeya kuhana jimwe mbongo hali yiswale a kuli asandu waze ali mu Yelusaleme . ²⁷ Ewa hichinaawahila ; o kanapu akwa makongo kuli ayo, mumu kachi akwa mavungu hanalyanyina nyi yuma yo ya ushipilitu , chatamba naa kwalingila nyi yuma yatwala ku mujimba . ²⁸ Muzekeshika hinamanununa chino nyi kuhana kuli ayo akwa mihuko yino, kumungukakatuka nyi kupalika kuli yenu kuya ku Hesipenya . ²⁹ Alyoze ngunanyingika muze mungwiza kuli yenu ,kumungukeza nyi kuzala to cha uwape wa Kilishitu. ³⁰ Ngunalyumbu kuli yenu , mandumbu mujina lya Mwene wetu Kilishitu ,nyi kuzango lya Shipilitu , nukalitachike hamwe nyi yami mu yilemba yenu kuli Zambi , ³¹ hanga nukapuluke kuli waze keshi kwononoka mu Yundeya , nyi uvumbiko wami wuze nguli nawo hali akwa Yelusaleme ,ukapwe wakupemene chikolo kuli asandu ³² .Hanga ngukeze kuli yenu nyi uwahililo , ku upale wa Zambi , nyi hanga ngukahwime hamwe nyi yenu. ³³ Zambi ya sambukila akapwe hamwe nyi yenu eswe.