¹ Echenu mutu mweswe akazeyele kuli ali nyi kuyula , mumu mukwa kuyula wakuli nyi umwe shina wa kuli Zambi. Nyi akwa kuyula waze aliko hangasela cho kuli Zambi. ² Keshika mweswawo malimika nyi mukwa kuyula malimika nyi chiyulo cha Zambi; nyi waze eswe malimika no makatambula upatwilo. ³ Mumu akwa kuyula keshi kwavwila woma hakulinga yitanga yipema , alyoze ha yitanga yipi. Mba unazange kupwa kushi woma kuli mukwa kuyula nyi? Linga yipema , mba mukapwa nyi uhaliso kuli iye . ⁴ Mumu iye kanapu kavumbi ka Zambi kuli yena ha yipema . Alyoze kachi mulinga yipi , ivwa woma; mumu kambachile katana chamokomoko . Mumu iye kavumbi ka Zambi , mukwa kukala mumu ha utenu kuli yoze wakulinga yipi . ⁵ Keshika chanutamba kwononoka , hi mumu ha utenu wika ko , alyoze nawa ha shimbi ya mbunge. ⁶ Mumu hachino nwakufweta lijimu nawa . Mumu akwa kuyula akwa kulingila Zambi , kaku hondangana matangwa eswe ku chuma chino . ⁷ Fwetenu keshika kuli eswe yize chanutamba kuhana kuli ayo : Lijimu kuli anatela lijimu, milambu .kuli akwa kutela milambu , woma kuli waze chatamba kwavwila woma , ulemu kuli akwa kutela ulemu. ⁸ Kanda nukapwa nyi kongo kuli nyi umwe , shina kulizanga umwe nyi mukwo . Mumu yoze mazanga mukwo hanamanununa shimbi jeswe . ⁹ Shimbi jino , '' Kanda ulinga utanji , kanda ushiha , kanda wiya, kanda wivwa kuzo,'' nyi kachi liji likwo lya shimbi liliko linapu mu liji lino ngwo , '' uzange mwe nyembo we chizechene ngwe unalizange yena mwene.'' ¹⁰ Zango kulishi kulinga yipi kuli mwenyembo wenyi . Keshika zango linapu che kumanununa cha shimbi. ¹¹ Chipwe chocho , nuna nyingika mwaka , ngwe ola yaheta kulu nukalaule mutulo. Mumu halyapwila ulamwino wetu hakamwihi uli kuhyana muze twafulyelele hatangu. ¹² Ufuku hiwahwa chikolo , mwalwa hiwakundama mukamwihi . Tumbilenu keshika yitanga ya milima , tulipakatenu yitwa yeswe ya pangu. ¹³ Twendenu ngwe chinalite ,ngwe mu mwalwa , hi mulilika ya izengi chipwe mu kuzengewa zengewako, nawa kanda twenda mu uyila chipwe mu chimbangwinya ko , chipwe mu vunda chipwe mu ukwa ko . ¹⁴ Alyoze zalenu Mwene Yesu Kilishitu , kanda nusela nichimwe ha musunya, mukumanununa usolo wawo.