¹ Keshika ngunalyumbu kuli yenu , mandumbu , ku keke ya Zambi , nutumbikile mijimba yenu chitapo chamwono, chisasndu , chakupemena chikolo kuli Zambi . Uno we uvumbiko wenu. ² Kanda nulitesa nyi mwakono , alyoze alumukenu ku kupwisa chaha cha kunyonga chenu . Nukase chinyingi chize wapwa upale upema , nyi ungunu wa Zambi , nyi uze wa mupemena. ³ Mumu kuvumbi lize anguhele ngunambe kuli mutu nyi mutu hakachi kenu ngwami : Kanda alinyonga kuhyana chize chamutamba kunyonga , alyoze , akanyonge myi mana, ngwe Zambi hanapanjika kuli mutu nyi mutu njongo yenyi ya ufulyelo. ⁴ Mumu ngwe tuli nyi yihanda yinji mu mujimba umuwika , nyi yihanda yeswe kuyishi mulimo umuwika. ⁵ Chocho nawa , yetu tuli anji tunapu mujimba umuwika muli Kilishitu , nyi eswe mutu nyi mutu chihanda chimwe cha mukwo nyi mukwo . ⁶ Tuli nyi yawana ya vumbi yeka nyi yeka nyi kulita nyi vumbi lize hanatwehe . Nyi umwe chawana chenyi cha upolofeto , achilinge nyikulita nyi njongo ya ufulyelo wenyi. ⁷ Nyi umwe chawana chenyi cha kukalakalila akwo , mwechenu akalakale . ⁸ Nyi umwe chawana chenyi cha kushinjila maliji , mwechenu ashinjile. Nyi umwe chawana chenyi chakuhana chenyi chakusongwela , akachilinge nyi mbunge yeswe. Nyi umwe chawana chenyi chakulweza keke, akachilinge nyi kusehejela. ⁹ Zango likapwe kulishi ulembekese . Ivwenu lwaji ha ungulungulu ; lalaminyenu ku yipema . ¹⁰ Hakutwala ku zango lya mandumbu, lifwilenu nyi utu umwe kuli mukwo nyi mukwo . Ha kutwala ku ulemu , livumbikenu umwe nyi mukwo . ¹¹ Ha kulipupwisa , kanda nulengama . Hakutwala ku Shipilitu jenu , lishinjilenu . Ha kutwala kuli Mwene , mulingilenu . ¹² Hakutalilila chenu , nukawahilile , ha luyinda nukanyongonone, ha kulemba nukalikoleze . ¹³ Nukalyanyine ku kuhona cha asandu . Nukalitumbikile kuzumbula ngeji. ¹⁴ Wahisenu waze akunuhungumyona , wahisenu kanda nushingana. ¹⁵ Wahililenu hamwe nyi waze akuwahilila , lilenu hamwe nyi waze akulila ¹⁶ .Pwenu no kunyonga chimuwika umwe kuli mukwo nyi mukwo. Kanda nunyonga yuma ya kulengumuka , alyoze ataizenu waze akulikehesa . Kanda nukanyama nyi kutoka cha yenwene. ¹⁷ Kanda nufweta nyiumwe yipi ha yipi. Lingenu yuma yipema kumeso ja atu eswe . ¹⁸ Kachi muchihasa kupwa , nyikulita nyi tachi jenu, Pwenu nyi sambukila kuli atu eswe. ¹⁹ Kanda nulikalila milonga yenwene , akwetu a zango , alyoze lisekulenu ha utenu wa Zambi . Mumu chinasonewa ngwo, '' Kukala nyi chami, kumungufwetesa yami mwene, chocho anambe Mwene .'' ²⁰ Alyoze ''kachi mukwa kole we mevwa zala , mulise . Kachi mevwa pwila , mwehe ya kunwa . Mumu hakulinga chocho , mukalunjika makala a kahya ha mutwe wenyi.'' ²¹ Kanda anukumba ku yipi , alyoze kumbenu yipi ha kulinga yipema.