¹ Ngunambe ngwami , Zambi hanakane atu jenyi nyi? Kanda chipwa. Mumu nyi yami nguli ka Izalele , wa muyachi wa Apalahama, waku vungu lya Mbejamine. ² Zambi kambilileko atu jenyi , waze wanyingikine . Himuna nyingika chize chasonekewa hali Eliya, muze alembele kuli Zambi ha kulimika nyi A-Izalele ? ³ '' Mwene o hashaha atupulofeta eswe , hanapuzula yilumbilo yo. Yami wika nguna sala , nawa kanafupu mwono wami.'' ⁴ Mba Zambi kuchi amukumbulwile yiye ? '' Hi ngunalifungila tununu shimbyali a maluna waze kalyumbile makungunya jo kuli Mbale.'' ⁵ chizechene nawa , hali yino shimbu hali anasaleho mumu nyi kutongola cha vumbi. ⁶ Alyoze kachi chinapu cha vumbi , mba kuchapwile cha yitanga. Chocho vumbi kuyishi kuhasa kupwa nawa vumbi . ⁷ Mba kuchi? yuma yize A-Izalele akufupa , kakachizukilileko, alyoze waze atongwele hachizuka , nyi eswe hanakale. ⁸ Ngwe chize chasonekewa: '' Zambi hanawahe Shipilitu wa kufungunuka , meso waze keshi kumona , nyi matwi kechi kevwa , ndo ku lino tangwa,'' ⁹ Ndawichi kanambe ngwenyi , ''Echenu mesa jo jikapwe lyoji nyi miheto , liwe lya kutalyangisa nyi fweto kuli ayo. ¹⁰ Meso jo avwale hanga akahone kumona. Nyi kufumbika manyima jo matangwa eswe.'' ¹¹ Ngunambe ngwami , '' Atalyangile hanga alimbuke nyi? '' Kanda chikapwa chocho. Pundu, kumilonga jo , ulamwino hiwuneza nyi kuli akwa mavungu , hanga ¹² kachi uhando wo wa hano hashi , nyi kuhewuka cho chinapu upite wa akwa mavungu. ¹³ Mumu ngunahanjika kuli akwa mavungu , mumu te yami nguli positolo wa akwa mavungu , nguna chimika mu uvumbiko. ¹⁴ Kachi hanji ngukehie ku akwa waze aku musunya wami . Ngukalamwine amwe a muli ayo. ¹⁵ Mumu kachi kumbila cha ayo chinapu uwanyino wa akwa hashi , kuchi muchipwa kutambula cha ayo hi mwono ko hakachi ka afu nyi? ¹⁶ Achi kachi muhuko utangu usandu , kachi mwaha weswe nawa usandu. kachi muji usandu , kachi mitango nawa yisandu ¹⁷ Chocho kachi mitango yimwe ayipatwile ko kachi yena, se uli olevwe wa mu yambu , akuhungine hakachi ko , nyi kalyanyine no ha miji ya maji ja olevwe, ¹⁸ Kanda uka lisamba ha mitango . Alyoze kachi mulisamba , hi yenako wakukwasa miji, alyoze miji yenayo yakukukwasa. ¹⁹ Mwamba ngwo , '' Mitango ayipatwilemo hanga angunungemo.'' ²⁰ umwenemwene mumu kafulyelele ayipatwile ko , mumu kukumana chikolo anamana mu ufulyelo kanda ukalengumuka , alyoze ivwa woma. ²¹ Mumu zambi kevwile keke mitango yitangu , chipwe yena kachi kakuvwila kekenawa. ²² Talenu, nawa , upale nyi ukalu wa Zambi , ukalu wejile kuli waze alimbukile, alyoze keke ya Zambi yejile kuli yena, kachi watwalilila mu upale wenyi . Yena nawa kumakakupatulaho. ²³ Nyi ayo nawa, nyi keshi kunyongonona mu ufulyelo , kumakawanungamo , mumu Zambi kanahase kuwanungamo nawa. ²⁴ Mumu nyi yena akupatwile ku uze nyikulita nyi olevwe wa mu yambu, nyi kuyinunga ku olevwe upema, shinaho chikolo nawa, mitango ya ku chisemwa, makanunga nyi olevwe jo ene nyi? ²⁵ Mumu chazangile yenu mulite , mandumbu, kwalajala ha chijimbikilo , kuchina munupwa akuzangama mu yinyonga yenu: ngwe kulisa hachihanda hichawana A- Izalele ndo ku kuzalo cha akwa mavungu muchiza mo. ²⁶ Chocho A-Izalele kumakalamwina eswe , ngwe chinasonekewa:'' mukwa kupulula kumakakatuka ku Ziyoni. Kumakafumisaho utanganyanyi kuli aka Yakomba, ²⁷ uno we usandu wami kuli ayo, muze kumungukachiza milonga yo.'' ²⁸ Ha kutwala ku songo lipema , kanapu akwa kole mumu wa yenu . Alyoze hakutwala ku kutongwela , kanazangiwa hamulonga wa tulamba two. ²⁹ Mumu yawana ya vumbi nyi kutambika cha Zambi kushi kucheja ³⁰ Mumu muze mwene nyi yenu kumwa kononokene kuli Zambi , alyoze halyapwila himunawane keke hamulonga wa kononoka cho. ³¹ Mujila yimuwika , A-Yunda kanakapwa a konwonoka . Nyi yinakatuhukamo keke yize anuvwilile newo nawa akatambwile keke. ³² Mumu Zambi hanjila eswe mu uhulya hanga eswe akamone keke. ³³ E mama , kukunama cha upite nyi mana nyi yinyonga ya Zambi ! upatwilo wenyi keshi kuhasa ku utonda, nyi maliji enyi keshi kuhasa kuwanyonga weswe! ³⁴ ''Mumu yiya wanyingika kunyonga cha Mwene chipwe hiya wapwile mukakumwaha mana? ³⁵ Hanji hiya walyanga kumwaha Zambi , ngwo Zambi neye akamwehe neye?'' ³⁶ Mumu yuma yeswe kuyakatuka kuli iye kuyakola ku tachi jenyi , yakuswila muli iye. kuli yiye uhenya ukapwe nenyi myaka yeswe. Amena.