¹ Alyoze yoze unalele ku ufulyelo nukamutambule , hindu kwakuhona kuhana upatwilo ha ku hangujola . ² Umwe kali nyi ufulyelo wa kulya yeswe , alyoze mukwo mulelu kakulya wika yilimalima . ³ Yoze wakulya yeswe kanda alelesa yoze keshi kulya ; nawa yoze keshi kulya yeswe kanda apatwila yoze wakulya yeswe . Mumu Zambi hanamutambula . ⁴ Yena iya , yena wakupatwila ngamba ya mbala ? Kuli mwene wenyi mamana hanji malimbuka . Alyoze mamumanyisa , mumu Mwene mahasa ku mumanyisa . ⁵ Umwe malemesa tangwa limwe chinji kuhichika akwo matangwa . Mukwo malemesa matangwa eswe chimuwika . Mweswe akalisele chinyingi lya kulu mumbunge yenyi mwene . ⁶ Yoze malemesa tangwa , malilemesa kuli mwe Mwene ; nyi yoze malya , malya kuli mwe Mwene , mumu masakwila kuli Zambi . Yose keshi kulya , kakulitwamina ku kulya kuli mwe mwene ; nyiye kakusakwila kuli Zambi . ⁷ Mumu nyiumwe wa kuli yetu mapwa nyi mwono kuli iye mwene , mba nyiumwa mafwa kuli iye mwene . ⁸ Mumu twakupwa nyi mwono , mutupwa nyi mwono kuli mwe Mwene , chipwe kachi mutufwa , kuli Mwene twakufwa . Keshika chipwe mutupwa nyi mwono chipwe mutufwa , tuli ambala a Mwene . ⁹ Mumu ha chino Kilishitu yafwa yahinduka yatwama nyi mwono nawa , hanga akapwe Mwene wa eswe ali nyi wa afu nyi wa a mwono . ¹⁰ Alyoze yena , ika wakupatwila ndumbwe ? Mba yena , ika te wakulelesa ndumbwe ? Mumu yetu eswe kumutukamana kulutwe lya chitwamo cha upatwilo wa Zambi . ¹¹ Mumu chinasonewa ngwo , '' Nyi mwono wami '' Mwene kanambe ngwenyi , '' Makungunwa eswe kumakalyumba kui yami , nyi malimi eswe kumakahalisa Zambi . '' ¹² Chocho kevwe mutu nyi mutu wa kuli yetu kumakalumbununa hakutwala kuli iye mwene kuli Zambi . ¹³ Keshika , tulipatwila nawa umwe nyi mukwo , alyoze tupatulenu chino shinaho , ngwetu nyiumwe kanda asa chihukanyino chipwe chitalingiso mu jila ya ndumbwenyi . ¹⁴ Ngunanyingika nawa nguna kunuka muli Mwene Yesu ngwami nyichimwe cha luchisa chene . Shina kuli yoze machishinginyeka kupwa cha luchisa , kuli yoze hichapwa cha luchisa . ¹⁵ Kachi ha mukunda wa kulya ndumbwe mevwa kupiha , yena kuwendele mu zango . Kanda ulumbula nyi kulya che yoze amufwilile Kilishitu . ¹⁶ Mba kanda ahanjika yipi ha yipema yenu . ¹⁷ Mumu wanangana wa Zamba hi kulya ko nyi kunwa ko , alyoze ululi , sambukila , nyi uwahililo muli Shipilitu Musandu . ¹⁸ Mumu yoze malingila Kilishitu muyino yuma mapemena chikolo kuli Zambi nawa mamusela shindakenyo yipema kuli atu . ¹⁹ Chocho tukaulenu yuma yize yatwala kusambukila nyi yuma yize mutuhasa kulikolesa nayo umwe nyi mukwo nyi mukwo . ²⁰ Kanda nukonwona chitanga cha Zambi mumu ha kulya . Yuma yeswe chamwenemwene yipema , alyoze muyipwa yipi kuli mutu yoze malya nyi chihukanyiso . ²¹ Chinawaha kulitwamina kulya yifwo , chipwe kunwa vinyu , chipwe kulinga chuma chimwe chize mahukanyisa nacho ndumbwe . ²² Ufulyelo uze uli nawo , pwako nawo kuli yena mwene nyi kuli Zambi . Kawaha yose keshi kulipatwila ha chize matayiza . ²³ Yoze mayambashana mahya kachi malya , mumu hi cha ku ufulyelo ko . Mba yeswe yize yakatukile ko ku ufulyelo hi ya Shili .